एक मुलगा तुरुंगात, दुसऱ्यावर गुन्हा दाखल : नारायण राणे आहेत कुठे?

दिल्ली : केंद्रीय मंत्री आणि भाजपचे दिग्गज नेते नारायण राणे (Narayan Rane) यांची दोन्ही मुलं सध्या कमालाची अडचणीत सापडली आहेत. नितेश राणे (Nitesh Rane) यांना संतोष परब हल्ल्याप्रकरणी काल २ दिवसांची पोलिस कोठडी सुनावण्यात आली आहे. सत्र न्यायालयाने जामीन अर्ज फेटाळल्यानंतर काल दुपारी ते पोलिसांना शरण आले. त्यानंतर नितेश राणेंचे पीए राकेश राणेंच्या मोबाईलवरून हल्ल्यातील संशयीत आरोपी सातपुते याच्याशी नितेश राणेंचे झालेले मोबाईल संभाषण व राकेश परब व नितेश राणे यांची चौकशी करण्यासाठी पोलिस कोठडीची मागणी सरकारी वकील प्रदीप घरत यांनी केली होती.

तर कालच नारायण राणे यांचा दुसरा मुलगा निलेश राणे यांच्यावर देखील गुन्हा दाखल करण्यात आला आहे. शिवसेना आमदार वैभव नाईक (Vaibhav Naik) यांनी पत्र लिहून निलेश राणे यांच्यावर कारवाई करण्याची मागणी केली होती. सत्र न्यायालयाच्या बाहेर निलेश नारायण राणे यांनी सिंधुदुर्ग जिल्ह्यामध्ये जमावबंदी आदेश असतांना देखील याठिकाणी बंदोबस्ताकरिता तैनात पोलीस अधिकारी व कर्मचाऱ्यांना त्यांनी स्वत: व त्यांच्या २५ च्या आसपास समर्थकांनी अरेरावी व अर्वाच्या भाषेमध्ये पोलीसांना शिवीगाळ केली, असा आरोप नाईक यांनी केला होता. त्यानंतर नाईक यांच्या पत्राची दखल घेत पोलिसांनी निलेश राणे यांच्यावरही गुन्हा दाखल केला आहे.

मात्र या सगळ्यात नारायण राणे कुठे आहेत असा सवाल विचारला जात आहे. एक मुलगा तुरुंगात आणि दुसऱ्या मुलावार गुन्हा दाखल होवूनही अद्याप राणे सिंधुदुर्गमध्ये आलेले नाहीत. याशिवाय ते कुठेही माध्यमांशी बोलताना दिसून आले नाहीत किंवा सोशल मिडीयावरुन देखील त्यांनी कुठेही याबद्दल भाष्य केलेले नाही. मग राणे नेमके आहेत?

तर नारायण राणे सध्या दिल्लीमध्येच आहेत. संसदेचे अर्थसंकल्पीय अधिवेशन सुरु असल्यामुळे ते सध्या अधिवेशनाच्या कामकाजामध्येच व्यस्त आहेत. नारायण राणे यांच्या ट्विटर अकाऊंटवरील माहितीप्रमाणे ते आज संध्याकाळी ४ वाजता लोकसभेमध्ये होणाऱ्या प्रश्नोत्तराच्या तासाला हजेरी लावणार आहेत. सुत्रांनी दिलेल्या माहितीनुसार नारायण राणे आता अधिवेशनाचा पहिला टप्पा संपल्यानंतरच दिल्लीतून सिंधुदुर्गमध्ये येणार आहेत.