Marathwada NCP MLAs: मराठवाड्यातील आठ आमदार अजितदादांकडे, तर दोघे शरद पवारांसोबत..

Marathwada NCP News: अजित पवारांनी बंड करत चाळीस आमदारांसह शिंदे-भाजप सरकारमध्ये सामील होण्याचा निर्णय घेतला. (Ncp Political Crisis News) आपल्याकडे चाळीस आमदारांच्या समर्थनाचे पत्र असल्याचा अजित पवारांनी दावा केल्यानंतर आज मुंबईत दोन्ही राष्ट्रवादीच्या मेळाव्याकडे राज्याचे लक्ष लागले होते. अखेर कोण आमदार अजित पवारांकडे आणि कोण शरद पवारांकडे? हे स्पष्ट झाले आहे.

मुंबईच्या यशवंतराव चव्हाण सभागृहात झालेल्या (Sharad Pawar) शरद पवारांच्या मेळाव्यात मराठवाड्यातील दहा (दोन विधान परिषद) आमदारांपैकी दोघेच उपस्थितीत होते. बीडचे संदीप क्षीरसागर (NCP) यांनी `सदैव साहेबांसोबतच`, अशी पोस्ट व्हायरल करत आपली भूमिका जाहीर केली होती. त्यानूसार आज ते यशवंतराव चव्हाण सभागृहातील मेळाव्यात हजर होते.

तर गेल्या तीन दिवसांपासून आपली भूमिका स्पष्ट न करता सस्पेन्स वाढवणारे घनसावंगीचे आमदार तथा माजी आरोग्य मंत्री राजेश टोपे हे देखील आज शरद पवारांच्या उपस्थितीतील मेळाव्यात हजर होते. (Marathwada) तर अजित पवारांच्या उपस्थितीत झालेल्या मेळाव्यात माजलगांवचे आमदार प्रकाश सोळुंके, मराठवाडा पदवीधरचे आमदार सतीश चव्हाण, मराठवाडा शिक्षकचे विक्रम काळे, आष्टी-पाटोदाचे बाळासाहेब आजबे, अहमदपूरचे बाबासाहेब पाटील, वसमतचे राजू नवघरे उपस्थीतत असल्याचे सांगितले जाते.

धनंजय मुंडे, संजय बनसोडे यांनी तर अजित पवार यांच्यासोबतच मंत्रीपदाची शपथ घेतली होती. बीडचे संदीप क्षीरसागर हे २०१९ मध्ये पहिल्यांदाच आपले काका जयदत्त क्षीरसागर यांचा पराभव करून विधानसभेवर निवडून गेले आहेत. तर राजेश टोपे हे घनसावंगी मतदारसंघातून सलग तीनवेळा विजयी झालेले आहेत.

राष्ट्रवादी पक्षाकडून त्यांना दोनवेळा मंत्रीपदाची संधी मिळाली होती. राज्यात काॅंग्रेस-राष्ट्रवादी आघाडीच्या सरकारमध्ये उच्च व तंत्र शिक्षण मंत्री तर २०१९ च्या महाविकास आघाडी सरकारमध्ये आरोग्य मंत्री होते. कोरोना काळात टोपे यांनी केलेल्या कामाचे कौतुक शरद पवार यांनी आपल्या `लोक माझे सांगाती` आत्मचरित्रात देखील केले होते.