मालेगावच्या महापालिकेत पुन्हा एकदा टिपू सुलतान यांचा फोटो लावण्यात आल्याचे ऑगस्ट महिन्यात समोर आले होते. त्यामुळे शहरात वातावरण तापले होते. आता तब्बल महिन्याभराच्या कालावधीनंतर उपमहापौर शान-ए-हिंद निहाल अहमद यांचं दालन खुले झाले आहे. यानंतर प्रशासनाच्या सूचनेनंतर उपमहापौर दालनातील टिपू सुलतानचा फोटो हटवण्यात आला आहे. विशेष म्हणजे उपमहापौरांनी आपल्या टेबलवर संविधानाची मूळ प्रत काचेच्या बॉक्समध्ये फ्रेम केल्याचं पाहायला मिळालं.
राष्ट्रवादी काँग्रेस शरदचंद्र पवार पक्षाचे राष्ट्रीय सरचिटणीस जितेंद्र आव्हाड यांच्या नेतृत्वाखाली ठाण्यात मुख्य निवडणूक आयुक्त ज्ञानेशकुमार यांची प्रतिकात्मक गाढवावरून प्रतिकात्मक धिंड काढण्यात आली. त्यात आयोगाच्या निर्णयावर निवडणूक आयुक्त सुखबीर सिंग संधू आणि विवेक जोशी यांनी तब्बल 14 वेळा आक्षेप नोंदवूनही ज्ञानेश कुमार यांनी हुकूमशाही पद्धत राबवत लोकशाहीचा खून केला असा घणाघाती आरोप आव्हाड यांनी यावेळी केला.
महाराष्ट्र लोकसेवा आयोगाने 3 ऑक्टोबर 2026 पासून आयोजित केलेल्या विविध मुख्य परीक्षा पुढे ढकलली आहे. आयोगाने राज्य सेवा मुख्य परीक्षा 2025 च्या उत्तरपत्रिकांचे पुनर्मूल्यांकन करण्याचा निर्णय घेतला आहे. परीक्षा पद्धतीबाबत राज्य शासनाने गठित केलेल्या उच्चस्तरीय समितीच्या शिफारशीही लवकरच अपेक्षित आहेत. या सर्व पार्श्वभूमीवर विद्यार्थी संघटना, पालक आणि लोकप्रतिनिधींनी केलेल्या मागण्यांचा विचार करून आयोगाने ‘राज्य सेवा मुख्य परीक्षा-2026’, ‘महाराष्ट्र स्थापत्य अभियांत्रिकी मुख्य परीक्षा-2026’ आणि ‘महाराष्ट्र गट-ब (अराजपत्रित) मुख्य परीक्षा-2026’ पुढे ढकलण्याचा निर्णय घेतला आहे.
पुणे : महापालिकेतर्फे ९० कोटी रुपयांचा नवीन रस्ता केला जात असताना सत्तधारी भाजपच्या आमदारांचा लाडका ठेकेदार पात्र होत नसल्याने त्यावरून अनेक महिने निर्णय प्रलंबित होता. यावर आयुक्तांनी अखेर निर्णय घेतल्यानंतर या आमदारांनी आयुक्तांना थेट अँट्रिसिटीचा गुन्हा दाखल करेन अशी धमकी दिली आहे. तर पथ विभागातील अधिकाऱ्यांना विधानसभेत हक्कभंग आणल्यावर तुम्हाला कळेल अशी धमकी दिल्याने प्रशासनात अस्वस्थता निर्माण झाली आहे.
कात्रज : पुणे जिल्हा दूध उत्पादक संघाची ६७ वी वार्षिक सर्वसाधारण सभा सोमवारी (ता. २८) अण्णाभाऊ साठे सभागृहात पार पडली. आर्थिक वर्ष २०२५-२६ मध्ये संघाने ३८७ कोटी रुपयांची उलाढाल केली असून, संघाला एक कोटी पाच लाख ५७ हजार रुपयांचा निव्वळ नफा झाला आहे. सभेच्या प्रारंभी व्यवस्थापकीय संचालक मनोज लिमये यांनी उपस्थितांचे स्वागत केले. संघाचे अध्यक्ष अरुण चांभारे यांनी अहवाल वर्षातील संघाच्या कामकाजाचा आणि प्रगतीचा आढावा घेतला. आर्थिक वर्ष २०२५-२६ चे व्यापारी पत्रक, नफा-तोटा पत्रक, नफा वाटणी, वार्षिक अहवाल, लेखापरीक्षण अहवाल, अंदाजपत्रक तसेच लेखापरीक्षकांच्या नियुक्तीसह विविध विषय सभेत चर्चेस घेण्यात आले. चर्चेनंतर संबंधित विषयांना मंजुरी देण्यात आली.
