Mahayuti Maharashtra politics : स्थानिक नेत्यांच्या स्वबळाच्या घोषणांना चाप बसणार: महायुतीकडून प्रत्येक जिल्ह्यात 3 मंत्र्यांवर जबाबदारी

Mumbai News : आगामी काळात होत असलेल्या स्थानिक स्वराज्य संस्थेच्या निवडणुकीत महायुती बळकट राहावी, यासाठी प्रयत्न केले जात आहेत. येत्या काळात महायुतीमधील भाजप, एकनाथ शिंदे यांची शिवसेना व अजित पवार यांच्या राष्ट्रवादी काँग्रेसमधील प्रत्येक जिल्ह्यातील तीन पक्षाच्या मंत्र्यांची समन्वय समिती नेमण्यात येणार आहे. ही समन्वय समिती स्थानिक स्वराज्य संस्थेच्या निवडणुकीबाबत सर्वच निर्णय घेणार आहे. त्यामुळे येत्या काळात स्वबळाच्या घोषणांना चाप बसणार आहे.

स्थानिक स्वराज्य संस्थांच्या निवडणुकीत महायुती टिकवण्यासाठी आता प्रत्येक जिल्ह्यात मंत्र्यांची समन्वय समिती नेमण्यात येणार आहे. यामध्ये भाजप (BJP), एकनाथ शिंदे यांची शिवसेना व अजित पवार यांच्या राष्ट्रवादी काँग्रेसचा प्रत्येक एक मंत्री मिळून तीन मंत्र्याची समन्वय समिती असणार आहे. प्रत्येक जिल्हानिहाय यामध्ये एक भाजप, एक शिवसेना आणि एक राष्ट्रवादी काँग्रेस असे तीन मंत्री समन्वयक म्हणून काम करणार आहेत.

येत्या काळात होत असलेल्या स्थानिकच्या निवडणुकीत महायुती टिकवण्याची जबाबदारी तीन मंत्र्यांवर असणार आहे. त्यामुळे येत्या काळात शक्यतो महायुतीच व्हायला हवी, अशी भूमिका घेत तीन पक्षाच्या समन्वय समितीने बैठकीत एक रणनीती निश्चित केली आहे. त्यानुसार स्थानिक पालकमंत्री आणि अन्य दोन पक्षांचे संपर्क मंत्री अशा तिघांची समिती प्रत्येक जिल्ह्यात महायुतीने एकत्रितपणे लढावे, यासाठी प्रयत्न करणार आहे.

त्यासोबतच येत्या काळात महायुतीतील (Mahayuti) मित्रपक्षांमध्ये कुठेही मतभेद आणि मनभेद होणार नाही, याची काळजी घेण्याबाबत स्पष्ट करण्यात आले आहे. महायुती म्हणून एकत्रित काम करीत असताना एकमेकांवर टीका टिपण्णी टाळण्याचे आवाहनही महायुतीमधील तीन पक्षांच्या नेत्यांना करण्यात आले आहे.

गेल्या काही दिवसापासून महायुतीमधील एका पक्षाचा नेता स्वबळावर निवडणूक लढण्याची घोषणा करतो. त्यामुळे त्याठिकाणचे वातावरण खराब होत आहे. त्यासोबतच महायुतीमधील तीन पक्षात समन्वय नसल्याचे स्पष्ट होत आहे. त्यामुळे हा सर्व प्रकार टाळण्यासाठी प्रयत्न केले जाणार आहेत. त्यामुळे याकडे सर्वांचे लक्ष लागले आहे.