Shiv sena Shinde Gat : राष्ट्रवादीला सोडचिठ्ठी देताच नेत्याने घेतली उद्योगमंत्र्यांची भेट; बंद दाराआड खलबतं

Ratnagiri Politics News : राष्ट्रवादी काँग्रेस शरद पवार गटाचे जिल्हाध्यक्ष सुदेश मयेकर यांनी आठवडाभरापूर्वी आपल्या पदाचा राजीनामा दिल्यानंतर शिवसेना शिंदे गटाचे नेते पालकमंत्री उदय सामंत यांची त्यांच्या निवासस्थानी जाऊन भेट घेतली. त्यामुळे या भेटीला राजकीय वर्तुळात विशेष महत्त्व आहे.

सामंत यांच्या निवासस्थानी मयेकर यांची बंद दाराआड तब्बल वीस मिनिटे ही भेट झाली. या भेटीचे नेमके गुपित काय? असा प्रश्न आता उपस्थित झाला आहे. राजीनामा दिल्यानंतरच त्या भेटीचा योग जुळल्याने राजकीय वर्तुळात अनेक तर्कवितर्क लावले जात आहेत. मयेकर सामंत भेटीमुळे आता मयेकर शिवसेनेचा भगवा खांद्यावर घेणार का? या चर्चेला सुरुवात झाली आहे.

प्रकृतीचे कारण देत मयेकर यांनी राष्ट्रवादी शरद पवार गटाच्या रत्नागिरी जिल्हाध्यक्ष पदाचा अचानक राजिनामा दिला होता. रत्नागिरी शहरातील थिबापॅलेस येथील निवासस्थानी उद्योगमंत्री तथा पालकमंत्री उदय सामंत यांनी सुदेश मयेकर यांच्याशी 20 मिनिटे चर्चा केली. मात्र या चर्चेचा नेमका तपशील कळू शकला नाही.

आठवडाभरापूर्वीच मयेकर यांनी राष्ट्रवादीच्या जिल्हाध्यक्ष पदाचा राजीनामा दिला होता. राज्यात मोठ्या राजकीय भूकंपानंतर शरद पवार यांच्या राष्ट्रवादीची जिल्हाध्यक्ष पदाची जबाबदारी स्वीकारली. मयेकर यांनी जिल्हा दौरा करत राष्ट्रवादीच्या कार्यकर्त्यांना बळ दिले होते. राजीनामा देताना आपल्याला पक्षाने संधी दिल्यास आपण विधानसभा निवडणूक लढविणार, असेही त्यांनी म्हटले होते.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

गेल्या विधानसभा निवडणुकीत उदय सामंत यांच्या विरोधात त्यांनी निवडणूक लढविली होती. उदय सामंत यांच्या भेटीनंतर सुदेश मयेकर आता पुन्हा राजकारणात सक्रिय होत शिंदेंच्या शिवसेनेत प्रवेश करणार का? असा प्रश्न आता राजकीय वर्तुळात उपस्थित केला जात आहे. वाढदिवसाच्या दिवशीच भेट घेत सामंत यांनी मयेकर यांच्या निवासस्थानी केक कापून आपला वाढदिवस साजरा केला. यावेळी त्यांच्यासमवेत शिवसेना जिल्हाप्रमुख राहुल पंडित, शहर प्रमुख विपिन बंदरकर आधी निकटवर्तीय उपस्थित होते.

edited by sachin fulpagare