पालघरच्या रिलीफ रुग्णालयातील राडा प्रकरणात न्यायालयीन कोठडीत असलेल्या २३ आरोपींपैकी सहा जणांच्या जामीन अर्जावरील निर्णय पुन्हा एकदा लांबणीवर पडला आहे. सोमवारी निर्णय अपेक्षित असताना डोंबिवलीतील डॉक्टर मारहाण प्रकरणात सर्वोच्च न्यायालयाने नगरसेवक रमेश म्हात्रे यांचा जामीन रद्द केल्याच्या घडामोडीचा संदर्भ पालघर न्यायालयात देण्यात आला. या पार्श्वभूमीवर न्यायालयात दोन्ही बाजूंकडून प्रतिज्ञापत्र दिल्यानंतर सहा आरोपींच्या जामीन अर्जावर मंगळवारी (ता. २९) निर्णय देण्याचे न्यायालयाकडून स्पष्ट केले गेले.
नाशिक जिल्हा मध्यवर्ती सहकारी बँकेच्या वार्षिक सर्वसाधारण सभेत निफाड सहकारी साखर कारखान्याच्या सध्या स्थितीचा मुद्दा जिल्हा प्रशासनाच्या समोर सभासदांनी मांडला. मात्र ऐनवेळी उपस्थित होणाऱ्या प्रश्नांवर सर्वसाधारण सभेत चर्चा न करता सभा आटोपती घेतल्याने सभासद आणि जिल्हा बँकेचे प्रशासक यांच्यात गदारोळ झाल्याच्या पाहायला मिळाले. मंत्री नरहरी झिरवाळ हे देखील यावेळी उपस्थित होते. मंत्री नरहरी झिरवाळ यांच्यासमोर देखील सभासदांनी निफाड सहकारी साखर कारखान्याच्या सध्या स्थितीचा मुद्दा उपस्थित केला. मात्र या सर्व साधारण सभेत प्रशासन चर्चेला तयार झाले नसल्याने सभासदांनी मंत्री झिरवाळ आणि जिल्हा बँकेचे प्रशासक यांना घेरण्याचा प्रयत्न केला.
राज्यात कोरडा दुष्काळ जाहीर झाल्यानंतर शेतकऱ्यांना शासनाकडून मिळणाऱ्या मदतीसाठी आवश्यक कागदपत्रांची पूर्तता करताना अडचणी येऊ नयेत, यासाठी ठाकरे गटाच्या वतीने अमरावतीत कृषी उत्पन्न बाजार समिती परिसरात शेतकरी मदत कक्ष सुरू करण्यात आला आहे. या मदत कक्षाचे उद्घाटन खासदार अरविंद सावंत, आमदार नितीन देशमुख आणि आमदार गजानन लवटे यांच्या हस्ते करण्यात आले. यावेळी दुष्काळग्रस्त शेतकऱ्यांना शासनाच्या विविध योजनांचा लाभ मिळवून देण्यासाठी हा कक्ष महत्त्वाची भूमिका बजावणार असल्याचे सांगण्यात आले.
