Santosh Deshmukh Murder Case : धनंजय देशमुखांचा 'तो' खळबळजनक दावा; अंजली दमानिया म्हणाल्या, 'काय वाटेल ते आरोप करतील, पण...'

Mumbai News : संतोष देशमुख हत्येप्रकरणाच्या तपासात बीड पोलिसांकडून कोणतेही खुलासे होत नाहीत. यावर त्यांचे बंधू धनंजय देशमुख नाराज आहेत.

याच दरम्यान, संतोष देशमुख यांची हत्येला अनैतिक संबंधांचा अँगल देण्याची तयारी काहींनी चालवल्याचा खळबळजनक आरोप धनंजय देशमुख यांनी केला. यावर सामाजिक कार्यकर्त्या अंजली दमानिया यांनी मोठी प्रतिक्रिया दिली आहे.

अंजली दमानिया (Anjali Damania) म्हणाल्या, "धनंजय देशमुख यांचा हा आरोप ऐकून धक्काच बसला. हे खरंचं आहे, हे कुठच्याही लिमिटला जातील, काय वाटेल ते आरोप करतील, वाटेल ते! त्यांना कसंही करून वाचवायचे आहे".

याशिवाय अंजली दमानिया यांनी पोलिसांच्या (Police) तपासावर प्रश्न उपस्थित केले. नऊ तारखेला स्कार्पिओमध्ये सापडलेल्या दोन मोबाईलचे काय झाले? त्यांचे सीडीआर बाहेर का आला नाही? डेटा रिकव्हरचे काय झाले? अडीच महिने झाले, तरी डेटा रिकव्हर झालेला नाही? 24 तासात फोर लेव्हलपर्यंत गेलेला डेटा रिकव्हर करता येतो, मग त्याचे काय झाले? असे प्रश्न उपस्थित केले.

अंजली दमानिया यांनी मंत्री धनंजय मुंडे यांच्यावर कृषिमंत्री असताना केलेला आणखी एक भ्रष्टाचाराचे प्रकरण उघड केले. हा घोटाळा 200 कोटींचा असून, यासाठी खोटा अध्यादेश काढल्याचा आरोप अंजली दमानिया यांनी केला. काही दिवसांपूर्वी अंजली दमानिया यांनी मंत्री मुंडेवर 342 कोटी रुपयांच्या घोटाळ्याचा आरोप केला होता. आता आणखी एक घोटाळ्याचा आरोप केल्याने मंत्री मुंडे आणखी अडचणीत आले आहे. अर्थातच, मंत्री मुंडेंनी या घोटाळ्याचे आरोप देखील फेटाळले आहेत.

मंत्री मुंडेंचा लवकरच तिसरा घोटाळा...

दरम्यान अंजली दमानिया यांनी आणखी तिसऱ्या घोटाळ्याचा गौप्यस्फोट पुढील तीन दिवसांनी करणार असल्याचा इशारा दिला आहे. मंत्री धनंजय मुंडे जाणं का गरजेचे आहे, एक मंत्री जो आपल्या पदाचा गैरवापर करून, अमाप संपत्ती कमवतो, लुटतो, वाल्मिक कराडसारखी माणसं ठेवतो. जी दहशत पसरवितात. त्याच्यामुळे ही हत्या झाली. ही महाराष्ट्रात पुन्हा घडू नये, म्हणून या मंत्र्यांना अद्दल घडावी, यासाठी आपला लढा सुरू राहणार असल्याचे अंजली दमानिया यांनी म्हटले.