Devendra Fadnavis : स्थानिक पातळीवरील युतीबाबत देवेंद्र फडणवीसांचे मोठे विधान; म्हणाले,'उद्यापर्यंत निर्णय...'

Mumbai News : राज्यात होत असलेल्या नगरपालिका व नगरपंचायतीच्या निवडणुकीसाठी उमेदवारी अर्ज दाखल करण्याची मुदत सोमवारी दुपारपर्यंत आहेत. त्या पार्श्वभूमीवर अनेक ठिकाणी महायुती होण्याची शक्यता व्यक्त होत असताना काही ठिकाणी महायुतीमधील मित्रपक्ष स्वबळावर रिंगणात उतरण्याची तयारी करीत आहे. याबाबत छत्रपती संभाजीनगर दौऱ्यावर असलेल्या मुख्यमंत्री देवेंद्र फडणवीस यांनी राज्यातील स्थानिक पातळीवर होत असलेल्या महायुतीबाबत देवेंद्र फडणवीस यांनी मोठे विधान केले आहे.

छत्रपती संभाजीनगर येथे प्रसार माध्यमाशी संवाद साधताना मुख्यमंत्री फडणवीस म्हणाले, 'स्थानिक पातळीवर युतीबाबत निर्णय होत आहेत. त्यामुळे उद्यापर्यंत चित्र स्पष्ट होईल. जागा वाटप हे वरून होतच नाही. जागा वाटप हे जिल्ह्यांमध्येच होते. यामुळे जिल्ह्यांमध्ये पक्षांनी जिथे शक्य आहे तिथे युती केली आहे. कुठे दोन पक्षांची युती झाली आहे तर कुठे कोणत्याच पक्षाची युती झालेली नाही.

नगरपालिका व नगरपंचायतीच्या या छोट्या निवडणुका आहेत. मोठ्या निवडणुका नाहीत. ही काय राज्याची निवडणूक नाहीये, यामुळे तिथल्या तिथल्या परिस्थितीनुसार निर्णय होत असतात असे देवेंद्र फडणवीस (Devendra Fadnavis) यांनी यावेळी बोलताना स्पष्ट केले. यावेळी भाजपचे नेतेमंडळी मोठ्या संख्येने उपस्थित होते.

छत्रपती संभाजीनगर येथील भाजप (BJP) कार्यालयाच्या उदघाटनप्रसंगी ते बोलत होते. यावेळी विरोधक केवळ आरोप करत आहेत. शहरातील पिण्याच्या पाण्यासाठी १६८० कोटी रुपये दिले आहेत. त्यामुळे येत्या काळात याठिकाणाचा पाण्याचा प्रश्न सुटेल, असे त्यांनी सांगितले. त्याशिवाय केवळ आरोप करताना विरोधकांना लाजही वाटत नाही, असेही यावेळी फडणवीस म्हणाले.

याठिकाणच्या भाजप कार्यालयातून जनतेच्या समस्या सोडवल्या जाणार आहेत. निवडणुकीच्या पार्श्वभूमीवर हा दौरा महत्त्वाचा मानला जात आहे. त्यामुळे सीएम फडणवीस काय घोषणा करणार याकडे लक्ष लागले होते.