दुष्काळाच्या पार्श्वभूमीवर शासकीय अधिकारी कर्मचाऱ्यांच्या सुट्ट्या रद्द करण्यात आल्या आहेत. प्रशासनातील जिल्हाधिकारी ते विद्युत विभागाचे कर्मचारी गावात थांबले पाहिजेत अशा सक्त सूचना महसूल मंत्री चंद्रशेखर बावनकुळे यांनी दिल्या आहेत. जनावरांच्या छावण्या व पिण्याच्या पाण्याचा प्रश्न गंभीर होणार असल्याने त्यासाठी देखील प्रशासनाने नियोजन करावे असे आदेश बावनकुळे यांनी दिले आहेत. ते हिंगोलीच्या कळमनुरी तालुक्यातील आराठी गावाजवळ कोरड्या दुष्काळ आणि नुकसान झालेल्या पिकांची पाहणी करण्यासाठी दाखल झाले होते.
सातारा जिल्ह्यातील कोरेगाव तालुक्याला शासनाच्या दुष्काळी यादीतून वगळण्यात आल्यामुळे स्थानिक शेतकऱ्यांमध्ये तीव्र संताप उसळला असून ते आक्रमक झाले आहेत. पावसाअभावी कोरेगाव परिसरात सोयाबीनसह खरीप पिके पूर्णपणे करपून वाळली असून, हाती आलेली पीके काढणीचा खर्चही निघण्यासारखा राहिलेला नाही. आजूबाजूच्या शेजारच्या तालुक्यांचा दुष्काळ यादीत समावेश करण्यात आला असताना, कोरेगाववरच अन्याय का, असा संतप्त सवाल येथील शेतकऱ्यांनी उपस्थित केला आहे. पिण्याच्या आणि शेतीच्या पाण्याच्या भीषण टंचाईमुळे परिस्थिती अत्यंत बिकट झाली आहे. या पार्श्वभूमीवर मुख्यमंत्री तसेच पालकमंत्र्यांकडे निवेदनाद्वारे परिस्थिती मांडण्यात आली आहे. शासनाने कोरेगाव तालुक्याची गंभीर स्थिती लक्षात घेऊन तात्काळ हा तालुका दुष्काळग्रस्त म्हणून घोषित करावा, अशी आक्रमक मागणी शेतकऱ्यांनी केली आहे.
कोकणातील शेतजमिनीच्या खरेदी-विक्रीच्या मुद्द्यावरून नवा वाद सुरू झाला असून ठाकरेंच्या शिवसेनेचे खासदार संजय राऊत आणि भाजप मंत्री नितेश राणे यांच्यात आरोप-प्रत्यारोप सुरू झाले आहेत. राऊत यांनी कोकणातील मंत्री परप्रातियांचे दलाल असल्याचा आरोप केल्यानंतर हे प्रकरण चांगलेच तापले आहे. तर नितेश राणे यांनी संजय राऊतांवर टीका करताना राऊतांनी आपली भूमिका स्पष्ट करावी, असे आवाहन दिले आहे.
पंढरपूर येथे झालेल्या दुष्काळी मोर्चा नंतर भाजप आणि राष्ट्रवादी शरद पवार गटांमध्ये जोरदार राजकीय टोलेबाजी सुरू झाली आहे. माळ्याचे खासदार धैर्यशील मोहिते पाटील यांनी सोलापूरला चांगला पालकमंत्री द्यावा अशी मागणी करत जयकुमार गोरे यांच्यावर निशाणा साधला होता. त्यावर माळशिरसचे भाजपचे माजी आमदार राम सातपुते यांनी जोरदार पलटवार केला आहे. त्यांनी, पतसंस्था बुडवून संचालक बदलणे इतके पालकमंत्री बदलणे सोपे नाही अशा शब्दात मोहिते पाटलांना सुनावले आहे.
अमरावतीत ठाकरेसेनेनं मोर्चा काढलाय. शेतकरी कर्जमाफीसह हेक्टरी 1 लाखांच्या मदतीची ठाकरेसेनेनं केलीय. मोर्चात हजारो शेतकरी आणि ठाकरे सेनेचे कार्यकर्ते सहभागी झालेयत. खासदार अरविंद सावंत आणि आमदार नितीन देशमुख यांच्या नेतृत्वात मोर्चा मोर्चा काढण्यात आलाय. कोरडा दुष्काळ जाहीर करून राज्य सरकारने शेतकऱ्याची थट्टा केली असून, शेतकऱ्यांना सरसकट हेक्टरी एक लाख रुपये नुकसान भरपाई द्यावी, कर्जमाफी करावी, तसेच दुष्काळग्रस्त परिस्थितीत तातडीने आर्थिक मदत करावी, अशी मागणी केलीय. इर्विन चौक ते जिल्हाधिकारी कार्यालयावर हा मोर्चा काढलाय.
