दीपक केसरकर यांनी केलेल्या ‘नारायण राणेंना संपविण्याचा कट’ या दाव्यावर नितेश राणे यांनी कठोर प्रतिक्रिया देत ते वक्तव्य हास्यास्पद असल्याचे म्हटले.
२०१४ ते २०२४ दरम्यान राणे कुटुंबावर झालेले गुन्हे आणि कारवाई नेमकी कोण करत होतं, हे जनतेला व्यवस्थित माहिती असल्याचे त्यांनी स्पष्ट केले.
उद्योगमंत्री उदय सामंत आणि शिंदे सेनेचे नेते या विषयावर गप्प का आहेत, असा थेट सवाल नितेश राणेंनी उपस्थित केला.
Sindhudurg News : शिंदेंच्या शिवसेनेचे नेते आमदार निलेश राणे यांनी नुकताच भाजपवर हल्लाबोल करत शिवसेनेची कोंडी केली जातेय. त्यासाठीच आपल्यावर गुन्हा दाखल करण्यात आला आहे. पण आपण मागे हटणारे नाही असे म्हणत भाजपला इशारा दिला आहे. त्या पाठोपाठ माजी मंत्री आमदार दीपक केसरकर यांनी देखील, 'नीलेश राणे बळीचा बकरा केलं जात असून भाजप नेते नारायण राणे यांना संपवण्याचा कट सुरु आहे, असा दावा केला होता. ज्यानंतर जिल्ह्याच्या राजकारणात खळबळ उडाली होती. यावर भाजप नेते तथा पालकमंत्री नितेश राणे यांनी जोरदार पलटवार केला आहे. तसेच ज्यांनी राणेंविरोधात काम केलं तेच आज त्यांची काळजी करत आहेत. त्यांच्याबाबत वक्तव्य करत आहेत. हेच हास्यास्पद असल्याचे म्हणत टोला लगावला आहे.
नितेश राणे यांनी, नारायण राणे यांची इच्छा होती की शहर विकास आघाडी होऊ नये, कणकवलीत शहर विकास आघाडी होऊ नये, एकनाथ शिंदे यांनी उद्धव ठाकरे यांच्यासोबत जाऊ नये, हे विधान देखील नारायण राणे यांचीच होती. शेवटी नारायण राणे हे एक प्रगल्भ नेते आहेत, ते राज्याचे मुख्यमंत्री राहिलेले आहेत. त्यांना युती आघाड्या सर्व समजतं. पण त्यांचाच शब्द मोडून तुम्ही काय केलंत.
2014 ते 2024 पर्यत राणे कुटुंबांविरोधात षडयंत्र कोणी रचले, कोणी गुन्हे दाखल केले, कोण विरोधात वागले हे जनतेला माहित आहे. 2014 ला नारायण राणेंची प्रतिमा खराब करण्याची सुरूवात कोणी केली ? नीलेश राणेंच्या विरोधात खासदारकीला शडडू कुणी ठोकला ? आज तेच म्हणातात राणेंच्या विरोधात कट रचला जातो, हे हास्यास्पद आहे. भाजपने आम्हाला आशीर्वाद दिला, पद दिली. नारायण राणेंना केंद्रीय मंत्री करण्याचं काम भाजपने केल. आम्हाला कोणी जेलमध्ये टाकलं ? केसीस घातल्या हे सगळं माहित आहे असे म्हणत केसरकर यांच्या दाव्यातील हवाच निलेश राणेंनी काढली आहे.
महायुती टिकवण्याची जबाबदारी आमची आहे. आम्हाला जनतेला केंद्रस्थानी ठेवून विकास करायचा आहे. 2 तारखेपर्यंत आम्हाला संयम ठेवायचा आहे. पोटनिवडणुकीत आमचा नगराध्यक्ष होता. त्यामुळे आताही आमचाच असावा यासाठी आग्रह होता. तर 2 डिसेंबरनंतर केसरकर आणि आम्ही एकत्र बसणार आहोत. महायुती म्हणूनच पुढे कारभार करणार आहोत. राजघराण्याशी केसरकरांच नातं अधिक घट्ट आहे, केसरकर मोठ्या मनाचे आहेत असेही नितेश राणे यांनी म्हटलं आहे.
