Beed Crime News : मनोज जरांगेंचे सहकारी, कोपर्डीच्या आरोपींना न्यायालयाच्या आवारात चोप देणाऱ्या अमोल खुनेंवर हल्ला

Beed News: मराठा आरक्षण आंदोलक मनोज जरांगे पाटील यांचे कट्टर सहकारी व कोपर्डी (जि. अहमदनगर) अत्याचार घटनेतील आरोपींना न्यायालयाच्या आवारातच चोप देणारे अमोल खुने यांच्यावर अज्ञात तीन ते चार आरोपींनी दगडफेक करत हल्ला केल्याची घटना जिल्ह्यात सोमवारी रात्री घडली.

हल्ल्यात गंभीर जखमी झालेल्या खुने यांच्यावर रुग्णालयात उपचार सुरु आहेत. हल्ल्याची घटना गेवराई तालुक्यातील अर्धमसला फाट्यावर घडली. घटनेनंतर आरोपी पसार झाले असून हल्ल्याची माहिती मिळताच हजारो समाज बांधवांनी गेवराई रुग्णालयात धाव घेतली.

गेवराई तालुक्यातील धानोरा येथील रहिवाशी असलेले अमोल खुने सुरुवातीपासून मनोज जरांगे पाटील यांचे समर्थक आहेत. कोपर्डी अत्याचार प्रकरणातील आरोपींवर न्यायालयाच्या आवारात हल्ला प्रकरणात अमोल खुने यांचा सहभाग होता. मनोज जरांगे यांच्या सुरुवातीपासूनच्या मराठा आरक्षण (Maratha Reservation) आंदोलनात सक्रीय राहिलेले आहेत.

दरम्यान, सोमवारी अमोल खुने गेवराई येथे भाचीला सोडून परत आपल्या धानोरा या गावी दुचाकीवरून जात असताना गढी - माजलगाव महामार्गावरील अर्धमसला फाट्यावर अज्ञात तीन ते चार आरोपींनी अचानक त्यांच्यावर दगडफेक सुरु केली. यामध्ये अमोल खुने यांच्या डोक्याला दगड लागल्याने त्यांना गंभीर इजा झाली. घटनेनंतर हल्लेखोर पसार झाले. त्यांना उपचारासाठी गेवराई येथील शासकीय रुग्णालयात दाखल करण्यात आले. या हल्ल्याची माहिती मिळताच हजारो मराठा समाज बांधवांनी रुग्णालयात धाव घेऊन खुने यांच्या तब्येतीची विचारपूस केली.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

तसेच या हल्ल्याचा निषेध व्यक्त करत आरोपींना अटक करण्याची मागणी यावेळी करण्यात आली. याप्रकरणी रात्री उशिरापर्यंत गेवराई पोलिस ठाण्यात गुन्हा दाखल करण्याची प्रक्रिया सुरू होती. कोपर्डीच्या आरोपीच्या हल्ल्यातील इतर आरोपींनी मनोज जरांगे (Manoj Jarange Patil) यांची साथ सोडलेली असली तरी अमोल खुने मात्र शेवटपर्यंत मनोज जरांगे यांच्यासोबतच आहेत.

(Edited By Deepak Kulkarni)