बीडमध्ये बोगस कामाच्या बिलावर सही करण्यास नकार दिल्याच्या रागातून ग्रामरोजगार सेवकाला घरात घुसून मारहाण केल्याचा धक्कादायक प्रकार समोर आला आहे. गेवराई तालुक्यातील खांडवी येथे ही घटना घडली. ग्रामरोजगार सेवक जालिंदर शेजुळ यांच्यावर बीड जिल्हा रुग्णालयात उपचार सुरू आहेत. या मारहाणीचा व्हिडिओही समोर आल्याने परिसरात खळबळ उडाली आहे.
जालिंदर शेजुळ यांनी केलेल्या आरोपानुसार, इंजिनियर गणेश कोल्हे यांनी काही लोकांना सोबत घेऊन त्यांच्या घरात प्रवेश केला आणि त्यांना बेदम मारहाण केली. तसेच जीवे मारण्याची धमकी दिल्याचा आरोपही त्यांनी केला आहे. या घटनेनंतर ग्रामरोजगार सेवकांमध्ये संतापाचे वातावरण असून, आज जिल्हाधिकारी कार्यालयावर निषेध मोर्चा काढण्यात येणार असल्याची माहिती आहे.
खांडवी गावातील सुमारे 18 लाख रुपयांच्या 2 पेपर ब्लॉक रस्त्यांच्या कामांवरून हा वाद झाल्याचे जालिंदर शेजुळ यांनी सांगितले. त्यांच्या म्हणण्यानुसार, प्रत्यक्षात कामे न करताच त्यांची बिले उचलण्याचा प्रयत्न करण्यात आला. या कामांचे इस्टिमेटही चुकीच्या पद्धतीने तयार करण्यात आल्याचा आरोप त्यांनी केला आहे. तसेच मेजरमेंट बिल दुसऱ्या इंजिनियरकडून करून घेतल्याचेही त्यांनी सांगितले.
गावात प्रत्यक्ष कामे झालेली नसल्याने आपण संबंधित बिलावर सही करण्यास नकार दिला. याच कारणाचा राग मनात धरून आपल्याला मारहाण करण्यात आल्याचा आरोप शेजुळ यांनी केला आहे.
पीडित ग्रामरोजगार सेवक जालिंदर शेजुळ म्हणाले, "खोट्या कामाच्या बिलावर सही न केल्याने इंजिनियर गणेश कोल्हे काही लोकांना घेऊन बेदम मारहाण केली तसेच जीवे मारण्याची धमकी दिली. माननीय आमदार साहेब गेवराई विजय राजे जी पंडित तसेच शिव साहेब तसेच कलेक्टर साहेब यांनी या गोष्टीची दखल घेऊन मला यांच्यापासून धोका आहे मला संरक्षण यांनी द्यावी."
पुढे ते म्हणाले, "18 लाख रुपयाच्या दोन पेपर ब्लॉकच्या रस्त्याची कामे न करताच बिले उचलण्याचा प्रयत्न होता. त्याचे इस्टिमेट देखील चुकीची बनवले. मेजरमेंट बिल देखील दुसऱ्याच इंजिनियर करून घेतले. आणि गावात प्रत्यक्ष कामे झाली नाहीत. त्यामुळे मी बिलावर सह्या देण्यास नकार दिला. एकच राग धरू मला मारहाण केली आहे. आम्ही काम आहे कसं करावेत?"
या प्रकरणाची चौकशी करून संबंधितांवर कारवाई करावी आणि आपल्याला संरक्षण द्यावे, अशी मागणी जालिंदर शेजुळ यांनी केली आहे. दरम्यान, मारहाणीचा व्हिडिओ समोर आल्याने या प्रकरणाची पुढील कारवाई काय होते, याकडे सर्वांचे लक्ष लागले आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.