Shiv Sena UBT: ठाकरे सेनेचे आस्ते कदम! मुंबईतील पदाधिकारी दोन दिवस तळ ठोकून संभाजीनगरमध्ये करणार उमेदवारांची चाचपणी

Municipal Corporation Election News : नगरपालिका, नगरपंचयात निवडणुकीसाठीचे पहिल्या टप्प्यातील मतदान पार पडले आहे. तर दुसरा टप्पा 20 रोजी होऊन लगेच 21 ला निकाल जाहीर होणार आहे. त्यानंतर लगेचच महापालिका, जिल्हा परिषद निवडणुकीची घोषणा होण्याची शक्यता आहे.

या पार्श्वभूमीवर सत्ताधारी शिवसेना-भाजप, एमआयएम, काँग्रेस या पक्षांनीही तयारी सुरू केली आहे. इच्छूकांना अर्ज वाटप आणि प्रत्यक्ष मुलाखतींना सुरूवात होणार आहे. दुसरीकडे छत्रपती संभाजीनगरमध्ये शिवसेना उद्धव बाळासाहेब ठाकरे पक्षाने मात्र आस्ते कदमचे धोरण स्वीकारले आहे.

स्थानिक पातळीवर संभाव्य उमेदवारांच्या याद्या तयार करण्यात आल्या असल्या तरी शिवसेनेच्या स्थानिक लोकाधिकार समितीचे पदाधिकारी संभाजीनगरमध्ये लवकरच दाखल होणार आहेत. दोन दिवस मुक्काम आणि प्रत्येक प्रभागामध्ये जाऊन ते पडताळणी करणार आहेत. याचा अहवाल पक्षप्रमुख उद्धव ठाकरे यांना सादर केल्यानंतर प्रत्यक्ष मुलाखती आणि थेट उमेदवारी जाहीर केली जाणार असल्याचे समजते. रविवारी आठ जणांची एक टीम शहरात दाखल होणार आहे.

महापालिका निवडणुकीसाठी आचारसंहिता लागण्याची शक्यता व्यक्त केली जात असल्याने सर्वच राजकीय पक्षांनी उमेदवारांची चाचपणी सुरू केली आहे. शिवसेना उद्धव बाळासाहेब ठाकरे पक्षाचे मुंबईतील पदाधिकारी शहरात येऊन आढावा घेणार आहेत. दोन दिवस या पदाधिकाऱ्यांचा शहरात मुक्काम आहे. स्थानिक स्वराज्य संस्थांच्या रखडलेल्या निवडणुका जानेवारी 2026 पर्यंत घेण्याचे आदेश सर्वोच्च न्यायालयाने दिल्यानंतर निवडणूक आयोग, राज्य शासनाच्या आदेशानुसार प्रशासनाने तयारी पूर्ण करून ठेवली आहे.

येत्या आठवडाभरात महापालिका निवडणुकीसाठी आचारसंहिता लागू होईल, असा अंदाज व्यक्त केला जात आहे. त्यामुळे शहरातील राजकीय वातावरण तापत आहे. शिवसेना उद्धव बाळासाहेब ठाकरे पक्षाने देखील तयारी पूर्ण केली आहे. प्रत्येक प्रभागातील संभाव्य उमेदवारांच्या याद्या तयार करण्यात आल्या आहेत. त्यासोबत घरोघरी जाऊन पदाधिकारी नागरिकांच्या भेटी घेत आहेत.

पक्षाच्या पदाधिकाऱ्यांनी तयारी केलेली असली तरी दुसरीकडे स्थानिक लोकाधिकार समितीचे मुंबईतील पदाधिकारी देखील पडताळणी करणार आहेत. रविवारी आठ जण शहरात दाखल होणार आहेत. दोन दिवस ते शहभर फिरून संभाव्य उमेदवार, त्यांची तयारी याविषयी माहिती घेऊन त्याचा अहवाल पक्षाला सादर करणार असल्याचे सूत्रांनी सांगितले.

महापालिका निवडणुकीच्या अनुषंगाने पक्षाची तयारी पूर्ण झाली आहे. त्यासोबतच महाविकास आघाडीसाठी देखील स्थानिकस्तरावर चर्चा सुरू आहे. स्थानिक लोकाधिकार समितीचे पदाधिकारी शहरात येऊन दोन दिवस उमेदवारांची चाचपणी करणार आहेत. तसेच पक्षातर्फे इच्छुकांसाठी अर्ज भरून देण्याचे आवाहन केले जाणार असल्याचे महानगरप्रमुख राजू वैद्य यांनी सांगितले आहे.