Ambadas Danve : तनवाणींना उमेदवारी ही पक्षाची चूक; अंबादास दानवेंनी दिली कबुली

Chhatrapati Sambhaji Nagar News: शिवसेना ठाकरे गटाचे अनेक पदाधिकारी ऐन विधानसभा निवडणुकीत पक्ष सोडून जात आहेत, पण जे कामाचे नाहीत तेच जात आहेत. किशनचंद तनवाणी लोकसभा निवडणुकीच्या काळात प्रचारात नव्हते, संघटनेत देखील सक्रिय नव्हते, पण पक्षाने त्यांना ‘मध्य’ विधानसभा मतदारसंघातून उमेदवारी दिली. ती चूक होती, अशी कबुली शिवसेना नेते तथा विधान परिषदेचे विरोधी पक्षनेते अंबादास दानवे यांनी सोमवारी दिली.

पत्रकार परिषदेत दानवे (Ambadas Danve) म्हणाले, ‘किशनचंद तनवाणी यांनी लोकसभा निवडणुकीत पक्षाचे काम केले नाही, संघटनेत देखील त्यांचे काम नाही, असे आम्ही पक्षप्रमुखांना सांगितले होते. पण, त्यांना उमेदवारी जाहीर करण्यात आली. त्यानंतर त्यांनी निवडणूक न लढवण्याचा निर्णय घेतला. अर्धा तासात आम्ही दुसरा उमेदवार जाहीर केला आणि कामाला लागलो,’ असे शिवसेना (Shivsena) नेते दानवे यांनी स्पष्ट केले.

शहराच्या पाणीप्रश्‍नावरून अंबादास दानवे यांनी उपमुख्यमंत्री देवेंद्र फडणवीस यांच्यावर टीका केली. फडणवीस जाहीर सभेत खोटे बोलत आहेत, असा आरोप अंबादास दानवे यांनी केला. शहराच्या पाणीपुरवठा योजनेसाठी महापालिकेचा स्वःहिस्सा राज्य शासन देईल असा निर्णय उद्धव ठाकरे यांनी मुख्यमंत्री असताना घेतला होता, पण त्यानंतरच्या सरकारने महापालिकेवर दीर्घ मुदतीच्या कर्जाचा बोजा टाकला.

महापालिकेला या कर्जाच्या हप्त्यापोटी प्रत्येक महिन्यात २५ कोटी रुपये भरावे लागणार आहेत. महापालिकेला ते शक्य होणार नाही. तसेच, ४४ जलकुंभांची कामे अद्याप सुरू झालेली नाहीत. त्यामुळे तीन महिन्यांत पाणी कसे देणार, असा प्रश्‍न दानवे यांनी केला. शिंदे-फडणवीस यांना शहराची पाणीपुरवठा योजना पूर्ण होऊ द्यायची नाही, असा आरोपही दानवे यांनी केला.

हिंमत असेल तर मैदानावर सभा घ्या..

भाजप नेत्यांना चौकात, रस्त्यावर सभा घ्याव्या लागत आहेत. पंतप्रधान नरेंद्र मोदी यांची सभा देखील रामनगर भागात ठेवण्यात आली आहे. हिंमत असेल तर त्यांनी सांस्कृतिक मंडळाच्या मैदानावर सभा घेऊन दाखवावी, असे आव्हान अंबादास दानवे यांनी दिले. कुणाच्या सभेला किती गर्दी होईल, यावरून ताकद कळेल असे दानवेंनी स्पष्ट केले. जिल्ह्यातील सर्वच नऊ जागा महाविकास आघाडी जिंकणार असा दावाही दानवेंनी केला.