Beed Maratha Protest Case : बीड जाळपोळप्रकरणी अटकेतल्या टोळीप्रमुखावर राजकीय वरदहस्त? पोलिस अधीक्षक म्हणतात...

Beed News : मराठा आरक्षण आंदोलनाच्या पार्श्वभूमीवर बीड शहरात आणि एकूणच जिल्ह्यात विविध ठिकाणी ३० ऑक्टोबर रोजी जाळपोळ अन् दगडफेकीचे प्रकार घडले होते. या प्रकरणी हिंसाचाराचा आरोप असलेला टोळीप्रमुख पप्पू शिंदे याला आता अटक करण्यात आली आहे. कोर्टात हजर केले असता, त्याची पोलिस कोठडीत रवानगी केली गेली आहे. (Latest Marathi News)

आरक्षण आंदोलनादरम्यानच पप्पू शिंदे यांनी एका व्यावसायिकाला धमकावण्याचा प्रकार केल्याचीही तक्रार पोलिसांकडे नोंद आहे, तर त्याच्यावर सोशल मीडियावर वादग्रस्त पोस्ट टाकून पसरवल्याचा आरोपही आहे. विशेष म्हणजे त्याच्यावर एका स्थानिक राजकारण्याचा वरदहस्त असल्याची चर्चा आहे. यामुळे कारवाईत पोलिसांवर दबाव निर्माण होत असल्याचेही बोलले जात आहे. मात्र, आम्ही निःपक्षपातीपणाने याबाबत तपास करत असल्याचे पोलिस अधीक्षक नंदकुमार ठाकूर यांनी माध्यमांशी बोलताना स्पष्ट केले आहे.

आतापर्यंत दोन हजार जणांची चौकशी -

बीड जाळपोळ आणि हिंसाचारप्रकरणी पोलिसांचा तपास सुरू आहे. संशयितांवर पोलिसांची करडी नजर आहे. यासाठी पथकांची विभागणी करून शोध घेण्यात येत आहे. बीडच्या पोलिसांनी या प्रकरणी आतापर्यंत तब्बल 2 हजार जणांची चौकशी केली आहे.

चौकशीतून आतापर्यंत 254 जणांना ताब्यात घेतले आहे. ज्यामध्ये 17 अल्पवयीन संशयितांचा समावेश आहे. अटक करण्यात आलेल्या एकाही आरोपीला जामीन मिळालेला नाही. एकूण तेरा आरोपींनी आतापर्यंत जामिनासाठी अर्ज केला होता. मात्र, त्यांचाही जामीन नाकारण्यात आला आहे, अशी माहिती पोलिस अधीक्षक ठाकूर यांनी दिली आहे.

(Edited By - Chetan Zadpe)