Uday Samant : काँग्रेसवर नेम, पण उद्धव ठाकरेंना शह; उदय सामंतांचं रत्नागिरीत नेमकं काय सुरू ?

Ratnagiri Political News : काँग्रेसचे मिलिंद देवरा हे मुख्यमंत्री एकनाथ शिंदेंच्या शिवसेनेत प्रवेश करण्याची चर्चा आहे. यावरूनच आता औद्योग मंत्री उदय सामतांनी ठाकरेंना चेक देण्याचे संकेत दिले आहेत. मिलिंद देवरा यांच्यासारख्या नेत्याची एकनाथ शिंदेंना साथ मिळाली तर मुंबईत शिवसेना अधिक भक्कम होईल, असे वक्तव्य करत सामंतांनी धुरळा उडवून दिला. तसेच त्यांनी 14 तारखेपासून काय होते ते पाहा, असा थेट इशाराही ठाकरेंना दिला.

'काँग्रेसचे मिलिंद देवरा (Milind Deora) यांच्या मनात पक्षात येण्याची इच्छा असेल तर शिंदे यांचे नेतृत्व स्वीकारून वंदनीय बाळासाहेबांच्या विचार पुढे नेण्यासाठी शिवसेनेत प्रवेश करावा. सहकारी म्हणून देवरा यांचा चेहरा मिळाला तर शिवसेनेची ताकद फार मोठ्या पद्धतीने वाढेल. ते लोकांमध्ये जावून काम करणारे नेतृत्व आहे,' अशा शब्दात सामंतांना मिलिंद देवरांचे कौतुकही केले.

उद्धव ठाकरे (Uddhav Thackeray) गटाकडून शिंदे गटाचे आमदार संपर्कात असल्याचा वारंवार दावा केला जातो. याबाबत सामंत म्हणाले, 14 तारखेपासून काय होतेय, ते पहा, असा थेट सूचक इशाराच ठाकरेंना दिला आहे.

दरम्यान, शनिवारी उद्धव ठाकरे खासदार श्रीकांत शिंदेंच्या कल्याण मतदारसंघाचा दौरा केला. यावर विचारले असता सामंत म्हणाले, शिंदेंचा बालेकिल्ला आबादीत आहे. कोणी कितीही श्रीकांत शिंदेंच्या मतदारसंघात गेले तरी त्यांना धोका नाही. ते लोकसभेत विजयाची हॅट्रिक करतील, असा विश्वास सामतांनी व्यक्त केला.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

उदय सामंतांना (Uday Samant) महाविकास आघाडीचाही समाचार घेतला. 'महाविकास आघाडीचे नेते सध्या हे सैरभैर झालेत. ज्या महाविकास आघाडीला पंतप्रधानांचा चेहरा नाही त्यांचा आम्ही विचार करत नाही. पहिले त्यांनी पंतप्रधानाचा चेहरा जाहीर करावा. मोदींच्या विरोधात १० ते २० टक्के मतदान घेणारा चेहरा त्यांनी जाहीर करावा,' असे आव्हानच त्यांनी आघाडीतील घटक पक्षांना दिला आहे.

(Edited by Sunil Dhumal)