विदर्भातील चंद्रपूरमध्ये तीव्र दुष्काळी परिस्थिती निर्माण झाली आहे. याच पार्श्वभूमीवर, जिल्हाधिकारी यांनी जिल्ह्यातील शासकीय विभागातील अधिकारी आणि कर्मचाऱ्यांसाठी नो लीव्ह धोरण लागू करण्यात आले आहे.
राष्ट्रवादी काँग्रेस शरदचंद्र पवार पक्षाचे नितेश कराळे गुरुजी हे नागपूर पदवीधर मतदारसंघाच्या निवडणुकीत अपक्ष उभे राहण्याची शक्यता आहे. आपण येत्या 5 ऑक्टोबर रोजी नागपूर येथे उमेदवारी अर्ज दाखल करणार आहोत, असे नितेश कराळे यांनी सांगितले आहे.
मुख्य निवडणूक आयुक्त ज्ञानेश कुमार आणि एसआयआरच्या मुद्यावरुन 4 ऑक्टोबरला राज ठाकरे आणि उद्धव ठाकरे हे मुंबईत मोर्चा काढणार आहेत. या मोर्चावर आता एकनाथ शिंदेंच्या शिवसेनेचे नेते आणि माजी मंत्री रामदास कदम यांनी भाष्य केलं आहे. ते म्हणाले, राज ठाकरे आणि उद्धव ठाकरे महाराष्ट्राची करमणूक करत असून नौटंकीच्या माध्यमातून दिशाभूल करत आहे. एक दिवस दूध का दूध पाणी का पाणी होईल, असंही कदम यावेळी म्हणाले.
बीड : परदेशात लाखो रुपयांच्या पगाराचे आमिष दाखवून सायबर गुन्हेगारांच्या जाळ्यात ओढणाऱ्या आंतरराष्ट्रीय रॅकेटचा बळी ठरलेल्या बीड जिल्ह्यातील नांदुरघाट (ता. केज) येथील स्वप्नील काळुंके या तरुणासह महाराष्ट्रातील ३२ तरुणाचे म्यानमारमधील सायबर अड्ड्यांवरून सुरक्षित सोडवण्यासाठी राजनैतिक पातळीवर वेगवान हालचाली सुरू झाल्या आहेत. म्यानमार सरकार आणि भारतीय दूतावासाच्या संयुक्त विद्यमाने विशेष रेस्क्यू ऑपरेशन राबवून या सर्वांना सुखरूप भारतात आणले जाणार आहे.
पुणे : गणेशोत्सवाच्या काळात शहरात कोट्यवधी रुपयांच्या गुटख्याची अवैध विक्री झाली असून, त्याकडे दुर्लक्ष केले जात आहे. या माफियांवर गुन्हे दाखल करून मोक्का लावावा या मागणीसाठी आज (ता. ३) महाराष्ट्र नवनिर्माण सेनेने कर्वे रस्त्यावर नळस्टॉप चौकात आंदोलन करत गुटखा माफियांच्या प्रतीकात्मक पुतळ्याचे दहन केले.
पुणे : महाराष्ट्र लोकसेवा आयोगाच्या (एमपीएससी) परीक्षा पद्धतीत वारंवार होणाऱ्या बदलांच्या शक्यतेमुळे विद्यार्थ्यांमध्ये तीव्र असंतोष निर्माण झाला आहे. केवळ रस्त्यावरील गर्दीच्या दबावाखाली येऊन नवीन वर्णनात्मक पद्धत रद्द करून पुन्हा वस्तुनिष्ठ पद्धत आणण्याच्या हालचालींना विद्यार्थ्यांनी कडाडून विरोध केला आहे. ‘‘आम्ही प्रयोगशाळेतले उंदीर नाही. जर गर्दीच्या मागणीवरूनच अभ्यासक्रम ठरणार असेल, तर थेट चिठ्ठ्या टाकूनच अधिकारी निवडा,’’ असा संतप्त सवाल करत एमपीएससी परीक्षार्थींनी पुण्यातील टिळक चौकात ठिय्या आंदोलन सुरू केले आहे.
पुणे शिक्षक मतदारसंघाची जागा भारतीय जनता पक्षाच्या वाट्याला गेली आहे. भाजपकडून कौस्तुभ गावडे यांना उमेदवारी जाहीर झाली आहे. त्यांनी श्री विवेकानंद स्वामी शिक्षण संस्थेच्या माध्यमातून पुणे शिक्षक मतदारसंघात काम केले आहे. आपण शिक्षकांना आश्वासन नाही तर जाहीरनामा देणार आहे.