दुष्काळाच्या पार्श्वभूमीवर पुणे विद्यापीठानं मोठा निर्णय घेतलाय.. विद्यापीठातील मेसमधील दरवाढ विद्यापीठाकडून रद्द करण्यात आलीय... तर परीक्षा शुल्क माफीचाही विद्यापीठानं निर्णय घेतलाय...
विलिनीकरणासंदर्भात शरद पवारांनी महत्त्वपूर्ण विधान केलंय. यायचं असेल तर आमच्यात या, आम्ही कुणासोबतही जाणार नाही असं पवारांनी पक्षाच्या बैठकीत म्हटलंय. मुंबईत यशवंतराव चव्हाण सेंटरमध्ये झालेल्या पक्षाच्या बैठकीत हे वक्तव्य केलंय. तर सुप्रिया सुळेंनीही विरोधात बसणं जास्त योग्य असल्याचं म्हटलंय.
SIR आणि मतदार यादीच्या पुनरीक्षणाच्या मुद्द्यावरून काँग्रेसने मुख्य निवडणूक आयुक्त ज्ञानेश कुमार यांच्याविरोधात राज्यभर आंदोलनाची हाक दिली आहे. नाशिकमध्येही कॉंग्रेसच्या वतीने निवडणूक आयुक्तांविरोधात आंदोलन करण्यात आलं. यावेळी कॉंग्रेस कार्यकर्त्यांनी आयुक्त ज्ञानेश कुमार यांच्या प्रतिकात्मक पुतळ्याचे दहन केले.
महाराष्ट्रातील दुष्काळी परिस्थितीच्या पार्श्वभूमीवर शरद पवार यांनी दुष्काळाच्या संकटाकडे गांभीर्याने पाहण्याची भूमिका मांडली आहे. शेतकऱ्यांचं मोठं नुकसान झालं असून, दुष्काळग्रस्तांना तातडीने मदत मिळण्याची गरज असल्याचं पवार यांनी म्हटलं आहे. दुष्काळाचं संकट हे राजकारण करण्याचं नाही, तसेच सरकारने काही निर्णय घेतले ते पुरेसे नाही असेही ते म्हणाले. महाराष्ट्रातील दुष्काळी परिस्थितीच्या पार्श्वभूमीवर सरकार शेतकरी आणि ग्रामीण भागासाठी नवीन निर्णय घेईल, अशी अपेक्षा शरद पवार यांनी व्यक्त केली आहे.
देवेंद्र फडणवीसांच्या मतदारसंघात अवघ्या पाच महिन्यांत ८% मतदार वाढल्याचा प्रश्न राहुल गांधींनी उपस्थित केला. या प्रश्नामुळेच फडणवीसांनी राहुल गांधींचा धसका घेतला आहे, असे काँग्रेसचे प्रदेशाध्यक्ष हर्षवर्धन सपकाळ यांनी सोशल मीडियात केलेल्या पोस्टमध्ये म्हटले आहे.
राष्ट्रवादी काँग्रेस शरदचंद्र पवार पक्षाची राज्यस्तरीय बैठक मुंबईत सुरू आहे. बैठकीत मार्गदर्शन करताना पक्षाचे राष्ट्रीय अध्यक्ष शरद पवार म्हणाले, शेतकऱ्यांवर संकट आले आहे. सरकारने तातडीने निर्णय घेत दिलासा द्यावा. आम्हाला प्रश्न सोडवायचे आहेत, राजकारणात रस नाही. मुख्यमंत्र्‍यांना आम्ही नवा प्रस्ताव पाठविला आहे. त्यानुसार सरकार नवे निर्णय घेईल, अशी अपेक्षा शरद पवार यांनी व्यक्त केली.
