Dhananjay Munde News : धनंजय मुंडे यांचा संदीप क्षीरसागर यांना खिंडीत गाठत पलटवार!

Beed Political News : बीडमधील अन्याय, अत्याचाराच्या घटना काही केल्या थांबताना दिसत नाहीयेत. खून, बलात्कार, दरोडे, खंडणीसारख्या प्रकारांनी राज्य पातळीवर बीड जिल्ह्याची बदनामी होत आहे. बीडचा बिहार झालाय हा डाग घेऊन जिल्ह्यातील राजकारण सुरू आहे. खासगी कोचिंग क्लासच्या मालक आणि शिक्षकाकडून एका अल्पवयीन विद्यार्थीनीवर तब्बल वर्षभरापासून लैगिंक अत्याचार होत असल्याचा प्रकार उघडकीस आला आणि पुन्हा जिल्हा हादरला. आता या प्रकरणातही राजकीय हस्तक्षेप आणि आरोपींना वाचवण्याचा प्रयत्न होत असल्याचा आरोप आहे.

बीडचे राष्ट्रवादी काँग्रेस शरदचंद्र पवार पक्षाचे विद्यमान आमदार संदीप क्षीरसागर (Sandip Kshirsagar) यांचे या प्रकरणात नाव घेतले गेले. आरोपी विजय पवार आणि खटावकर यांच्या डोक्यावर संदीप क्षीरसागर यांचा हात असल्याचा आरोप आधी त्यांचेच बंधू आणि राष्ट्रवादी काँग्रेसचे योगेश क्षीरसागर यांनी पत्रकार परिषद घेऊन केला होता. त्यानंतर दोन दिवसांनी आमदार धनंजय मुंडे यांनीही पत्रकार परिषद घेत संदीप क्षीरसागर यांचा विद्यार्थीनीच्या लैगिंक छळ प्रकरणाशी थेट संबंध असल्याचा आरोप केला.

खासगी कोचिंग क्लासेसचा संचालक याने राजकीय दबावातूनच छोटे-मोठे क्लासेस बंद पाडले, तो प्लाॅटिंगच्या व्यवसायात कसा आला? संदीप क्षीरसागर लैगिंक अत्याचाराची घटना घडली आणि त्यानंतर या प्रकरणात आरोपींविरोधात एफआरआय दाखल झाला तेव्हा ते क्लासेसच्या तिथे हजर होते, असा दावा धनंजय मुंडे (Dhananjay Munde) यांनी केला. एवढेच नाही तर सध्या संदीप क्षीरसागर राहत असलेले घर कोणाचे आहे? याचा शोध घ्या, असे म्हणत संशयाची सुई त्यांच्या दिशेने फिरवली.

योगेश क्षीरसागर यांनी लैंगिक अत्याचार प्रकरणात थेट संदीप क्षीरसागर यांचे नाव घेतल्यानंतर धनंजय मुंडे यांनी दोन दिवसात बरीच माहिती गोळा केली. पोलिस अधीक्षकांशीही मुंडे यांनी चर्चा केली. ठोस माहिती हाती आल्यानंतरच काल रात्री पत्रकार परिषद घेत धनंजय मुंडे यांनी लैगिंक अत्याचार प्रकरणातील आरोपींशी संदीप क्षीरसागर यांचा संबंध असल्याचा आरोप केला. मुंडे यांची देहबोली आणि भाषा यातून त्यांनी संदीप क्षीरसागर यांना खिंडीत गाठण्याची तयारी सुरू केल्याचे दिसून आले.

अर्थात अल्पवयीन मुलीवरील लैगिंक अत्याचार प्रकरणातील आरोपींशी आमदार क्षीरसागर यांचा संबंध उघडकीस आला तर त्यांच्यावरही कारवाई केली जावी यात कुणाचे दुमत असण्याचे कारण नाही. परंतु ज्या पद्धतीने धनंजय मुंडे यांनी या प्रकरणात उडी घेतली आहे, ते पाहता संतोष देशमुख हत्या प्रकरणात झालेले आरोप, त्यातून मंत्रीपदाचा द्यावा लागलेला राजीनामा या सगळ्याचे उट्टे काढण्याची संधी या निमित्ताने त्यांच्याकडे चालून आली आहे. सरपंच संतोष देशमुख यांच्या हत्येनंतर त्यांच्या कुटुंबियांना न्याय मिळवून देण्यासाठी राज्यभरात निघालेल्या मोर्चांमध्ये संदीप क्षीरसागर यांनी कधी प्रत्यक्ष तर कधी अप्रत्यक्षरित्या धनंजय मुंडे यांना लक्ष्य केले होते.

