मोठी बातमी! राज्यातील दिव्यांग बांधवांसाठी महाराष्ट्र सरकारने एक महत्त्वाचा आणि दिलासा देणारा निर्णय घेतला आहे. आता स्वयंरोजगार सुरू करण्यासाठी दिव्यांग व्यक्तींना थेट 15000 रुपयांचे आर्थिक सहाय्य दिले जाणार आहे. या निर्णयामुळे अनेक दिव्यांगांना स्वतःचा व्यवसाय सुरू करण्याची संधी मिळणार असून स्वावलंबनाकडे मोठे पाऊल टाकले जाणार आहे. दिव्यांग कल्याण मंत्री अतुल सावे यांनी या नव्या उपक्रमाची माहिती दिली आहे.
या योजनेअंतर्गत दिव्यांग व्यक्तींना व्यवसायासाठी आवश्यक असलेली साधनसामग्री खरेदी करण्यासाठी आर्थिक मदत दिली जाणार आहे. ही मदत थेट लाभार्थ्यांच्या बँक खात्यात जमा केली जाणार आहे. दिव्यांग कल्याण आयुक्तालयाच्या माध्यमातून डीबीटी पद्धतीने ही रक्कम जमा होणार असल्यामुळे प्रक्रियेत पारदर्शकता राहणार आहे आणि लाभार्थ्यांना थेट फायदा मिळणार आहे.
विशेष म्हणजे जवळपास 30 वर्षांनंतर या योजनेत दिल्या जाणाऱ्या टूलकिटसाठीच्या रकमेतील मोठी वाढ करण्यात आली आहे. याआधी या योजनेअंतर्गत केवळ 1000 रुपयांची मदत दिली जात होती. मात्र आता ही रक्कम थेट 15000 रुपये करण्यात आली आहे. म्हणजेच तब्बल 15 पट वाढ करण्यात आली आहे. या बदलामुळे दिव्यांग व्यक्तींना आवश्यक साधनसामग्री घेणे अधिक सोपे होणार आहे.
दिव्यांग बांधव त्यांच्या कौशल्य आणि आवडीनुसार विविध प्रकारचे व्यवसाय सुरू करू शकतात. उदाहरणार्थ शिवणकाम, संगणक सेवा, मोबाईल दुरुस्ती, ब्यूटी पार्लर, हस्तकला किंवा लघुउद्योग अशा अनेक क्षेत्रांमध्ये ते स्वतःचे काम उभे करू शकतात. मात्र अनेकदा सुरुवातीस लागणाऱ्या उपकरणांसाठी पैसे नसल्यामुळे त्यांना अडचणींचा सामना करावा लागतो. हीच अडचण दूर करण्यासाठी राज्य सरकारने ही योजना सुरू केली आहे.
या योजनेचा लाभ घेण्यासाठी अर्जदाराने शासन मान्यताप्राप्त संस्थेमधून कौशल्य प्रशिक्षण पूर्ण केलेले असणे आवश्यक आहे. त्यानंतर संबंधित लाभार्थी ऑनलाइन पद्धतीने अर्ज करू शकतात. अर्ज प्रक्रिया पूर्ण झाल्यानंतर पात्र लाभार्थ्यांच्या खात्यात थेट आर्थिक मदत जमा केली जाईल.
नोंदणी करण्यासाठी इच्छुक लाभार्थ्यांनी [https://divyangsahayakportal.maharashtra.gov.in] या अधिकृत संकेतस्थळावर जाऊन अर्ज करावा लागेल.
2011 च्या जनगणनेनुसार महाराष्ट्रात सुमारे 29 लाख 63 हजार दिव्यांग व्यक्ती आहेत. या सर्वांसाठी विविध योजनांच्या माध्यमातून मदत केली जाते. जिल्हा वार्षिक योजनेतून निधी उपलब्ध करून दिला जातो तसेच सरकारी नोकरीमध्ये पदोन्नतीसाठी 4 टक्के आरक्षणाची तरतूदही करण्यात आली आहे.
या नव्या निर्णयामुळे राज्यातील हजारो दिव्यांगांना रोजगाराच्या नवीन संधी उपलब्ध होण्याची शक्यता व्यक्त केली जात आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.