Chhatrapati Sambhajinagar News, 23 Dec : मोठा भाऊ कोण? छोटा भाऊ कोण? या वादात छत्रपती संभाजीनगर महापालिकेसाठी शिवसेना-भाजपमधील युतीची बोलणी रखडली आहे. नुसत्याच बैठकांवर बैठका सुरू आहेत, अंतिम निर्णय मात्र होत नाही. भाजपमधील काही नेते हे युतीमध्ये मीठाचा खडा टाकण्याचा प्रयत्न करत असल्याचा आरोपच पालकमंत्री संजय शिरसाट यांनी केला आहे.
जास्त ताणू नका, नाहीत जनता आपल्याला ताणवेल, असा टोलाही त्यांनी भाजपला लगावला. महापालिका निवडणुकीसाठी शिवसेना-भाजप नेत्यांमध्ये आतापर्यंत तीन बैठका झाल्या. परंतु यातून काहीच निष्पन्न झाले नाही. विशेषत: नगरपालिका निवडणुकीतील निकालानंतर भाजप राज्यात सर्वात मोठा पक्ष ठरल्यामुळे भाजपने शिवसेनेला ताणून घेण्याची रणनीती आखल्याचे बोलले जाते.
जिल्ह्यात भाजपचे केवळ दोनच नगराध्यक्ष निवडून आले आहेत. हा मुद्दा शिवसेनेने पुढे केला आहे. या शिवाय आमचा एक खासदार सहा आमदार असल्याचे सांगत आम्हीच मोठा भाऊ असल्याचा शिसेनेने केलेला दावा भाजपला मात्र मान्य नाही. भाजपचे मंत्री अतुल सावे यांनी शिवसेनेला 2015 चा फॉर्म्युला आता चालणार नाही, फिप्टी फिप्टीवर चर्चा झाली तरच युती होऊ शकेल? अन्यथा राज्यातील वरिष्ठ नेते जे ठरवतील ते आम्ही मान्य करू, अशी ताठर भूमिका घेतली आहे.
भाजपला पुन्हा स्वबळ खुणावत आहे, तर शिवसेने युतीसाठीच्या बोलणीत लहान भावाची भूमिका स्वीकारत अजूनही भाजप नेत्यांना लवकरात लवकर निर्णय घेण्यासाठी फोन करणे सुरूच ठेवले आहे. वीस दिवसांवर महापालिकेच्या निवडणुका आल्या आहेत.
उमेदवारांना कागदपत्रे गोळा करणे, निवडणुकीची तयारी, प्रचार, मतदारांपर्यंत आपले व्हिजन पोहचवण्यासाठी अत्यंत कमी वेळ मिळणार आहे. युतीचा निर्णय लवकर झाला तर उमेदवार कामाला लागू शकतील. मात्र आमच्या नुसत्याच बैठका सुरू आहेत, निर्णय काहीच होत नाही, असे म्हणत संजय शिरसाट यांनी संताप व्यक्त केला.
भाजपमधील काही नेते आहेत, जे युतीमध्ये मीठाचा खडा टाकत आहेत. त्यांना खड्यासारखे बाजूला करून लवकर युतीचा निर्णय होणे गरजेचे असल्याचे शिरसाट म्हणाले. तर आता जास्त ताणू नका, नाहीतर जनता निवडणुकीत आपल्याला ताणवेल, असा टोलाही शिरसाट यांनी भाजपला लगावला. दरम्यान, आज किंवा उद्या युती संदर्भात अंतिम निर्णय घेतला जाऊ शकतो, अशी शक्यता वर्तवली जात आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.