Raigad politics : ऐन निवडणुकीच्या तोंडावर तटकरेंची खेळी, गोगावलेंचा विश्वासूच पळवला, शिंदेंच्या शिवसेनेला मोठा धक्का

Raigad News : रायगडमध्ये दोन्ही उपमुख्यमंत्र्यांच्या पक्षांमध्ये राजकीय वाद उफाळला आहे. अजित पवार यांच्या राष्ट्रवादी काँग्रेस आणि एकनाथ शिंदे यांच्या शिवसेना यांच्यात सुरू असलेल्या पालकमंत्रीपदाच्या ताणात आता ‘पक्षफोडा-फोडी’चा टप्पा गाठला आहे. काही दिवसांपूर्वीच प्रदेशाध्यक्ष खासदार सुनील तटकरे यांचे निकटवर्तीय विकास गायकवाड यांना मंत्री भरत गोगावले यांनी शिवसेनेत प्रवेश करून घेत राष्ट्रवादीला मोठा धक्का दिला होता. मात्र आता तटकरे यांनीही पलटवार करत गोगावले यांचे अत्यंत विश्वासू आणि शिवसेनेचे उपजिल्हाप्रमुख असलेल्या नेत्याला आपल्या पक्षात घेतले आहेत. त्यामुळे ऐन स्थानिक निवडणुकांच्या तोंडावर रायगडमधील राजकीय समीकरणे पूर्णपणे बदलण्याची चिन्हे आहेत.

एकीकडे जिल्हा परिषद आणि पंचायत समिती निवडणुकांच्या पार्श्वभूमीवर राष्ट्रवादी आणि शिवसेनेत शह-काटशह सुरू झाले आहेत. राष्ट्रवादीला प्रत्युत्तर देण्यासाठी गोगावले आणि शिवसेनेचे आमदार जोरदार मोर्चेबांधणी करत आहेत. याच पार्श्वभूमीवर गोगावलेंनी राष्ट्रवादीला लक्ष्य करत त्यांच्या पायाभूत संघटनेत फूट पाडण्यास सुरुवात केली होती.

काही दिवसांपूर्वीच, ऐन दिवाळीत आणि निवडणुकीच्या तोंडावर, गोगावले यांनी रायगडमध्ये राष्ट्रवादीला मोठा धक्का दिला. त्यांनी खासदार सुनील तटकरे यांचे निकटवर्तीय विकास गायकवाड यांना शिवसेनेत प्रवेश करून घेतले होते. या प्रवेशामुळे राष्ट्रवादीला रायगड जिल्ह्यात मोठा धक्का बसल्याची चर्चा रंगली होती.

मात्र आता गोगावलेंच्या या खेळीवर प्रत्युत्तर देत तटकरेंनी गोगावले यांचे विश्वासू सहकारी असलेले शिवसेनेचे उपजिल्हाप्रमुख रमेश मोरे यांना राष्ट्रवादीत प्रवेश करून घेतले आहे. सुतारवाडी येथे तटकरे यांच्या उपस्थितीत हा पक्षप्रवेश सोहळा पार पडला. यावेळी तटकरे यांनी रमेश मोरे आणि त्यांच्या कार्यकर्त्यांचे पक्षात स्वागत केले. या प्रवेशानंतर मोरे यांनी शिवसेनेवर आरोपांचा वर्षाव केला आहे.

दरम्यान, महायुती सरकार स्थापन होऊन दहा महिने उलटून गेले तरी रायगड आणि नाशिक जिल्ह्यांतील पालकमंत्रीपदाचा तिढा अजून सुटलेला नाही. रायगडसाठी मंत्री अदिती तटकरे यांच्या नावाची घोषणा झाली होती, मात्र शिवसेनेचे मंत्री भरत गोगावले आणि त्यांच्या कार्यकर्त्यांनी थेट विरोध दर्शवला.

परिणामी, उपमुख्यमंत्री देवेंद्र फडणवीस यांना ही नियुक्ती मागे घ्यावी लागली. त्यानंतर तटकरे आणि गोगावले यांच्यातील दुरावा अधिकच वाढला असून पालकमंत्रीपदाच्या मुद्द्यावरून दोन्ही नेत्यांमध्ये आरोप-प्रत्यारोपांचा सिलसिला सुरूच आहे.

FAQs :

1. रायगडमध्ये राष्ट्रवादी आणि शिवसेनेत वाद का वाढला आहे?
स्थानिक स्वराज्य संस्थांच्या निवडणुकांच्या पार्श्वभूमीवर दोन्ही पक्षांनी एकमेकांच्या कार्यकर्त्यांची फोडाफोड सुरू केल्याने वाद तीव्र झाला आहे.

2. भरत गोगावले यांनी कोणाला शिवसेनेत घेतले?
गोगावले यांनी सुनील तटकरे यांचे निकटवर्तीय आणि समर्थक विकास गायकवाड यांना शिवसेनेत घेतले.

3. सुनील तटकरे यांनी काय प्रत्युत्तर दिले?
तटकऱ्यांनी गोगावले यांचे अत्यंत विश्वासू आणि शिवसेनेचे उपजिल्हाप्रमुख रमेश मोरे यांना राष्ट्रवादीत प्रवेश दिला.

4. या हालचालींचा निवडणुकीवर काय परिणाम होऊ शकतो?
या फोडाफोडीमुळे रायगड जिल्ह्यातील स्थानिक स्वराज्य निवडणुका अधिक चुरशीच्या होण्याची शक्यता आहे.

5. हा वाद कोणत्या पदावरून सुरू झाला होता?
हा वाद प्रामुख्याने रायगडच्या पालकमंत्रीपदाच्या नियुक्तीवरून सुरू झाला होता, ज्यामुळे दोन्ही नेत्यांमध्ये मतभेद निर्माण झाले.