येत्या दोन ते तीन दिवसांत मोसमी वारे (मॉन्सून) राज्यातून निरोप घेणार असल्याची माहिती भारतीय हवामान विभागाकडून देण्यात आली आहे. मुंबईसह संपूर्ण महाराष्ट्रातून मॉन्सून परतणार असल्याने शेतकऱ्यांपुढील चिंता वाढली आहे. परतीचा मॉन्सून तरी बरसेल अशी अपेक्षा त्यांना होती. मात्र, मॉन्सून न बरसताच निरोप घेत असल्याने दुष्काळाची दाहकता आणखी तीव्र होण्याची शक्यता आहे.
पुणे पदवीधर मतदारसंघातून निवडणूक लढविण्यासाठी इच्छूक असलेले राष्ट्रवादी काँग्रेसचे कोल्हापूरमधील नेते भैया माने यांनी आज मंत्री हसन मुश्रीफ यांची भेट घेतली आहे. त्या भेटीत मुश्रीफ यांनी ‘मी महायुतीमध्ये असल्याने तुला मदत करू शकत नाही,’ असे सांगितल्याचे माने यांनी स्पष्ट केले.
केंद्रीय निवडणूक मुख्य आयुक्त ज्ञानेशकुमार यांच्याविरोधात उद्या उद्धव ठाकरे आणि राज ठाकरे हे दोन्ही बंधू गर्जना मोर्चा काढणार आहेत. या मोर्चासाठी मनसेचे १५० हून अधिक जणांचे विशेष पथक तैनात असणार आहे. मोर्चाला गालबोट लागू नये, यासाठी मनसेची ही टीम काम करणार आहे, अशी माहिती आहे.
राष्ट्रवादी काँग्रेस शरदचंद्र पवार पक्षाचे नेते तथा नीतेश कराळे यांनी नागपूर पदवीधर मतदारसंघातून निवडणूक लढविण्यावर ठाम असल्याचे सांगितले. काहीही झाले तरी माघार घेणार नाही, असेही कराळे मास्तर यांनी स्पष्ट केले आहे. येत्या ५ ऑक्टोबर रोजी नीतेश कराळे यांनी नागपूर पदवीधर मतदारसंघातून उमेदवारी अर्ज भरणार असल्याचेही त्यांनी सांगितले आहे.
मराठा आंदोलक जरांगे पाटलांनी विरोधकांच्या आरोपांना जोरदार प्रत्युत्तर दिले आहे. महिनाभर उपोषणात असताना आपल्या घरची परिस्थिती हलाखीची होती, असे सांगत त्यांनी सहकाऱ्यांच्या चौकशीवर नाराजी व्यक्त केलीय. समाजाच्या लेकरांसाठी आपण हाल-अपेष्टा सहन केल्या आहेत. मात्र, कोणापुढेही शरण जाणार नाही, असं त्यांनी म्हटलयं.
अभिनेता अक्षय कुमारची बहीण अलका भाटिया यांची फसवणूक केलीय. बनावट सही करून पवईतला कोट्यवधींचा फ्लॅट हडपण्याचा प्रयत्न केलाय. मनसे विभागप्रमुख गणेश चुक्कल आणि त्याच्या साथीदाराला पवई पोलिसांनी अटक केलीय. 2021 मध्ये भाडेकरार संपल्यानंतर 30 वर्षांचा बनावट करार कोर्टात सादर केल्याप्रकरणी फॉरेन्सिक अहवालाच्या आधारे ही कारवाई केलीय. 5ऑक्टोबरपर्यंत दोघांनाही पोलिस कोठडी सुनावलीय.
महाराष्ट्राचे मुख्यमंत्री देवेंद्र फडणवीस हेच देशाचे पंतप्रधान नरेंद्र मोदी यांचे वारसदार आहेत. त्यांना आधी उपपंतप्रधान बनवावं, अशी संघाची भूमिका आहे. संघात तशी चर्चा सुरू आहे. येत्या तीन महिन्यात मोठ्या राजकीय घडामोडी घडणार आहेत, असा दावा ठाकरे गटाचे नेते संजय राऊत यांनी केला आहे.
पुणे पदवीधर मतदारसंघाच्या निवडणुकीसाठी महायुतीमध्ये राष्ट्रवादी काँग्रेस, भाजप आणि शिवसेनेकडून उमेदवारीसाठी रस्सीखेच सुरू आहे. राष्ट्रवादी काँग्रेसचे नेते आणि मंत्री हसन मुश्रीफ यांचे निकटवर्तीय मानले जाणारे प्रताप उर्फ भैय्या माने यांनी निवडणुकीच्या रिंगणात उतरण्याचा निर्णय घेतला आहे. ते स्वतंत्रपणे लढणार आहेत.
