Nanded Politics : नांदेड जिल्ह्यात भाजपात जोरदार इन्कमिंग; काँग्रेसच्या मुन्नासिंह तेहरांच्या हाती 'कमळ'

Nanded News : नांदेड लोकसभा निवडणुकीच्या तयारीला भारतीय जनता पक्षाने सुरुवात केली आहे. भाजपात येण्यासाठी अनेक उत्सुक आहेत, असे सूतोवाच प्रदेशाध्यक्ष चंद्रशेखर बावनकुळे यांनी केले आहे. कोण-कोण यायला उत्सुक आहेत, हे वेळ आल्यावर सांगतो असे सांगितले होते. नांदेड शहरातील काँग्रेसचे ज्येष्ठ नेते व माजी नगरसेवक मुन्नासिंह तेहरा यांनी भाजपाचे प्रदेशाध्यक्ष चंद्रशेखर बावनकुळे यांच्या उपस्थितीत भाजपात प्रवेश केला.

भाजप चंद्रशेखर बावनकुळे (Chandrashekhar Bawankule) हे नांदेडच्या दौऱ्यावर आले होते. त्यांनी लोकसभा निवडणुकीच्या तयारीचा आढावा घेतला. लोकसभा निवडणुकीत भाजपला महाविजय मिळवून देण्यासाठी कामाला लागा, असा आदेश पदाधिकारी व कार्यकर्त्यांना दिला.

माजी मुख्यमंत्री अशोक चव्हाणांच्या (Ashok Chavan) बालेकिल्ल्यात सुरुंग लावण्यास भाजपने सुरुवात केली आहे. काँग्रेसचे ज्येष्ठ नेते व माजी नगरसेवक मुन्नासिंह तेहरा यांना भाजपात आणले आहे प्रदेशाध्यक्ष बावनकुळे यांनी तेहरा यांच्या गळ्यात भाजपाचा दुप्पटा टाकला.ा

यावेळी मुन्नाभाई यांनी नरेंद्र मोदी (Narendra Modi) यांनी देशासाठी केलेले कार्य आणि गोरगरिबांसाठी आणलेल्या योजना पाहून भाजपमध्ये प्रवेश घेतल्याचे सांगितले. तसेच पक्ष बळकट करण्यासाठी पूर्ण वेळ पक्षांसाठी काम करेन, अशी ग्वाहीही त्यांनी दिली. यावेळी खासदार प्रतापराव पाटील-चिखलीकर, महानगर अध्यक्ष दिलीप कंदकुर्ते आदी उपस्थित होते.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

मुन्नासिंह तेहरा यांनी नगरपालिका व महापालिकेमध्ये नगरसेवक, उपाध्यक्ष व सभापतीपद भूषविले आहे. राजपूत समाजातही त्यांनी अनेक पदे भूषविले आहेत. ते जनाधार असलेले पदाधिकारी असून भारतीय जनता पक्षासाठी नांदेड फायदा होणार आहे.

(Edited By Deepak Kulkarni)