Aurangabad Railway Station: औरंगाबाद रेल्वे स्टेशनचं नाव बदलणार! शासनाची मंजुरी, राजपत्र प्रसिद्ध

Aurangabad Railway Station: औरंगाबाद रेल्वे स्टेशनचं आता नाव बदलणार असून राज्य शासनानं यासाठी मंजुरी दिली आहे. या नाव बदलाचं गॅझेट देखील जारी करण्यात आलं आहे. त्यामुळं आता लवकरच या रेल्वे स्टेशनचं नावही बदललं जाणार आहे.

औरंगाबाद शहराचं नामकरण छत्रपती संभाजीनगर झालं असलं तरी रेल्वे स्थानकाचं नामकरण झालं नव्हतं. आता महाराष्ट्र शासनानं केंद्रीय अधिनियमान्वये यासंदर्भात नियम व आदेश लागू करत ‘छत्रपती संभाजीनगर’ नाव रेल्वे स्थानकाला देण्यासंदर्भात राजपत्र जारी केलं आहे. त्यामुळं आता लवकरच औरंगाबाद रेल्वे स्थानकाचं नाव 'छत्रपती संभाजीनगर रेल्वे स्टेशन' असं होणार आहे.

असं झालं नामकरण

दरम्यान, मविआचं सरकार असताना २०२२ मध्ये तत्कालीन मुख्यमंत्री उद्धव ठाकरे यांनी २९ जून रोजी औरंगाबाद आणि उस्मानाबाद शहराचं नाव बदलून अनुक्रमे संभाजीनगर आणि धाराशीव असं केलं होतं. शिवसेनेची बऱ्याच काळापासून या शहरांची नाव बदलण्याची मागणी होती. त्यामुळं जशी शिवसेनेचा मुख्यमंत्री झाला तसा ही शहराची नावं बदलण्याच्या निर्णय उद्धव ठाकरेंकडून घेण्यात आला. पण एका विशिष्ट परिस्थितीत हा निर्णय घेतला गेला.

२२ जून २०२५ रोजी शिवसेनेत सर्वात मोठं बंड होऊन एकनाथ शिंदे आपल्या ४० समर्थक आमदारांसह बाहेर पडले त्यामुळं शिवसेनेचं विधीमंडळातलं संख्याबळ कमी झालं. त्यामुळं ठाकरे मुख्यंमत्री असलेलं मविआचं सरकारचं कोसळलं. पण किमान समान कार्यक्रमानुसार काँग्रेसला या नामांतराला विरोध असतानाही मुख्यमंत्रीपदाचा राजीनामा देण्यापूर्वी उद्धव ठाकरेंनी शिवसेनेची अनेक वर्षींची मागणी म्हणून औरंगाबादचं नाव संभाजीनगर आणि उस्मानाबादचं नाव धाराशीव असं करण्यास मंत्रीमंडळाची मंजुरी करुन घेतली.

पण नंतर ठाकरेंचं सरकार जाऊन एकनाथ शिंदेंची शिवसेना आणि भाजपनं एकत्र येत सरकार स्थापन केलं. या सरकारचे मुख्यमंत्री एकनाथ शिंदे बनले त्यानंतर औरंगाबाद शहराला दिलेलं संभाजीनगर या नावात त्यांनी पुन्हा बदल करुन ते छत्रपती संभाजीनगर असं केलं. सुरुवातीला केवळ शहराच्या नावात तसा बदल झाला त्यानंतर जिल्हा पातळीवर नावात बदल केला गेला आणि आता रेल्वे स्थानकाचं औरंगाबाद हे नाव बदलून छत्रपती संभाजी नगर असं करण्यात आलं आहे.