Yogesh Kadam : पालकमंत्रिपदाच्या वादात आणखी एका मंत्र्यांची उडी; योगेश कदम यांचा 'रायगड'वर दावा!

Raigad News : पालकमंत्री पदाचा तिढा अधिक क्लिष्ट होण्याची चिन्हे आहेत. शिवसेना एकनाथ शिंदे पक्षाचे गृह राज्यमंत्री योगेश कदम यांनी तसे संकेत दिले आहेत. आता मुख्यमंत्री काय निर्णय घेतात याची उत्सुकता आहे. कदम यांनी प्रत्येक पक्ष आपल्या बालेकिल्ला सांभाळण्याचा प्रयत्न करतो. रायगड हा आमचा बालेकिल्ला आहे. या जिल्ह्यात आमचे सर्वाधिक आमदार आहेत, असा दावा केला आहे.

रायगड जिल्ह्यात आमचे सर्वाधिक आमदार आहेत. त्यामुळे पालकमंत्री पद शिवसेना शिंदे पक्षालाच मिळाले पाहिजे, असा आमचा आग्रह आहे. या संदर्भात उपमुख्यमंत्री आणि मुख्यमंत्री यांच्याकडे हा विषय पोहोचला आहे. त्यामुळे मुख्यमंत्री देवेंद्र फडणवीस आणि उपमुख्यमंत्री एकनाथ शिंदे याबाबत चर्चा करून निर्णय घेतील, असे कदम यांनी सांगितले.

गृह राज्यमंत्री कदम म्हणाले, जिथे संसार असतो, तिथे भांड्याला भांडे लागतेच. महायुतीत देखील तीन पक्ष आहेत. मात्र आमची एकजूट भक्कम आहे. ती नेहमीच कायम राहील. महायुती म्हणूनच आगामी निवडणुकांमध्ये आम्ही एकत्र लढू असेही त्यांनी सांगितले.

रायगडला आमच्या पक्षातच पालकमंत्री झाला पाहिजे, असे माझे वैयक्तिक मत आहे. नाशिक जिल्ह्याच्या पालकमंत्री पदाबाबत मी काहीही बोलू इच्छित नाही. कारण त्याबाबत मला फारशी माहिती नाही. यावेळी राज्यमंत्री कदम यांनी शिवसेना पक्षप्रमुख उद्धव ठाकरे यांच्यावरही टीका केली.

आम्ही बाहेर पडलेलो नाही. आम्हीच खरी शिवसेना आहोत. एकनाथ शिंदे यांनी उठाव केला. त्यात आम्ही सर्व सहभागी झालो. मित्र पक्षाला त्रास होत असताना पक्षप्रमुख उद्धव ठाकरे त्याबाबत काहीही करायला तयार नव्हते. पक्षातील लोकांना उद्धव ठाकरे साथ देत नव्हते. त्यामुळे हा उठाव झाला, असे कदम म्हणाले. विधानसभेच्या निवडणुकीत देखील जनतेने आम्हाला कौल दिला आहे. त्यामुळे आम्हीच खरी शिवसेना आहोत. यात आता काही वाद राहिलेला नाही. यासंदर्भात होणारे आरोप आता जुने झाले आहेत, असेही कदम यांनी स्पष्ट केले.