Ladki Bahin Yojana: जानेवारीचा हप्ता देण्याचा सरकारचा निर्धार! 'या' दिवशी खात्यात जमा होणार पैसे; निवडणूक आयोगाच्या आदेशाला केराची टोपली?

Ladki Bahin Yojana: राज्यातील २९ महापालिका निवडणुकांसाठी उद्या (१५ जानेवारी) मतदान पार पडणार आहे. यापार्श्वभूमीवर दोन दिवसांपूर्वी लाडकी बहीण योजनेचा डिसेंबरचा हप्ता लाभार्थी महिलांच्या खात्यात जमा झाला. पण जानेवारीचा हप्ता मतदानापूर्वी देता येणार नाही, असा आदेश निवडणूक आयोगानं दिला होता. पण तरीही हप्ता महिलांच्या खात्यात जमा करण्यावर सरकार ठाम असून हा हप्ता कधी देणार याची तारीखही खुद्द मुख्यमंत्र्यांनीच जाहीर केली आली आहे. त्यामुळं निवडणूक आयोगाच्या आदेशाला सरकार केराची टोपली दाखवणार असल्याचे संकेत आहेत.

मकरसंक्रांतीपूर्वीच डिसेंबर आणि जानेवारी अशा दोन महिन्यांचे एकूण ३००० रुपये लाडक्या बहिणींच्या खत्यात जमा होतील, असं यापूर्वी वारंवार महायुती सरकारच्या विविध मंत्र्यांकडून सांगण्यात येत होतं. पण मकरसंक्रांत ही मतदानाच्या आदल्या दिवशीच येत असल्यानं जर दोन महिन्यांची एकत्रित रक्कम महिलांच्या खात्यात जमा करण्यावर काँग्रेसनं आक्षेप घेतला होता. मतदानाच्यापूर्वीच अशा प्रकारे थेट रोख रक्कम पाठवल्यानं त्याचा मतदानावर परिणाम होऊ शकतो, असा आक्षेप काँग्रेस घेत निवडणूक आयोगात तक्रार केली होती.

काँग्रेसच्या तक्रारीची दखल घेत यावर निवडणूक आयोगानं आपली भूमिकाही स्पष्ट केली. राज्य सरकारला आयोगानं आदेश दिले की, एकाच वेळी दोन महिन्यांचे पैसे देणं नियमबाह्य ठरू शकतं. याचाच अर्थ जर सरकारनं एकाच वेळी दोन महिन्यांचा हप्ता दिला तर तो आचारसंहितेचा भंग ठरू शकतो. आयोगाच्या या सूचनेची दखल घेत राज्य शासनानं नाईलाजानं केवळ डिसेंबर महिन्याचा हप्ताच जो १५०० रुपये आहे हा द्यावा लागला. हा हप्ता १२-१३ जानेवारीला लाभार्थी महिलांच्या खात्यात जमा झाला. त्यामुळं सुरुवातीला दोन महिन्यांचे ३००० हजार येणार अशी अपेक्षा असल्यानं प्रत्यक्षात १५०० रुपयेच आल्यानं महिला वर्ग नाराज असल्याचं सांगितलं जात आहे.

दरम्यान, आता खुद्द मुख्यमंत्री देवेंद्र फडणवीस यांनी एका ताज्या मुलाखतीत हे स्पष्ट केलं की, याच जानेवारी महिन्यातच याच महिन्याचा हप्ता आम्ही देणार आहोत. भारत एक्स्प्रेस नावाच्या एका हिंदी चॅनलला दिलेल्या मुलाखतीत फडणवीस म्हणाले, "विरोधकांची वृत्तीच अशी आहे की, आम्ही जेव्हा लाडकी बहीण योजना सुरु केली तेव्हा विरोधक हायकोर्टात गेले की ही योजना सुरु करु नका. आम्ही हायकोर्टात आणि सुप्रीम कोर्टात जिंकलो. आत्ताही त्यांनी अशाच प्रकारची तक्रार केली पण काहीही हरकत नाही. आम्ही लाडक्या बहीणींना १६ तारखेला खात्यात पैसे पाठवू. बहिणींचे पैसे आम्ही थांबवू शकत नाही, हे दोन दिवस उशीरा करु शकतो पण आमच्या बहिणींचा पैसा आम्ही थांबवू शकत नाही"