तर भाजपा पदाधिकारी यांच्या घरात घुसल्या कारणामुळे निलेश राणेंवर मालवण पोलीस ठाण्यात गुन्हा दाखल करण्यात आला आहे. ज्यानंतर नितेश राणेंनी भावाची पाठराखण करत, उदय सामंत येऊन रवींद्र चव्हाण यांच्यावर का टीका करत नाहीत. निलेश राणे यांच्या समर्थनार्थ त्यांच्यातील एकही नेता का उतरत नाही? असाही सवाल यावेळी त्यांनी उपस्थित केला.
तिकडे ते गुलाबराव पाटील नारायण राणेंची खिल्ली उडवतात पण त्यावर शिवसेनेचा एकही नेता का बोलत नाहीये? फक्त निलेश राणेच बोलत आहेत. ना रत्नागिरीचा, ना कोकणातला, ना महाराष्ट्रातला, त्यांना का एकटं पाडले जात आहे? दीपक केसरकर का रविंद्र चव्हाण यांचे नाव घेत नाहीत. केसरकरांनी सुद्धा रविंद्र चव्हाणांचे नाव घ्यावे ना. ते का प्रश्न विचारत नाहीत? असा सवालच मंत्री नितेश राणेंनी उपस्थित केला आहे.
काय म्हणाले होते केसरकर?
केसरक यांनी, जिल्ह्यात पालिकांच्या निवडणुकीत महायुती व्हावी ती राहावी अशी इच्छा नारायण राणेंची होती. त्या पद्धतीने ती रत्नागिरीमध्ये झाली. मात्र सिंधुदुर्गमध्ये युती होऊ शकली नाही. याला कोणाचा विरोध झाला. भाजपच्या नेत्यांनी नारायण राणेंचा शब्द मानला नाही. युती भाजपने तोडली. पण आम्ही राणे साहेबांच्या शब्दासाठी शेवटपर्यंत थांबलो होतो.
ते म्हणाले असते तितक्या जागांवर लढण्यास आमची तयारी होती. अशा पद्धतीने पैशांचे वाटप करण्याची गरजच नव्हती. लोकांना पाहिजे तेथे त्यांना मतदान करून द्या, काय गरज आहे एवढा मोठा खर्च करण्याची. लाखो रुपये उतरवले जात आहेत. येथील शांततेची संस्कृती बिघडवली जातेय. हा सगळा कट असून तो भविष्यातला मोठा कट असू शकतो. याच कटाचा भाग हा राणे साहेबांना प्रचारापासून दूर ठेवले जात आहे. त्यांची प्रतिमा खराब केली जातेय. असा दावा केसरकर यांनी केला होता.
FAQs :
1) नितेश राणे यांनी कोणावर आरोप केले?
त्यांनी दीपक केसरकर आणि शिंदे सेनेतील इतर गप्प बसणाऱ्या नेत्यांवर निशाणा साधला.
2) केसरकर काय म्हणाले होते?
नारायण राणेंना कटकारस्थान करून संपविण्याचा दावा त्यांनी केला होता.
3) नितेश राणेंची प्रतिक्रिया काय होती?
त्यांनी ते वक्तव्य पूर्णपणे हास्यास्पद आणि वास्तवापासून दूर असल्याचे म्हटले.
4) २०१४ ते २०२४ कालावधीचा उल्लेख का?
या काळात राणे कुटुंबावर कारवाया कोण करत होतं यावरून नितेश राणेंनी प्रश्न उपस्थित केला.
5) या प्रकरणाचा राजकीय परिणाम?
या वक्तव्यांनी कोकण आणि राज्यातील राजकारणात तणाव वाढला असून नवा वाद रंगत आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.