तानाजी सावंत-ओमराजेंच्या कार्यकर्त्यांमध्ये उस्मानाबादमध्ये राडा

उस्मानाबाद : उस्मानाबाद (Osmanabad) जिल्हा नियोजन समितीच्या बैठकीत पालकमंत्री तानाजी सावंत (Tanaji Sawant) आणि शिवसेनेचे खासदार ओमराजे निंबाळकर (Omraje Nimabalkar) यांच्या कार्यकर्त्यांमध्ये मोठा राडा झाला. नियोजन समितीच्या सभागृहात प्रवकश देण्यावरून दोन्ही गट एकमेकांसमोर आले. अखेर पोलिसांनी हस्तक्षेप करत दोन्ही गटाच्या कार्यकर्त्यांना परिसरातून बाहेर काढले. (Activists of Tanaji Sawant and Omraje Nimabalkar came face to face in Osmanabad)

महाविकास आघाडीचे सरकार जाऊन मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांचे सरकार सत्तेवर आल्यानंतर उस्मानाबाद जिल्हा नियोजन समितीची बैठक प्रथमच नियोजन समितीच्या सभागृहात आयोजित करण्यात आली होती. या बैठकीसाठी शिंदे गट आणि ठाकरे गटाचे कार्यकर्ते मोठ्या संख्येने उपस्थित होते.

दरम्यान जिल्हाधिकारी कार्यालयाच्या आवारात पालकमंत्री डॉ. तानाजी सावंत येताच ते सभागृहाकडे वळले. त्यावेळी शिंदे गटाचे कार्यकर्ते सावंत यांच्यासोबत सभागृहात जाण्याचा प्रयत्न करत होते. पण, पोलिसांनी त्यांना रोखले. मात्र, काही काळानंतर ठराविक कार्यकर्त्यांना प्रवेश देण्याचा प्रयत्न सुरू झाला. त्यावेळी ठाकरे गटाच्या कार्यकर्त्यांनी त्यावर आक्षेप घेत आरडाओरड केली. चांगलीच तणावाची परिस्थिती तयार झाली होती. त्यामुळे पोलिसांनी सभागृहात कोणालाही प्रवेश दिला नाही.

सभागृहाच्या बाहेर सुमारे १५ ते २० मिनिटे दोन्ही गटाच्या कार्यकर्त्यांची जुगलबंदी सुरू होती. दोन्ही गट एकमेकांना बोट दाखवत होते, अखेर पोलिसांनी सभागृहाच्या परिसरातून दोन्ही गटांना बाहेर काढले. याचवेळी काही कार्यकर्ते दुसऱ्या बाजूला उभे होते. त्यांनाही बाहेर काढा, असे म्हणत दोन्ही गट एकमेकांकडे बोट दाखवत होते. पोलिसांना अखेर समान न्याय देत दोघांनाही बाहेर काढल्याने परिसरात शांतता निर्माण झाली. त्यामुळे ठाकरे गट आणि शिंदे गट यांचा बैठकीपूर्वीच घोषणाबाजीने राडा रंगला. समितीच्या सभागृहात प्रवेश देण्यावरून दोन्ही गट एकमेकांसमोर आले होते.