Bhokar election : भोकर या मराठवाड्यातील भाजपनेते खा. अशोक चव्हाण यांच्या होमपीचवर पारंपरिक विरोधक कॉँग्रेस, राष्ट्रवादी कॉँग्रेस (अजित पवार), एमआयएम, वंचित बहुजन आघाडी, दोन्ही शिवसेना (ठाकरे व शिंदे) या पक्षांनी शड्डू ठोकला आहे. यात भाजप, कॉँग्रेस व राष्ट्रवादी कॉँग्रेस या भाजपचे मित्र पक्ष व पारंपरिक विरोधकांनीही आपले उमेदवार भाजपसमोर उभे केले आहेत. विरोधकांची ताकद यशस्वी होते की चव्हाणच आपला बालोकिल्ला कायम राखतात, याकडे लक्ष लागले आहे.
भोकर विधानसभा मतदारसंघ हा पूर्वीपासूनच काँग्रेस पक्षाचा बालेकिल्ला म्हणून ओळखला जातो. आपल्या किल्ल्यावर विरोधकांनी चढाई करू नये म्हणून ‘खंदक’ मजबूत केले जातात. या किल्ल्याचे मनसबदार अशोक चव्हाण यांनी अचानक काँग्रेसचा ‘हात’ सोडून भाजपशी घरोबा केल्याने राजकीय समीकरणे बदलली. होऊ घातलेल्या स्थानिक स्वराज्य संस्था निवडणुकीत भाजपला बळ देण्यासाठी कंबर कसली आहे. विरोधकांनी चव्हाणांना कोंडीत पकडण्यासाठी त्यांच्या होमपीचवर कान टवकारले आहेत. तिरंगी लढत अटळ असून भाजपसह ईतर पक्षांनी ही निवडणूक प्रतिष्ठेची केल्याने भाजपची डोकेदुखी वाढणार आहे. मतदार राजा कुणाच्या बाजूने कौल देईल हे येणारा काळच ठरवेल.
भोकर विधानसभा मतदारसंघ हा 1951 अस्तित्वात आला तेंव्हापासून या भागावर काँग्रेस पक्षाने वर्चस्व प्रस्थापित केले आहे. केंद्रीय गृहमंत्री शंकरराव चव्हाण यांनी प्रारंभी हदगाव मतदारसंघातून निवडणूक लढविली पण अपयश पदरी पडल्याने त्यांनी सुरक्षित मतदारसंघ म्हणून भोकर विधानसभा मतदारसंघ निवडला आणि 1957 ला ते पहिल्यांदा विजयी झाले तेव्हापासून खऱ्या अर्थाने त्यांचा राजकीय प्रवास हा भोकर मतदारसंघातून सुरू झाला.
योगायोगाने त्यांचे सुपुत्र अशोक चव्हाण यांनीही 2009 साली भोकर विधानसभेत एन्ट्री केली. वडिलांवर प्रेम करणाऱ्या मतदारांची सेवा करून वडिलांचे राहिलेले अपूर्ण स्वप्न साकारण्यासाठी वाव मिळाला. मतदारांनी ही श्री. चव्हाणांना भरभरून प्रेम दिल्याने मुख्यमंत्रीपदावर विराजमान होण्याचा बहुमान मिळाला. त्यानंतर चव्हाणांनी लोकसभेत तर विधानसभेला त्यांच्या पत्नी सौ. अमिता अशोक चव्हाण यांनी विजय मिळवला आणि भाजपमध्ये प्रवेश केल्यानंतर पहिल्यादांच चव्हाण घराण्याची तिसरी पिढी व अशोक चव्हाण यांची मुलगी श्रीजया यांना मतदारांनी स्वीकारल्याने एकंदरीत तालुक्यात भाजपला पसंती दिल्याचे समजते.