डोंबिवलीतील शास्त्रीनगर रुग्णालयातील डॉक्टर आणि वैद्यकीय कर्मचाऱ्यांवरील कथित मारहाण प्रकरणात शिवसेना नगरसेवक रमेश म्हात्रे यांना सर्वोच्च न्यायालयाने धक्का दिला आहे. मुंबई उच्च न्यायालयाने मंजूर केलेला जामीन सुप्रीम कोर्टाने रद्द केला. तसेच म्हात्रे यांना तीन दिवसांत आत्मसमर्पण करण्याचे निर्देश न्यायालयाने दिले आहेत.
शिवसेना पक्षप्रमुख उद्धव ठाकरे आणि महाराष्ट्र नवनिर्माण सेना अध्यक्ष राज ठाकरे यांची मंगळवारी, 29 सप्टेंबर रोजी संयुक्त पत्रकार परिषद होणार आहे. सकाळी 11.30 वाजता शिवाजी पार्क येथील शिवतीर्थावर ही पत्रकार परिषद आयोजित करण्यात आली आहे. या वेळी दोन्ही नेते कोणती भूमिका मांडतात, याकडे राजकीय वर्तुळाचे लक्ष लागले आहे.
मुंबई पोलिसांनी 2 ऑक्टोबरला होणाऱ्या CJPच्या प्रस्तावित आंदोलनाला परवानगी नाकारली. त्यानंतर CJPचे संस्थापक अभिजीत दीपके यांनी मुंबईत ‘जेल भरो आंदोलन’ करण्याची घोषणा केली. मुख्य निवडणूक आयुक्त ज्ञानेश कुमार यांच्या राजीनाम्याची मागणी तसेच निवडणूक आयोग आणि SIRच्या मुद्द्यावरून हे आंदोलन करण्यात येणार असल्याचं CJPकडून सांगण्यात आलं.
गोकुळ दूध संघाचे माजी अध्यक्ष अरुण डोंगळे यांनी महायुतीमध्ये ए वाय पाटील घेऊ नये, आमच्या शिवाय दुसऱ्यांचा विचार झाल्यास आम्हाला गृहीत धरू नये असा इशारा डोंगळे यांनी दिला होता. मात्र डोंगळे यांच्या या इशाऱ्याला भीक न घालता वैद्यकीय शिक्षण मंत्री हसन मुश्रीफ यांनी जिल्हा बँकेचे संचालक ए.वाय. पाटील यांना राष्ट्रवादी काँग्रेसमध्ये घेतले आहे. आज ए. वाय. पाटील यांनी राष्ट्रवादी काँग्रेसला गोकुळ दूध संघाच्या निवडणुकीच्या निमित्ताने पाठिंबा दिला आहे. जिल्हाध्यक्ष बाबासाहेब असुर्लेकर यांच्या उपस्थितीत पाठिंबा स्वीकारण्यात आला. ए वाय पाटलांच्या या निर्णयामुळे काँग्रेसने आमदार सतेज पाटील यांना धक्का समजला जातो.
मुख्य निवडणूक आयुक्त ज्ञानेश कुमार यांच्या नेतृत्वाखाली निवडणूक आयोगाने घेतलेल्या काही निर्णयांबाबत तसेच प्रशासकीय प्रक्रियांबाबत दाखल करण्यात आलेल्या याचिकेची आज मुंबई उच्च न्यायालयाच्या कोल्हापूर खंडपीठासमोर तातडीने उत्पादन व सूचीबद्ध करण्यासाठी ॲड. असीम सुहास सरोदे यांनी बाजू मांडली. न्या. शर्मिला देशमुख आणि न्या. नीरज धोटे यांच्या खंडपीठासमोर या प्रकरणाचा उल्लेख करण्यात आला. न्यायालयाने निरीक्षण नोंदवले की, या प्रकरणात जीवन जगण्याचा व स्वातंत्र्याशी संबंधित तातडीचा मुद्दा नाही. तसेच न्यायालयाच्या व्यस्ततेचा विचार करून हे प्रकरण २२ ऑक्टोबर २०२६ रोजी घेण्यात येईल, असे न्यायालयाने सांगितले.
