Nagpur Politics : दुष्यंत चतुर्वेदी उद्धव ठाकरेंच्या सैनिकांचा हिशोब चुकता करणार का?

Nagpur News : उद्धव ठाकरे सेनेचे माजी आमदार आणि नागपूर शहराचे माजी संपर्कप्रमुख दुष्यंत चतुर्वेदी आणि निष्ठावंत शिवसैनिकांचे कधीच पटले नाहीत.

शिवसेना आणि शिवसैनिकांसोबत काडीचाही संबंध नसताना त्यांना थेट नागपूरवर लादण्यात आले होते. त्यामुळे मोठा असंतोष उफाळून आला होता. आता काळाची पावले ओळखून चतुर्वेदी यांनी उद्धव ठाकरे यांना 'जय महाराष्ट्र' केला. सध्या ते शिंदे सेनेत सहभागी झाले आहेत. मात्र त्यांच्यावर होत असलेले आरोप कायम आहेत.

संपर्क प्रमुख या नात्याने त्यांनी महापालिकेची निवडणूक (Election) लढण्यास इच्छुक असलेल्यांकडून प्रत्येक दोन हजार रुपयांची वर्गणी गोळा केली होती. पक्ष सोडताना ती त्यांनी कार्यालयात जमा केली नाही. ही रक्कम कुठे आहे अशी विचारणा शिवसैनिकांमार्फत सोशल मीडियावरून केली जात आहे. हे बघता चतुर्वेदी उद्धव सेनेचा हिशेब चुकता केव्हा करणार, याकडे सर्वांचे लक्ष लागले आहे.

काँग्रेसचे ज्येष्ठ नेते, राज्याचे माजी मंत्री व नागपूरचे (Nagpur) पालकमंत्री सतीश चतुर्वेदी सक्रिय असताना दुष्यंत चतुर्वेदी यांचा राजकारणाशी काही एक संबंध नव्हता. नागपूरमधील शाईफेक प्रकरणारनंतर सतीश चतुर्वेदी यांना काँग्रेसमधून निलंबित करण्यात आले. त्यावेळी अशोक चव्हाण प्रदेशाध्यक्ष होते. बाळासाहेब थोरातांनी त्यांचे निलंबन मागे घेतले होते. या दरम्यान, विदर्भातील यवतमाळ जिल्ह्यातील स्थानिक स्वराज्य संस्थेच्या पोट निवडणुकीत उद्धव सेनेच्यावतीने अचानक दुष्यंत चतुर्वेदी यांचे नाव पुढे येताच अनेकांना आश्चर्याचा धक्का बसला होता.

दुष्यंत चतुर्वेदी विजयीसुद्धा झाले होते. युवा नेते आदित्य ठाकरे यांची मैत्रीमुळे त्यांची लॉटरी लागल्याचे सांगण्यात येत होते. पुढे त्यांना थेट नागपूरचे संपर्क प्रमुख करण्यात आले होते. या दरम्यान नागपूर महापालिकेची निवडून 2022 होण्याची शक्यता असल्याने चतुर्वेदी यांनी इच्छुकांकडून प्रत्येक दोन हजार रुपये वर्गणी गोळा केली होती. अनेकांनी दोन ते तीन प्रगावर आपला दावा करण्यासाठी वर्गणी जमा केली होती. मात्र ओबीसी आरक्षणामुळे महापालिकेची निवडणूक लांबणीवर पडली.

या दरम्यान महाविकास आघाडीचे सरकार कोसळले. विधानसभेच्या निवडणुकीनंतर पुन्हा महायुती सत्तेवर आली. उद्धव सेनेचे राजकीय भवितव्य धोक्यात असल्याचे बघून दुष्यंत चतुर्वेदी शिंदे सेनेत दाखल झाले आहेत. मात्र त्यांनी गोळा केलेल्या वर्गणीवरून आता वाद सुरू झाला आहे. गडगंज असलेल्या चुतर्वेदी यांच्यासाठी गोळा केलेली रक्कम फारच अत्यल्प आहे. मात्र हा हिशेब चुतर्वेदी कसा चुकता करतात याकडे सर्वांचे लक्ष लागले आहे.