Drought Relief News : राज्यातील दुष्काळग्रस्त शेतकऱ्यांना दिवाळीपूर्वी जाहीर करण्यात आलेल्या पाच हजार रुपयांच्या अग्रिम मदतीचे वितरण वेगाने सुरू आहे. आतापर्यंत ७३ लाख शेतकऱ्यांच्या बँक खात्यांमध्ये ही रक्कम जमा करण्यात आली असून, पुढील दोन दिवसांत जवळपास ९५ टक्के पात्र शेतकऱ्यांपर्यंत मदत पोहोचेल, अशी ग्वाही मुख्यमंत्री देवेंद्र फडणवीस यांनी दिली. ते आज (ता. ४) कॅबिनेट बैठकीनंतर मुंबईत पत्रकारांशी बोलत होते.
यावेळी फडणवीस म्हणाले की, काही शेतकऱ्यांच्या बँक खात्यांशी संबंधित तांत्रिक अडचणींमुळे पैसे जमा होण्यास विलंब होत आहे. मात्र, या अडचणी दूर करून उर्वरित शेतकऱ्यांनाही लवकरच मदत दिली जाईल. दरम्यान, पुण्यश्लोक अहिल्यादेवी होळकर शेतकरी कर्जमुक्ती योजनेंतर्गतही शेतकऱ्यांच्या खात्यांत हजारो कोटी रुपये जमा करण्यात आल्याची माहिती त्यांनी दिली.
७३ लाख शेतकऱ्यांच्या खात्यात पाच हजारांची मदत
दुष्काळाच्या संकटाचा सामना करणाऱ्या शेतकऱ्यांना दिलासा देण्यासाठी राज्य सरकारने दिवाळीपूर्वी पाच हजार रुपयांची अग्रिम आर्थिक मदत देण्याची घोषणा केली होती. त्यानुसार आतापर्यंत ७३ लाख शेतकऱ्यांच्या खात्यांत पैसे जमा झाले आहेत. पुढील दोन दिवसांत जवळपास ९५ टक्के शेतकऱ्यांच्या खात्यांत ही रक्कम पोहोचेल, असा विश्वास फडणवीस यांनी व्यक्त केला. काही बँक खात्यांमध्ये तांत्रिक अडचणी असल्यामुळे उर्वरित लाभार्थ्यांना पैसे मिळण्यास थोडा वेळ लागत असल्याचेही त्यांनी सांगितले.
कर्जमाफी योजनेंतर्गत ४,०६४ कोटींचे वितरण
दुसरीकडे, पुण्यश्लोक अहिल्यादेवी होळकर शेतकरी कर्जमुक्ती योजनेंतर्गतही सरकारकडून मदतीचे वितरण सुरू आहे. या योजनेंतर्गत नव्याने ४ लाख ८६ हजार शेतकऱ्यांच्या खात्यांत ४ हजार ६४ कोटी रुपये जमा केल्याची माहिती मुख्यमंत्र्यांनी दिली. या टप्प्यातील लाभार्थ्यांमध्ये मराठवाड्यातील शेतकऱ्यांची संख्या सर्वाधिक असल्याचे त्यांनी नमूद केले. कर्जमाफी योजनेंतर्गत आतापर्यंत जवळपास २१ लाख शेतकऱ्यांच्या खात्यांत सुमारे १९ हजार कोटी रुपये जमा करण्यात आले आहेत.
याद्यांचे प्रमाणीकरण सुरू; प्रक्रिया पूर्ण होताच पैसे जमा
कर्जमाफीसाठी पात्र शेतकऱ्यांच्या याद्यांचे प्रमाणीकरण करण्याचे काम अद्याप सुरू आहे. ज्या लाभार्थ्यांच्या याद्यांचे प्रमाणीकरण पूर्ण होईल, त्यांच्या बँक खात्यांत पुढील टप्प्याने रक्कम जमा केली जाईल, असे फडणवीस यांनी स्पष्ट केले. महायुती सरकार शेतकऱ्यांच्या पाठीशी ठामपणे उभे असून विविध योजनांच्या माध्यमातून शेतकऱ्यांना मदत केली जात असल्याचा दावा त्यांनी केला. तसेच मंत्रिमंडळातील सर्व मंत्र्यांची इच्छा असून, दिवाळीच्या काळात शेतकऱ्यांच्या बांधावर जाऊन त्यांच्यासोबत सण साजरा केला जाणार असल्याचेही त्यांनी सांगितले.
ऊस दर आंदोलनावर सरकारची मध्यस्थीची भूमिका
दरम्यान, राज्यात ऊस दरासाठी सुरू असलेल्या आंदोलनावरही मुख्यमंत्री फडणवीस यांनी भाष्य केले. या आंदोलनामुळे शेतकऱ्यांचेच नुकसान होत असल्याचे त्यांनी म्हटले. शेतकऱ्यांना एफआरपीपेक्षा अधिक दर मिळावा, अशी मागणी असून हा प्रश्न शेतकरी आणि साखर कारखानदार यांच्यातील चर्चेतून सोडवण्याची गरज असल्याचे त्यांनी सांगितले.
या प्रकरणात राज्य सरकारची भूमिका मध्यस्थाची असल्याचे स्पष्ट करत फडणवीस यांनी आंदोलन शांततेत संपवण्याचे आवाहन केले. तसेच मंत्री हसन मुश्रीफ यांनाही मध्यस्थीची भूमिका पार पाडण्यास सांगितल्याचे त्यांनी नमूद केले. एकीकडे दुष्काळग्रस्त शेतकऱ्यांना अग्रिम मदत आणि कर्जमाफीचे पैसे देण्याची प्रक्रिया सुरू असताना दुसरीकडे ऊस दराचा प्रश्नही ऐरणीवर आला आहे. त्यामुळे राज्य सरकार या दोन्ही आघाड्यांवर काय निर्णय घेते, याकडे शेतकरी वर्गाचे लक्ष लागले आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.