Drought Relief: शेतकऱ्यांच्या मदतीसाठी सरकारचा केंद्राकडे प्रस्ताव; कृषी नुकसान भरपाईसाठी १५ हजार ३८६ कोटींची मागणी

Maharashtra Government News: राज्यातील भीषण दुष्काळामुळे तब्बल १ कोटी ४१ लाख ५३ हजार हेक्टरहून अधिक क्षेत्रावरील शेतीचे ३३ टक्क्यांपेक्षा जास्त नुकसान झाले आहे. शेतीचे सर्व पंचनामे पूर्ण झाल्यानंतर ही माहिती समोर आली आहे. या नुकसानीपोटी कृषी विभागाने १५,३८६ कोटी १९ लाख रुपयांची मागणी केली आहे. याशिवाय ग्रामीण पाणीपुरवठा, पशुसंवर्धन आणि अन्न व नागरी पुरवठा विभागाने केलेल्या मागणीसह राज्याने केंद्राकडे एकूण सुमारे ४० हजार कोटी रुपयांच्या मदतनिधीचा प्रस्ताव शनिवारी (ता.३१) सादर केला आहे.

राज्यातील दुष्काळी परिस्थितीच्या पार्श्वभूमीवर झालेल्या नुकसानीचे पंचनामे पूर्ण झाले आहेत. ज्या शेतीचे ३३ टक्क्यांपेक्षा जास्त नुकसान झाले आहे, ते शेतकरी मदतीसाठी पात्र ठरणार असून, राज्यात दुष्काळामुळे १४१.५३ लाख हेक्टर एवढे प्रचंड क्षेत्र ३३ टक्क्यांपेक्षा अधिक बाधित झाले आहे. या नुकसानीपोटी राज्याच्या कृषी विभागाने १५,३८६ कोटी १९ लाख रुपयांची मागणी केली आहे.

या दुष्काळग्रस्त क्षेत्रांत पिकांनुसार मदतीचे वर्गीकरण करण्यात आले असून, जिरायती, बागायती आणि बहुवार्षिक पिकांसाठी मदतीचे दर निश्चित करण्यात आले आहेत. जिरायती पिकांसाठी प्रति हेक्टर ८,५०० रुपये मदत दर ठरवण्यात आला असून, १०६.५४ लाख हेक्टर

क्षेत्र बाधित झाले आहे. यासाठी एकूण ९,०५६.३७ कोटी रुपयांच्या निधीची आवश्यकता आहे. तर बागायती पिकांसाठी प्रति हेक्टर १७,००० रुपये मदत दर असून, २८.०५ लाख हेक्टर क्षेत्र बाधित झाले आहे. या क्षेत्रासाठी एकूण ४,७६८.६२ कोटी रुपयांचा निधी अपेक्षित आहे.

बहुवार्षिक पिकांसाठी प्रति हेक्टर २२,५०० रुपये मदत दर ठरविण्यात आला असून, ६.९४ लाख हेक्टर क्षेत्र बाधित झाले आहे. याद्वारे एकूण १,५६१.२० कोटी रुपयांचा निधी आवश्यक आहे. एकूण १४१.५३ लाख हेक्टर बाधित क्षेत्रासाठी कृषी विभागाने १५,३८६.१९ कोटी रुपयांच्या मदतीची मागणी केली आहे.

वर्गीकरण -

बाधित क्षेत्र (लाख हेक्टरमध्ये)

१०६.५४

जिरायती

२८.०५

बागायती

६.९४

बहुवार्षिक पिके