Jalna Politics : काँग्रेसचे माजी आमदार कैलास गोरंट्याल हे भाजपमध्ये प्रवेश करणार हे जवळपास निश्चित झाला आहे. त्यांचेच सहकारी राहिलले माजी मंत्री सुरेश वरपूडकर यांचा भाजपमधील प्रवेश उद्या प्रदेश कार्यालयात प्रदेशाध्यक्ष रवींद्र चव्हाण, महसुल मंत्री चंद्रशेखर बावनकुळे यांच्या उपस्थितित होत आहे. गोरंट्याल यांनी मात्र आपला प्रवेश स्वतंत्र आणि रावसाहेब दानवे, अशोक चव्हाण, अतुल सावे यांच्या उपस्थितित व्हावा, अशी इच्छा व्यक्त केली आहे. वरपूडकर यांच्यासोबत गर्दीत नको, अशी भूमिका त्यांनी घेतल्यामुळे आता हा प्रवेश लांबला आहे.
शेरोशायरीतून भाजपा प्रवेशाबद्दलची उत्सुकता ताणून धरल्यानंतर अखेर माजी आमदार कैलास गोरंट्याल (Kailas Gorantyal) यांनी पक्षांतराच्या निर्णयाला दुजोरा दिला. काँग्रेस पक्ष उमेदवारी देऊन वाऱ्यावर सोडतो, असा आरोप करत गोरंट्याल यांनी पक्ष सोडणार असल्याचे संकेत दिले होते. खासदार कल्याण काळे आपल्याला भेटायला येणार आहेत, असे त्यांनी सांगीतले होते. पण ते भेटीला आलेच नाही, त्यानंतर गोरंट्याल यांनी माध्यमांना आपण भाजपामध्ये प्रवेश करणार असल्याचे सांगीतले.
परभणी आणि जालना जिल्ह्यातील दोन महत्वाचे नेते भाजपाच्या गळाला लागल्याने याचा मोठा परिणाम आगामी स्थानिक स्वराज्य संस्था निवडणुकीत होणार आहे. माजी मंत्री सुरेश वरपूडकर (Suresh Warpudkar) यांचा भाजपा प्रवेश उद्या (ता.29) रोजी निश्चित झाला असून त्यांचे समर्थक मुंबईला रवाना झाले आहेत. गोरंट्याल यांनाही वरपूडकर यांच्यासोबत प्रवेश दिला जाणार असल्याचे प्रदेशाध्यक्ष रवींद्र चव्हाण यांनी कळवले होते. परंतु वरपूडकर यांच्यासोबत आपला पक्षप्रवेश नको, अशी इच्छा गोरंट्याल यांनी व्यक्त केली.
भाजपाचे माजी केंद्रीय राज्यमंत्री रावसाहेब दानवे, राज्याचे ओबीसी विकास मंत्री अतुल सावे आणि राज्यसभेतील खासदार अशोक चव्हाण यांच्या माध्यमातून आपला पक्षप्रवेश होत आहे. हे सर्व नेते आणि मुख्यमंत्री देवेंद्र फडणवीस यांच्या उपस्थितित आपला प्रवेश स्वतंत्रपणे व्हावा, असा आग्रह गोरंट्याल यांचा आहे. तो आग्रह प्रदेशाध्यक्ष रवींद्र चव्हाण यांनी मान्य केला असून येत्या चार-पाच दिवसात हा प्रवेश सोहळा होणार असल्याचे गोरंट्याल यांनी स्पष्ट केले.
स्वबळावर लढा..
भाजपातील आपला प्रवेश हा कुठल्याही अटी, शब्दाशिवाय होत आहे. मी काही मागावे हे संयुक्तिक नाही. पक्षप्रवेशानंतर जेव्हा नेते मला काही विचारतील तेव्हा आपण आगामी महापालिका व स्थानिक स्वराज्य संस्था निवडणूक स्वबळावर लढा, असे सांगणार आहे, असे गोरंट्याल म्हणाले. एकूणच भाजपातील आपला प्रवेश हा ग्रँन्ड झाला पाहिजे, असा गोरंट्याल यांचा प्रयत्न आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.