Maharashtra Assembly Budget Session 2024 : "राहुल गांधी कुठे तमाशा करतात...", भाजप अन् काँग्रेस आमदारांमध्ये जोरदार खडाजंगी

विधिमंडळ अर्थसंकल्पीय अधिवेशनाचा आज बुधवारी ( 28 फेब्रुवारी ) तिसरा दिवस आहे. आज काँग्रेसच्या आमदार वर्षा गायकवाड ( Varsha Gaikwad ) यांनी उद्योगपती गौतम अदाणी ( Gautam Adani ) यांच्या आडून पंतप्रधान नरेंद्र मोदी ( Narendra Modi ) यांना लक्ष्य केलं. गायकवाडांनी पंतप्रधान मोदी आणि अदाणींचं नाव घेतल्यानं भाजप आमदार आशिष शेलार ( Ashish Shelar ) आणि आमदार अमित साटम ( Amit satam ) यांनी हरकत घेत आक्रमक झाले.

नेमकं काय घडलं?

वर्षा गायकवाडांनी ( Varsha Gaikwad ) विकासकामे अदाणींना देण्यावरून राज्य सरकारवर टीका केली. वर्षा गायकवाड म्हणाल्या, "पूर्ण मुंबई विकायला काढली आहे. मुंबईचे विकासक प्रत्येक डीडीआर अदाणींकडून घेतात. अन्य सगळ्या विकासकांना डीसी रूल ( एकात्मिक सर्वसमावेशक विकास नियंत्रण व प्रोत्साहन नियमावलीस ) आहे. पण, अदाणींनींसाठी वेगळा डीसी रूलची नियमावली तयार करण्यात आली आहे. ते असे कोण आहेत? देशासाठी त्यांनी काय केलं आहे?"

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

"गरीब मुलांसाठी आम्ही स्पोर्टस कॉम्प्लेक्स बांधलं. पण, सरकारनं ते विकण्याचं काम केलं आहे. दीड वर्षात फक्त मित्रकाळ पाहिला आहे. मित्रांना कशी मदत करण्यात येईल, हेच पाहण्यात आलं. बांद्र्यातील रिक्लेमेशनसह, एअर इंडिया, मुलुंड, कांजूरमार्ग, कुर्ला आणि खारपट्ट्यातील जागा पंतप्रधानाचे आदरणीय मित्र अदाणींना देण्यात आली. सायन कोळीवाडा, सिंधी कॉलनी, घाटकोपरमधील रमाबाई कॉलनी, मुंबई रेसकोर्सही अदाणींना दिलं गेलं," असं वर्षा गायकवाडांनी म्हटलं.

गायकवाडांच्या विधानानंतर सत्ताधारी गटातील भाजप आमदांनी एकच गोंधळ घालत हरकत घेतली. भाजप आमदार अमित साटम म्हणाले, "सदस्यांनी मुंबई शहराच्या प्रश्नावर बोलावं. पंतप्रधानांचा इथे काय संबंध? मग राहुल गांधी काय तमाशा करतात हे सांगू का इकडे? कुठे मस्ती करतात हे सांगू का?"

यानंतर वर्षा गायकवाडांनी म्हटलं, "धारावी, एअर इंडिया, बांद्रा रिक्लेमेशन, मुलुंड, कुर्ला, कांजूरमार्ग, कोळीवाडा अदाणींना दिलं नाही का? मुंबई महापालिकेचा कारभार पूर्णपणे प्रशासनाच्या माध्यमातून मनमानी पद्धतीनं चालवण्यात आला."

यावेळी आशिष शेलारांनीही गायकवाडांच्या वक्तव्यावर हरकत घेतली. "काहीही काय बोलताय.... अवास्तव आरोप, असंबंध बोलणं करू नका, असं अध्यक्षांनी सांगितलं. पण, त्यांनी ( गायकवाड ) काय पुरावा दिला आहे? काय पुरावा रेकॉर्डवर ठेवलाय? असत्य आणि असंबंध रेकॉर्डवर जाणार असेल, तर हरकत घ्यायची नाही का?" असा सवाल शेलरांनी तालिका अध्यक्षांना विचारला.