Ashok Chavan On Surat News : अभिव्यक्ती स्वातंत्र्यावर गदा आलीच आहे, आता मुक्त भ्रमणाचा अधिकारही काढणार का ?

Marathwada : काॅंग्रेस नेते माजी खासदार राहुल गांधी (Rahul Gandhi) सुरत दौऱ्यावर आहेत. सुरत न्यायालयात उपस्थीत राहण्यासाठी ते जात असल्यामुळे देशभरातून काॅंग्रेसचे कार्यकर्ते त्यांना समर्थन देण्यासाठी सुरतला निघाले आहेत. परंतु पोलिसांकडून या नेते- पदाधिकाऱ्यांची अडवणूक केली जात असल्याचा आरोप केला जातोय.

महाराष्ट्रातील काॅंग्रेसच्या आमदार व माजी मंत्री यशोमती ठाकूर यांना देखील गुजरात पोलिसांनी अडवल्याचे सांगितले जाते. या पार्श्वभूमीवर काॅंग्रेस नेते, माजी मुख्यमंत्री अशोक चव्हाण (Ashok Chavan) यांनी संताप व्यक्त केला आहे. (Congress) चव्हाण यांनी ट्विट करत या प्रकाराबद्दल नाराजी व्यक्त करतांनाच आता मुक्त भ्रमणाचा अधिकार देखील काढून घेतला की काय? असा सवाल त्यांनी उपस्थितीत केला.

चव्हाण यांनी केलेल्या ट्विटमध्ये म्हटले आहे की, सुरतला जाणार्‍या काँग्रेस कार्यकर्त्यांना अडविण्यात येत असल्याच्या बातम्या सकाळपासून येत आहेत. अभिव्यक्ती स्वातंत्र्यावर तर गदा आलीच आहे; आता मुक्त भ्रमणाचा अधिकार देखील काढून घेण्यात आला आहे की काय? मोदी आडनावावरुन वादग्रस्त विधान करणारे राहुल गांधी सुरत येथे पोहोचले आहेत. आज ते सुरत सत्र न्यायालयात याचिका दाखल करणार आहेत.

त्यांच्यासोबत त्यांची बहीण प्रियंका गांधी वड्रा आणि मुख्यमंत्री अशोक गेहलोत, भूपेश बघेल आणि सुखविंदर सिंग सुखू तीन राज्यांचे प्रदेशाध्यक्ष आहेत. नाना पटोलेंचा देखील यात समावेश आहे. सुरत न्यायालयात उपस्थित राहण्यासाठी जात असलेल्या काँग्रेसच्या आमदार यशोमती ठाकूर यांची गाडी सुरत पोलिसांनी अडवली आहे. त्यामुळे काँग्रेसचे नेते आक्रमक झाले आहेत.