संतोष देशमुख हत्या प्रकरणाचा मास्टर माईंड वाल्मिक कराड असल्याचे सांगत त्याच्या डोक्यावर धनंजय मुंडे यांचा हात असल्याचा आरोप संदीप क्षीरसागर यांनी केला होता. अखेर वाढत्या राजकीय दबावातून धनंजय मुंडे यांना मंत्रीपदाचा राजीनामा द्यावा लागला. तेव्हापासून मुंडे जिल्ह्याच्या राजकारणातून काहीसे बाहेर फेकले गेले होते. परंतु मध्यंतरी विपश्यना केंद्रात जाऊन आल्यानंतर अचानक धनंजय मुंडे जिल्ह्याच्या राजकारणात पुन्हा सक्रीय झाल्याचे दिसून आले. बीडमध्ये खासगी कोचिंग क्लासेसमध्ये संस्थाचालक आणि शिक्षकाकडून अल्पवयीन मुलीवर लैगिंक अत्याचाराचे प्रकरण उघडकीस आले आणि यात आमदार संदीप क्षीरसागर यांचा आरोपींशी संबंध असल्याचे समजताच धनंजय मुंडे यांनी पलटवाराची तयारी सुरू केली.

माझ तुम्ही सगळंच काढलं, आता गप्प का?

संतोष देशमुख यांच्या हत्येनंतर त्यांच्या कुटुंबियांना न्याय मिळवून देण्यासाठी रस्त्यावर उतरणारे आज माझ्या भगिनीवर अत्याचार झालेला असताना गप्प का? असा सवाल धनंजय मुंडे यांनी काल पत्रकार परिषदेत केला. आमचं तर सगळ्यांनी सगळंच काढलं, मग नेमका तेव्हा तुम्हाला कोणाला न्याय मिळवून द्यायचा होता की मग माझे मंत्रीपद घालवायचे होते? हा प्रश्न तुम्ही त्यांना विचारला पाहिजे होता.

एका अल्पवयीन भगिनीवर वर्षभरापासून खासगी कोचिंग क्लासेसचा मालक व शिक्षक अत्याचार करत होता. एवढी गंभीर घटना बीड जिल्ह्यात घडली असताना तुमच्या तोंडातून ब्र शब्दही निघत नाही, लाच वाटत नाही? असा संताप धनंजय मुंडे यांनी व्यक्त केला. विशेष म्हणजे दोन दिवसापासून या प्रकरणात आरोपींशी आमदार संदीप क्षीरसागर यांचा थेट संबंध जोडला जात आहे. योगेश क्षीरसागर यांच्यापाठोपाठ धनंजय मुंडे यांनीही जाहीर पत्रकार परिषदेत संदीप क्षीरसागर यांचे नाव घेत आरोपींचा सीडीआर, स्पाॅट आयडेंटीफिकेशन तपासण्याची मागणी केली जात असताना क्षीरसागर यांच्याकडून यावर कुठलीही प्रतिक्रिया आलेली नाही.

मुंडेंनी टायमिंग साधले..

आमदार धनंजय मुंडे यांनी बीड लैंगिक अत्याचार प्रकरणाची चौकशी एसआयटी नेमूण करण्याची मागणी मुख्यमंत्री, उपमुख्यमंत्री यांच्याकडे केली आहे. पावसाळी अधिवेशनाच्या पहिल्याच दिवशी धनंजय मुंडे यांनी संदीप क्षीरसागर यांची कोंडी करण्याचा प्रयत्न केला. राज्याच्या पर्यावरण मंत्री पंकजा मुंडे यांनीही या प्रकरणात आरोपींवर कठोर कारवाई करण्याचे आदेश बीडच्या पोलीस अधिक्षकांना दिले. विधीमंडळाच्या पावसाळी अधिवेशनात हा विषय तापणार एवढे मात्र निश्चित. या प्रकरणाचे राजकारण कोणीही करू नये एवढी अपेक्षा असली तरी आरोपींना वाचवण्याचा जर कोणी प्रयत्न करत असेल तर तो ही सुटता कामा नये, हीच सामान्याची भावना असणार आहे.