भारताचे मुख्य निवडणूक आयुक्त ज्ञानेश कुमार यांच्याविरोधात काँग्रेस आक्रमक झाल्याचं पाहायला मिळत आहे. काँग्रेसकडून पुणे नागपूरसह कोल्हापुरात मोर्चाचं आयोजन करण्यात आलं आहे. आंदोलकांकडून कुमार यांच्या राजीनाम्याची मागणी केली जात आहे.
ठाणे पोलिसांच्या अनैतिक मानवी वाहतूक प्रतिबंधक कक्षाने पोलिसा वागळे इस्टेटमध्ये सेक्स रॅकेटचा पर्दाफाश केला आहे. पोलिसांनी वागळे इस्टेट परिसरातील बार अँड रेस्टॉरंटमध्ये सापळा लावून हिंदी वेबसिरीज आणि भोजपुरी चित्रपटांमध्ये काम केलेल्या अभिनेत्रीला अटक केली आहे.
खासदार संजय राऊत यांनी अन्न व औषध प्रशासन विभागाचे आयुक्त तुकाराम मुंढे यांना एक पत्र लिहले आहे. या पत्रात संजय राऊत यांनी अन्न व सुरक्षा भेसळ याबाबतच्या कारवाईबाबत अभिनंदन करत FDA अधिकाऱ्यांकडून सुरू असलेल्या लुटीबाबत तात्काळ कारवाईच्या मागणी केली आहे.
राज्यातील विद्यापीठे आणि महाविद्यालयांमध्ये विद्यार्थी निवडणुका पुन्हा सुरू करण्याच्या दृष्टीने राज्य सरकारने महत्त्वाचे पाऊल उचलले आहे. विद्यार्थी परिषदांची स्थापना आणि निवडणुकांची कार्यपद्धती निश्चित करण्यासाठी उच्च व तंत्र शिक्षण विभागाने १२ सदस्यीय उच्चस्तरीय तज्ज्ञ समिती स्थापन केली आहे. मुंबई विद्यापीठाचे माजी कुलगुरू डॉ. सुहास पेणेकर यांच्या अध्यक्षतेखाली ही समिती काम करणार असून, महिनाभरात शासनाला अहवाल सादर करण्याचे निर्देश देण्यात आले आहेत.
सांगली जिल्हा मध्यवर्ती बँकेच्या निवडणुकीसाठी इच्छुकांनी अर्ज भरावेत. मात्र, पक्षाने आदेश दिल्यानंतर मागे घ्यावेत, ज्यांना तिकडून उभारायचे आहे त्यांनी इकडच्या पद, सदस्यत्वाचा राजीनामा द्यावा, असा थेट इशारा भाजपचे ज्येष्ठ नेते, पालकमंत्री चंद्रकांत पाटील यांनी आज दिल्याचे समजते. शिवाय भाजप आणि महायुतीतील घटक पक्ष एकत्रितपणे निवडणुकीला समोर जातील असेही पाटील यांनी जाहीर केले.
देशभरातील बँकांचे कर्मचारी आज 28 सप्टेंबरपासून संपावर जाणार होते. मात्र, हा तीन दिवसांचा संप मागे घेण्यात आला आहे.
भाजपचे अहिल्यानगरमधील नेते डॉ. राजेंद्र पिपाडा यांची सोशल मीडियावर राजकीय कट रचून बदनामी केल्याप्रकरणी सहा जणांविरोधात गुन्हा दाखल करण्यात आला. हरिभाऊ गाडेकर, भाऊसाहेब ऊर्फ मुन्ना सदाफळ, कैलास विठ्ठल सदाफळ, संजय रामचंद्र सदाफळ, विजय डी. सदाफळ व प्रवीण रमणलाल रुणवाल यांच्यासह इतर काही जणांविरुद्ध राहाता पोलिस ठाण्यात गुन्हा दाखल करण्यात आला.
अकोला जिल्ह्यात दुष्काळ जाहीर होऊन एक दिवस उलटत नाही तोच कर्जाच्या ओझ्याखाली दबलेल्या 65 वर्षीय शेतकऱ्याने आत्महत्या केली. ही घटना बार्शीटाकळी तालुक्यातील सिंदखेड मोरेश्वर येथे रविवारी समोर आली. देविदास लक्ष्मण सोळंके असे मृत शेतकऱ्याचे नाव आहे. आर्थिक संकट, दुबार पेरणीचा खर्च आणि पावसाअभावी हातचे गेलेले पीक यामुळे ते विवंचनेत होते.
