Trupti Desai : अजितदादांच्या नावाखाली बीडचं पालकत्व कोण संभाळतंय? तृप्ती देसाईंचा पालकमंत्रिपदावरून 'NCP'ला टोला (VIDEO)

Beed Police : बीड पोलिसांवर केलेल्या आरोपांनंतर तृप्ती देसाईंना नोटीस बजावली होती. त्या नोटिशीला उत्तर देण्यासाठी तृप्ती देसाई पुराव्यासह उत्तर देण्यासाठी बीड पोलिस अधीक्षक कार्यालयात गेल्या.

तिथं त्यांनी माध्यमांशी संवाद साधताना बीडचे खरे पालकमंत्री कोण यावर मोठं विधान केले. अजित पवार यांच्या नावाने बीडचे खरे पालकत्व धनंजय मुंडे संभाळत आहेत, असा गंभीर आरोप तृप्ती देसाई यांनी केला.

संतोष देशमुख हत्या प्रकरणात अटक करण्यात आलेल्या वाल्मिक कराड याचे बीड (BEED) पोलिस दलातील अधिकारी आणि कर्मचारी यांच्याशी असलेल्या हितसंबंधांवर गंभीर आरोप केले होते. या आरोपानंतर बीड पोलिसांनी तृप्ती देसाई यांनी नोटीस बजावली होती. केलेल्या आरोपांचे पुरावे द्या, असे त्यात म्हटले होते.

तृप्ती देसाई आज हे सर्व पुरावे घेऊन बीड जिल्हा पोलिस दलात कार्यालयात पोचले होते. बीड पोलिस (Police) दल अन् वाल्मिक कराड यांच्या हितसंबंधांविषयीचे पुरावे असलेले पेनड्राईव्ह सुपूर्द केला. 26 पोलिस अधिकारी आणि कर्मचाऱ्यांविषयी पुरावे तृप्ती देसाई यांनी पोलिस अधीक्षक नवनीत कावत यांच्याकडे दिला.

महायुती सरकारने पालकमंत्रिपदाची नियुक्ती करताना, धनंजय मुंडे यांना प्रचंड विरोध झाला. यानंतर त्यांना संतोष देशमुख यांच्या हत्येप्रकरणावरून मंत्रिपदाचा राजीनामा द्यावा लागला. अजित पवार यांनी बीडच्या पालकमंत्रिपदाची जबाबदारी स्वतःकडे घेतली. पण तृ्प्ती देसाई यांनी आज बीडमध्ये जाऊन अजित पवार नावाचे बीडचे पालकमंत्री आहेत, असा आरोप केला.

धनंजय मुंडे यांच्याकडे बीडचे पालकत्व आहे. आजही बीड पोलिस दलातील अनेक पोलिस अधिकारी आणि कर्मचारी वाल्मिक कराड याला पाठीशी घालण्याचा प्रयत्न करत आहेत. बीडचे पालकमंत्री आजही राष्ट्रवादी काँग्रेसकडे आहे. अजित पवार यांच्याकडे पालकमंत्रिपद असले, तरी ते कुठेही दिसत नाही. बीडमध्ये दररोज भयंकर घटना घडत आहेत. अजितदादा त्यावर काहीच बोलत नाही. त्यामुळे अजितदादांकडे पालकमंत्री आहे की, त्यांच्या नावाने धनंजय मुंडे कारभार संभाळत आहेत, हेच कळायला मार्ग नाही, असा टोला तृप्ती देसाई यांनी लगावला.