तालुक्यातील मतदारांनी चव्हाणांना साथ दिल्याने त्याची उतराई म्हणून तालुक्याच्या सर्वांगीण विकासासाठी कोट्यवधी रुपयांचा निधी खेचून आणल्याने तालुका एक विकासाचे ‘मॉडेल’ म्हणून नावारुपाला आले आहे. मतदारसंघात टाचणी जरी पडली तरी दिल्ली दरबारी आवाज येतो. मोजक्याच आवश्यक असलेल्या गरजा पूर्ण करण्यासाठी त्यांचा प्रयत्न सुरू आहे लवकरच त्या पूर्ण होतील. अशोक चव्हाण यांना २०१९ साली काँग्रेस पक्षाने लोकसभेची पुन्हा उमेदवारी दिली होती. पण त्याचे प्रतिस्पर्धी भाजपाचे उमेदवार प्रताप पाटील चिखलीकर यांनी विजय मिळवला. हा पराभव चव्हाणांच्या जिव्हारी लागला. त्यानंतर सिंहावलोकन करून फिसकटलेली घडी सुरळीत करण्यास यशस्वी झाले. आज तालुक्यात भाजपास ‘अच्छेदिन’ आले आहेत.
पूर्वी चव्हाण कुटुंबीयांच्या मुशीत वाढलेल्या प्रताप पाटील चिखलीकरांचे चव्हाण कुटुंबीयांसोबत राजकीय वैर निर्माण झाले ते आज ही कायम आहे. नगर परिषद निवडणुकीत चव्हाणांना कोंडीत पकडण्यासाठी विरोधकांनी डावपेच सुरू केले आहेत. भोकर तालुक्यात राष्ट्रवादी काँग्रेस पक्षाचे (अजित पवार) आमदार प्रताप पाटील चिखलीकर, जिल्हा अध्यक्ष बाळासाहेब पाटील रावणगावकर, काँग्रेस पक्षाचे खासदार रवींद्र चव्हाण, तालुका अध्यक्ष गोविंद बाबा गौड पाटील, एमआयएम, वंचित बहुजन आघाडी, मराठवाडा जनहित पक्ष, शिवसेना (शिंदे), शिवसेना (उबाठा) आणि अपक्ष हे भाजपला चीत करण्यासाठी रणांगणात उतरले आहेत.
शहरातील एकूण मतदार संख्या (28,000) असून पैकीच्या पैकी मतदान होत नाही. यात प्रामुख्याने नऊ हजार (मुस्लिम), चार हजार (दलित), दीड ते दोन हजार (मराठा) आणि इतर समाजाचा समावेश आहे. नगराध्यक्षपद हे खुल्या प्रवर्गासाठी आरक्षित करण्यात आले असले तरी भाजप, काँग्रेस, एमआयएम पक्षांनी ओबीसी उमेदवार उभे केले आहेत. तर शिवसेना (शिंदे गट) मराठा उमेदवार दिला आहे. परिणामी दलित-मुस्लिम मतदार कुणाच्या बाजूने कौल देतील हे पाहण महत्वाचे आहे. प्रभागात पक्ष आणि अपक्षांचा भरणा अधिक असून क्रासवोटिंग होण्याची शक्यता आहे.
नगरपरिषदेच्या स्थापनेपासून पूर्वी काँग्रेस पक्षाची एक हाती सत्ता होती. आता अशोक चव्हाण भाजपमध्ये गेल्याने राजकीय समीकरणे बदलल्याने मतदार कुणाच्या बाजूने कौल देतील याकडे लक्ष लागून आहे. चव्हाणांनी विकासाच्या बाबतीत कसलीच कसूर ठेवली नाही पण मतदार विकासा सोबत ‘‘लक्ष्मी दर्शन’’ करावेच लागेल अशी भावना व्यक्त करीत असल्याने या निवडणुकीत सर्वच पक्षांकडून कोट्यवधी रुपयांचा चुराडा होण्याची शक्यता आहे.
भाजपाला (BJP) कोंडीत पकडण्यासाठी शहरात सर्व पक्षांनी कंबर कसली आहे. यातून सहीसलामत बाहेर पडण्यासाठी ऐनवेळी अशोक चव्हाण काय गनिमी कावा करतील हे पाहणे औत्सुक्याचे ठरणार आहे. भाजपसाठी ही निवडणूक डोकेदुखी ठरणार आहे असे राजकीय जाणकारांचे मत आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.
