मंत्रीमंडळातील वऱ्हाड निघालयं जळगावला!

मुंबई : मंत्रीमंडळाची बैठक, शिवसेनेच्या दोन नेत्यांची घरी लग्न, यामुळे आज महाविकास आघाडी सरकारमधील (Mahavikas Aghadi) नेते, मंत्री दिवसभर व्यग्र आहेत. आज मंत्रीमंडळाची महत्वपूर्ण बैठक आहे. या बैठकीत महत्वाचे निर्णय घेतले जाण्याची शक्यता आहे.

या बैठकीनंतर मंत्रीमंडळातील सगळे नेते, मंत्री दोन्ही लग्नाला उपस्थित राहणार आहेत. शिवसेनेच्या दोन्ही नेत्यांच्या घरी लगीनघाई सुरु आहे. सनई चौघाड्यांचे सूर घुमू लागले आहेत. लग्नाची सध्या लगबग सुरु आहे.

मंत्रीमंडळाच्या बैठकीनंतर शिवसेनेचे खासदार संजय राऊत यांची कन्या पूर्वशी हीच्या लग्नाला मंत्रीमंडळातील (Mahavikas Aghadi) नेते, मंत्री उपस्थित राहणार आहेत. त्यानंतर सगळे मंत्री, नेते हे जळगावला शिवसेनेचे मंत्री गुलाबराव पाटील यांच्या मुलाच्या लग्नाला चार वाजता चार्टर्ड विमानाने जाणार आहेत.

शिवसेनेचे नेते खासदार संजय राऊत (sanjay raut) यांची कन्या पूर्वशी (Purvashi) हीचा विवाह ठाण्याचे जिल्हाधिकारी राजेश नार्वेकर यांचे पुत्र मल्हार (Mahlar)यांच्यासोबत होत आहेत. मल्हार हे आयटी इंजीनियर आहेत. तसेच त्यांचा स्वतंत्र व्यवसाय आहे. तर, पूर्वशी राऊत या उच्चशिक्षित असून ‘ठाकरे’ चित्रपटाच्या निर्मात्या आहेत. सायन इथे त्यांचं ऑफिस आहे.

दुसरुकडे शिवसेनेचे आक्रमक नेते, राज्याचे पाणीपुरवठा मंत्री गुलाबराव पाटील (gulabrao patil) यांचे कनिष्ठ चिरंजीव विक्रम यांचा विवाह चोपडा तालुक्यातील सनफुले गावातील शेतकरी भगवान भिका पाटील यांची सुकन्या प्रेरणा हिच्यासोबत सोबत होत आहे. मंत्र्यांचा मुलगा आणि शेतकरी कुटुंबातील सून असा विवाह आज साध्या पद्धतीनं होत आहे. शेतकऱ्याची कन्या मंत्र्याची सून होणार, अशी चर्चा सध्या जळगाव जिल्ह्यात सुरु आहे.

राऊत यांची कन्या पूर्वशीच्या लग्नाआधी रविवारी मंगल विधी, संगीत कार्यक्रम पवईतील एका सप्ततारांकित हॉटेलमध्ये झाला, या कार्यक्रमासाठी राष्ट्रवादीच्या खासदार सुप्रिया सुळे, सदानंद सुळे, विविध क्षेत्रांतील मान्यवर उपस्थित होते.

सध्या पूर्वशी-मल्हार यांचा हळदी समारंभ, संगीत कार्यक्रमाचे फोटो सोशल मीडियावर चांगलेच व्हायरल झाले आहेत. मात्र, सध्या राऊत यांच्या कन्येची लग्नपत्रिका सर्वांचे लक्ष वेधून घेत आहे. या पत्रिकेवरील #PMkiShaadi (पीएम की शादी) हा हॅशटॅग सोशल मीडियावर चर्चेचा विषय ठरला आहे. ही लग्नपत्रिका सध्या चर्चेचा विषय ठरली आहे.

लग्न पत्रिकेमध्ये पूर्वशी आणि मल्हार यांचे इंग्रजीत नाव आहे. पूर्वशी (Purvashi) या इंग्रीजी नावातील पी (P) तसेच मल्हार (Mahlar) या नावातील एम (M) या अक्षरांना घेऊन हॅशटॅग तयार करण्यात आला आहे. या दोन्ही नावांच्या आद्यक्षरांना घेऊन लग्नपत्रिकेवर #PMkiShaadi असे छापण्यात आले आहे. त्यामुळे हा हॅशटॅग चर्चेचा विषय ठरला आहे.