अमरावती जिल्ह्यातील भातकुली येथील मातोश्री गौराबाई गुढे अनुदानित आदिवासी आश्रमशाळेतील पाचवीत शिकणाऱ्या विद्यार्थिनीचा हृदय बंद पडल्यामुळे उपचारादरम्यान खासगी रुग्णालयात मृत्यू झाला. प्रिया गणेश मावस्कर (वय 11, रा. राणीगाव, ता. धारणी) असे मृत विद्यार्थिनीचे नाव आहे. शवविच्छेदनास पालकांनी नकार दिला. आदिवासी विभागाकडून पालकांना सानुग्रह अनुदान देण्यात आले.
घाटकोपर-वर्सोवादरम्यान मेट्रोचे संचलन करणाऱ्या मुंबई मेट्रो वन प्रायव्हेट लिमिटेडने व्यवस्थापन आणि माहिती सुरक्षेच्या क्षेत्रात ऐतिहासिक कामगिरी करत एकाच वेळी चार प्रतिष्ठित आयएसओ प्रमाणपत्रे मिळवली आहेत. या कामगिरीसह मुंबई मेट्रो वन ही इंटिग्रेटेड मॅनेजमेंट सिस्टीम (आयएमएस) आणि इन्फॉर्मेशन सिक्युरिटी मॅनेजमेंट सिस्टीम (आयएसएमएस)चे एकात्मिक प्रमाणपत्र मिळवणारी देशातील पहिली मेट्रो ठरली आहे.
ठाणे जिल्ह्यातील मुरबाड तालुक्यातील गोरखगड परिसरात रस्ता चुकलेल्या तिघांची पोलिसांनी सुखरूप सुटका केली. ट्रेकिंगसाठी आलेले तिघे परतीच्या मार्गावरील रस्ता चुकल्याने जंगलात भरकटले होते. यात एक तरुण आणि दोन तरुणींचा समावेश होता. अंधार पडल्याने त्यांना बाहेर पडण्याचा मार्ग सापडत नव्हता.
नाशिक जिल्ह्यातील सिन्नरच्या औद्योगिक विकासाला चालना देण्यासाठी मुसळगाव येथे 300 एमव्हीए क्षमतेचे नवीन वीज पारेषण उपकेंद्र उभारण्यात येणार आहे. या उपकेंद्राचे भूमिपूजन शनिवारी झाल्याने त्याच्या उभारणीला वेग येणार असून, येथील उद्योगांना पुरेशा दाबाने मुबलक वीज उपलब्ध होणार आहे. मुसळगाव येथे टॅरिफ बेस्ड कॉम्पिटिटिव्ह बिडिंग अंतर्गत 220/132/33 के.व्ही. क्षमतेचे हे वीज उपकेंद्र उभारले जाणार आहे.
गंगोत्री-गोमुख ट्रेकदरम्यान पाय घसरल्याने कर्जत येथील व्यापारी खोल दरीत पडल्याची दुर्घटना घडली. रामकुमार हनुमान गुप्ता (वय 65) असे व्यापाऱ्याचे नाव असून, प्रतिकूल हवामान आणि हिमवृष्टीच्या पार्श्वभूमीवर राज्य आपत्ती प्रतिसाद दल (एसडीआरएफ) आणि स्थानिक यंत्रणांकडून त्यांचा शोध सुरू आहे.
राज्यात भीषण दुष्काळी परिस्थितीत शेतकऱ्यांना मदतीचा हात देण्यासाठी शेगाव येथील श्री गजानन महाराज संस्थान पुढे आले आहे. संस्थानच्यावतीने मुख्यमंत्री साहाय्यता निधीस एक कोटी 11 लाख रुपयांचा भरीव सहयोग निधी सुपूर्द करण्यात आला आहे. मुख्यमंत्री देवेंद्र फडणवीस यांच्याकडे धनादेश सुपूर्द करण्यात आला.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.