Mahayuti Government : महायुतीच्या नेत्यांना करावी लागणार तारेवरची कसरत; मंत्रीमंडळ विस्तार, खातेवाटपाकडे लक्ष

Mumbai News : विधानसभा निवडणुकीत महायुतीला अभूतपूर्व यश मिळाल्यानंतर देवेंद्र फडणवीस यांनी मुख्यमंत्री पदाची तर एकनाथ शिंदे, अजित पवार यांनी उपमुख्यमंत्रीपदाची शपथ घेतली. त्यानंतर आता खातेवाटपाबाबत महायुतीमधील घटक पक्षात जोरदार रस्सीखेच पहावयास मिळत आहे.

विशेषतः भाजप व शिवसेना शिंदे गटात गृहमंत्री पदावरून चुरस आहे. त्यामुळे येत्या काळात मंत्रिमंडळाचा विस्तार करीत असताना सर्वच घटक पक्षाचे समाधान करण्यासाठी महायुतीच्या नेत्यांना तारेवरची कसरत करावी लागत आहे.

मंत्रिपदासाठी असलेल्या अनेक इच्छुकांचे महायुती समाधान कसे करणार? याकडे सर्वांचे लक्ष लागले आहे. कोणत्या पक्षाला किती मंत्रीपदे दिली जाणार हे अद्याप निश्चित झालेले नाही. त्यामुळे महायुतीमधील भाजप, शिवसेना (Shivsena) शिंदे गट, अजित पवार गट यांच्यात रस्सीखेच पहावयास मिळत आहे. महायुतीमधील तीन पक्षांमधील इच्छुकांची संख्या लक्षात घेता सर्वांचे समाधान करण्यासाठी नेतेमंडळीना तारेवरची कसरत करावी लागणार आहे.

राज्यात महायुतीचे सरकार स्थापन झाल्यानंतर आता मंत्रिमंडळ आणि खातेवाटपाकडे राज्याचे लक्ष लागले आहे. विधिमंडळाचे विशेष अधिवेशनाचा सोमवारी शेवटचा दिवस आहे. तर हिवाळी अधिवेशन 16 डिसेंबरपासून सुरु होणार आहे. त्यामुळे हिवाळी अधिवेशनापूर्वी मंत्रिमंडळाचा विस्तार करण्यात येणार असल्याचे समजते. त्यामुळे विस्ताराची लगबग सुरु आहे.

दरम्यान, मंत्रिमंडळ विस्तार आणि खातेवाटप अंतिम होण्यापूर्वी मुख्यमंत्री देवेंद्र फडणवीस यांच्याकडून शिवसेना आणि राष्ट्रवादी काँग्रेस पक्षाशी (NCP) बैठक करून मंत्रिपदाबाबत अंतिम तोडगा काढण्याचा प्रयत्न केला जाणार आहे. रविवारी रात्री 12 वाजता मुख्यमंत्री फडणवीस यांनी वर्षा निवासस्थानी जाऊन उपमुख्यमंत्री एकनाथ शिंदे यांच्याशी शिवसेनेच्या जागांबाबत चर्चा केली. सोमवारी ते राष्ट्रवादी काँग्रेस पक्षासोबत रात्री उशिरा मुख्यमंत्री देवेंद्र फडणवीस चर्चा करणार असल्याची माहिती आहे. राष्ट्रवादी काँग्रेस चांगली खाती मिळवण्यासाठी प्रयत्नशील आहे.

एकनाथ शिंदे यांनी महायुती सरकारच्या शपथविधीपूर्वी गृहमंत्रीपदाची मागणी केली होती. मात्र, भाजपने त्याला नकार दिला होता. मात्र, शिवसेनेने गृहमंत्रिपदाची मागणी लावून धरली आहे. त्यामुळे शिवसेनेला गृहमंत्रीपद मिळणार की नाही, याकडे सर्वांच्या नजरा लागल्या आहेत. महायुती सरकारमध्ये शिवसेनेच्या वाट्याला 13 ते 14 मंत्रि‍पदे येण्याची शक्यता आहे. भाजपकडून गृहखात्याऐवजी महसूल खाते शिवसेनेसाठी सोडले जाईल, अशीही चर्चा आहे. त्यामुळे आता यावर काय तोडगा काढला जाणार याची उत्सुकता लागली आहे.