सोलापूर जिल्ह्यातील उजनी धरण परिसरात प्रस्तावित असलेल्या एआय डेटा सेंटरला राष्ट्रवादी काँग्रेस (शरदचंद्र पवार) पक्षाने तीव्र विरोध दर्शवला आहे. माढ्याचे खासदार धैर्यशील मोहिते पाटील यांनी शरद पवार यांची भेट घेऊन या प्रकल्पामुळे पाण्याचे दुर्भिक्ष, पर्यावरणाची हानी आणि स्थानिक शेतीवर होणाऱ्या दुष्परिणामांची माहिती दिली. स्थानिक शेतकऱ्यांचे हित लक्षात घेऊन हे डेटा सेंटर रद्द करण्याची मागणी करण्यात आली आहे.
भाजपच्या विधानपरिषद उमेदवारांची यादी आज जाहीर होण्याची शक्यता आहे. प्रदेशाध्यक्ष रवींद्र चव्हाण दिल्ली दौऱ्यावर असून, ते राष्ट्रीय अध्यक्ष नितीन नवीन यांची भेट घेणार आहेत.
पंतप्रधान नरेंद्र मोदी तीन नोव्हेंबरला बारामतीमध्ये येणार असल्याची माहिती शरद पवार यांनी दिली. येत्या ३ नोव्हेंबर रोजी पंतप्रधान मोदी बारामतीतील विद्या प्रतिष्ठानच्या परिसराला भेट देणार आहेत. या दौऱ्याच्या पार्श्वभूमीवर बारामतीतील प्रशासकीय तसेच राजकीय हालचालींना वेग आला आहे.
पुणे पदवीधर मतदारसंघात भैय्या माने यांची बंडखोरी केली आहे. माझ्या भविष्याच्या आड येऊ नये, असे सांगत भैय्या माने यांनी पदवीधर निवडणूक लढवण्याचा केला निर्धार. आज पासून माझा आणि भैया माने यांचा संबंध संपला. असे वैद्यकीय शिक्षण मंत्री हसन मुश्रीफ यांनी भैय्या माने यांच्या बंडखोरी नंतर प्रतिक्रिया देताना सांगितले.
महायुतीचा गोकुळमधील वाद स्थानिक पातळीवर सुटला नसल्याने सर्वपक्षीय नेत्यांना मुंबई गाठावी लागली. मुख्यमंत्री देवेंद्र फडणवीस यांच्या मार्गदर्शनाखाली तिढा सुटेल अशी अपेक्षा असताना आता आमदार सतेज पाटील यांनी मोठा गौप्यस्फ़ोट केला आहे. महायुतीमधील जागावाटपाचा तिढा मुंबईत देखील सुटत नसल्याने थेट सर्वपक्षीय नेते दिल्लीत जाणार असल्याचं खबळजनक दावा काँग्रेस नेते आमदार सतेज पाटील यांनी आज केला. ते कोल्हापुरात बोलत होते.
नाशिक पोलिसांनी दोन बांगलादेशी नागरिकांना ताब्यात घेतली आहे. गेले काही दिवस पाळत ठेवून ही कारवाई करण्यात आली. या अवैध वास्तव्य असलेल्या नागरिकांनी अन्य बांगलादेशी नागरिकांची कसून तपासणी सुरू आहे. बांगलादेशातून अवैध मार्गे भारतात प्रवेश केलेल्या दोन बांगलादेशी नागरिकांना पोलिसांनी अटक केली आहे. या दोघांनी बनावट कागदपत्र तयार करून गेली अनेक दिवस वास्तव्य केले होते. नाशिकच्या नवनाथ नगर भागातून त्यांना अटक करण्यात आली.
नांदेड-नागपूर महामार्गावर स्कूलबसचा भीषण अपघात झाला आहे. अर्धापूर तालुक्यात बोलेरो पिकप आणि स्कूल बसचा भीषण अपघात झाला. पिकपने स्कूल बसला पाठीमागून धडक दिल्याने ती बाजु्च्या खड्ड्यात पलटी झाली. या अपघातात चालकासह महिला आणि लहान मुलगी गंभीर जखमी झाले आहेत.
अभिजीत दीपके यांनी दिल्लीतील जंतर मंतर येथे आंदोलन करण्याची तारीख जाहीर केली आहे. मुख्य निवडणूक आयुक्त ज्ञानेश कुमार यांच्या राजीनाम्यासाठी हे आंदोलन होणार आहे.जर ज्ञानेश कुमार यांनी राजीनामा दिला नाही तर १० ऑक्टोबर रोजी देशभरातील 'काॅक्रोच' दिल्लीकडे कूच करतील आणि जंतर-मंतरवर आंदोलन करतील, असे ते म्हणाले.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.