Sindhudurg missing person case update: कोल्हापूर जिल्ह्यातील रहिवासी असलेली पूजा अनिल पवार या शिक्षिका सध्या सिंधुदुर्ग जिल्ह्यातील वैभववाडी तालुक्यात कामानिमित्त राहत होत्या.
1 मे रोजी महाराष्ट्र दिनानिमित्त शाळेत ध्वजारोहण कार्यक्रमासाठी त्या गेल्यानंतर अचानक बेपत्ता झाल्याची घटना समोर आली आहे. या घटनेमुळे त्यांच्या कुटुंबीयांमध्ये चिंतेचे वातावरण निर्माण झाले असून, विशेषतः पती अनिल पवार आणि 8 वर्षांचा मुलगा मोठ्या मानसिक तणावाखाली आहेत.
पूजा पवार या जिल्हा परिषद शाळेत कार्यरत असून, त्या वैभववाडीतील सोनाळी चव्हाणवाडी येथे सेवेत होत्या. नेहमीप्रमाणे त्या 1 मे रोजी शाळेत कार्यक्रमासाठी गेल्या, मात्र त्यानंतर त्या घरी परतल्याच नाहीत.
सुरुवातीला उशीर झाला असेल असे समजून कुटुंबीयांनी प्रतीक्षा केली, पण बराच वेळ उलटूनही त्यांचा काहीच संपर्क झाला नाही. त्यानंतर त्यांच्या पतीने स्वतःहून शोध घेण्यास सुरुवात केली. नातेवाईक, मित्रमंडळी आणि ओळखीच्या सर्व ठिकाणी चौकशी करूनही कोणतीही ठोस माहिती मिळाली नाही.
शेवटी 2 मे रोजी अनिल पवार यांनी वैभववाडी पोलीस ठाण्यात अधिकृत तक्रार नोंदवली. पोलिसांनी तत्काळ शोधमोहीम सुरू केली असून, परिसरातील सीसीटीव्ही फुटेज, मोबाईल लोकेशन आणि संपर्कातील व्यक्तींची माहिती तपासली जात आहे. पोलिसांना एका संबंधित व्यक्तीचा मोबाईल बंद असल्याची माहिती मिळाली असून, या घटनेत काही संशयास्पद बाबी असण्याची शक्यता नाकारता येत नाही.
या प्रकरणात पोलिसांनी नागरिकांना आवाहन केले आहे की, पूजा पवार यांच्याबाबत कोणतीही माहिती मिळाल्यास त्वरित पोलीस ठाण्याशी संपर्क साधावा. दरम्यान, त्यांच्या कुटुंबीयांशी व नातेवाईकांशी सतत संपर्क ठेवून अधिक माहिती गोळा केली जात आहे. या प्रकरणाचा तपास सहाय्यक पोलीस निरीक्षक सोनाळकर यांच्या मार्गदर्शनाखाली सुरू आहे.
लहानपणी वडिलांचे छत्र हरवल्यानंतर त्यांनी आईच्या आधारावर शिक्षण पूर्ण केले. डीएड केल्यानंतर त्यांनी लग्नानंतरही शिक्षण सुरू ठेवले आणि एमपीएससीद्वारे अधिकारी होण्याचे ध्येय ठेवले होते. कुटुंबाची जबाबदारी सांभाळत त्यांनी शिक्षक म्हणून काम सुरू केले होते. त्यांच्या अचानक बेपत्ता होण्याने केवळ कुटुंबीय नव्हे तर संपूर्ण परिसरात चिंता आणि हळहळ व्यक्त होत आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.