Ravindra Chavan News : भाजपचे प्रदेशाध्यक्ष म्हणतात, आमची संघटनात्मक बांधणी मजबूत, यश पदरात पडेल!

Parbhani BJP : भाजपच्या महाराष्ट्र प्रदेशाध्यक्ष पदावर निवड झाल्यानंतर आपल्या पहिल्याच मराठवाडा दौऱ्यात रविंद्र चव्हाण यांनी आगामी स्थानिक स्वराज्य संस्था निवडणुकीसाठी सज्ज राहा, असे आवाहन पदाधिकारी, कार्यकर्त्यांना केले. पक्षाची संघटनात्मक बांधणी मजबूत झाली आहे, त्यामुळे यश नक्की पदरात पडेल. वरिष्ठ नेते योग्यवेळी योग्य निर्णय घेतील, आपण पक्षवाढीसाठी कामाला लागलं पाहिजे, असा सूचक संदेशही त्यांनी यावेळी दिला.

रविंद्र चव्हाण (Ravindra Chavan) आज परभणी दौऱ्यावर होते. आगामी स्थानिक स्वराज्य निवडणुकांच्या अनुषंगाने अतिशय चांगली संघटनात्मक बांधणी करण्यासाठी आम्ही सर्व भाजपा कार्यकर्ते जोमाने कामाला लागलो आहोत. बाकी निवडणुकांच्या संदर्भातील निर्णय पक्षश्रेष्ठी घेतील. संपूर्ण ताकदीनिशी या निवडणुकांना आपण सामोरे जाणार आहोत, असे चव्हाण यांनी सांगितले.

सिमुरगव्हाण (ता. पाथरी) येथे श्रीक्षेत्र नाणिजधाम संचलित उपपीठाद्वारे सुरु करण्यात आलेल्या मुलींसाठीच्या वेद पाठशाळेला भेट देण्यासाठी ते आले होते. मुख्यमंत्री देवेंद्र फडणवीस यांचा या महिन्यात परभणी (Parbhani) जिल्ह्यासह राज्यभर दौरा होणार असून, त्यात संघटन बांधणी, विकासकामांचा तपशीलवार आढावा घेतला जाणार आहे. स्थानिक पदाधिकारी व कार्यकर्त्यांशी विविध विषयांवर सविस्तर चर्चाही ते करतील.

स्थानिक स्वराज्य संस्थांच्या निवडणुकीसाठी वरिष्ठ पातळीवरून येणाऱ्या आदे्शानुसार पदाधिकारी, कार्यकर्ते संघटितपणे जोमाने काम करतील. भाजपने आधीपासूनच संघटन बांधणीला गती दिली असून, प्रत्येक मतदारसंघांत कार्यकर्त्यांना सक्रिय करण्यावर भर दिला जात आहे. राज्यातील स्थानिक स्वराज्य संस्थांच्या निवडणुका राजकीय दृष्टिकोनातून अत्यंत महत्त्वाच्या मानल्या जातात. त्यामुळे भाजपने यासाठीची रणनीती आखायला सुरुवात केली आहे, असेही चव्हाण म्हणाले.

प.पू. सद्गुरू श्री रामानंदाचार्य नरेंद्राचार्य महाराजांच्या प्रेरणेतून आणि मार्गदर्शनातून श्री जगद्गुरु नरेंद्राचार्य महाराज संस्थान राज्यभरात विविध सामाजिक व सांस्कृतिक उपक्रम राबवत असते. याचाच एक भाग म्हणून पाथरी तालुक्यातील (जि. परभणी) सिमुरगव्हाण येथील मराठवाडा उपपीठाच्या माध्यमातून मुलींसाठी स्वतंत्र वेदपाठशाळा उभारण्यात आली आहे. या वेदपाठशाळेच्या माध्यमातून पुढील पिढीमध्ये वेदांचा व्यासंग असलेल्या गार्गी आणि मैत्रेयी सारख्या विद्वान भगिनी उदयास येतील, असा विश्वास त्यांनी व्यक्त केला.