Ambadas Danve : राजकीय दबावात काम करु नका, अंबादास दानवेंनी घेतली बीड एसपींची भेट!

Beed News : केज तालुक्यातील मस्साजोगचे माजी सरपंच संतोष देशमुख यांच्या हत्येने बीडसह महाराष्ट्र हादरला आहे. या खून प्रकरणानंतर राजकीय वातावरणही चांगलेच तापले आहे. बीड पोलीस राजकीय दबावात काम करत असून आरोपींना वाचवण्याचा प्रयत्न करत असल्याचा आरोप राष्ट्रवादी काँग्रेस शरदचंद्र पवार पक्षाचे खासदार बजरंग सोनवणे यांनी केला होता.

एवढेच नाही तर बीड जिल्ह्यातील खून, अपहरणासारख्या घटनांची सीबीआय चौकशी करा, अशी मागणी सोनवणे यांची केंद्रीय गृहमंत्री अमित शहा यांची भेट घेऊन केली. या पार्श्वभूमीवर आज विधान परिषदेचे विरोधी पक्षनेते अंबादास दानवे (Ambadas Danve) यांनी बीडचे पोलिस अधिक्षक अविनाश बारगळ यांची भेट घेतली. कोणाच्या राजकीय दबावाला बळी न पडता खून प्रकरणातील आरोपींवर तातडीने कारवाई करा, अशा सूचना दानवे यांनी यावेळी दिल्या.

मस्साजोग येथील सरपंच संतोष देशमुख यांची राजकीय सुडातून हत्या करण्यात आली आहे. या प्रकरणी आरोपींवर तातडीने कारवाई करा. पोलिस या प्रकरणी हलगर्जीपणा करीत असून, फक्त राजकीय नेत्यांच्या दबावात काम करत आहेत,असे दिसतयं, अशी नाराजी दानवे यांनी या भेटीत व्यक्त केली. या संपुर्ण प्रकरणाची महिती पोलीस यंत्रणेकडून अंबादास दानवे यांनी घेतली.

आतापर्यंत या प्रकरणात तिघांना अटक करण्यात आली आहे. तर इतर फरार आरोपींच्या शोधासाठी बीड गुन्हे शाखेची दोन पथके रवाना करण्यात आली आहे. शिवसेना उद्धव बाळासाहेब ठाकरे पक्षाच्या वतीने या गंभीर प्रकरणी कारवाई करण्याचे, निवेदनही यावेळी पोलिस अधिक्षकांना देण्यात आले. दरम्यान संतोष देशमुख यांच्या खून प्रकरणानंतर चोवीस तासांनी त्यांच्या मृतदेहाचे पोस्टमार्टम करण्यात आले. तर तब्बल 33 तासांनी अंत्यसंस्कार.

या प्रकरणामुळे अजूनही बीड जिल्ह्यातील वातावरण तापलेले आहे. कायदा व सुव्यवस्थेची जिल्ह्यातील परिस्थिती गंभीर असून याला जबाबदार लोकांवर वेळीच कारवाई करावी, अशी मागणी जिल्ह्यातील नागरिकांकडून केली जात आहे, याकडेही दानवे यांनी पोलिस अधिक्षकांचे लक्ष वेधले. याप्रसंगी जिल्हाप्रमख परमेश्वर सातपुते, गणेश वरेकर, जिल्हा संघटक नितिन धांडे,उपजिल्हाप्रमख राजू महुवाले व शहरप्रमुख शेख निझाम उपस्थित होते.