Manoj Jarange Patil : जरांगे-पाटलांचे पुन्हा 'उपोषणास्त्र', तारीखही ठरली; विधानसभेचं गणित बदलणार?

Manoj Jarange Patil Agitation : मराठा आरक्षणाचे नेते, मनोज जरांगे-पाटील यांनी पुन्हा उपोषणाचे अस्त्र बाहेर काढले आहे. जरांगे-पाटील 16 सप्टेंबरच्या मध्यरात्री बारा वाजेपासून उपोषणाला बसणार आहे. 17 सप्टेंबरला मराठवाडा मुक्ती संग्राम दिनापासून मराठ्यांना ओबीसीतून स्वतंत्र आरक्षण मिळण्यासाठी आंतरवाली सराटी येथे जरांगे-पाटील उपोषण सुरू करतील.

यापूर्वी मनोज जरांगे-पाटील (Manoj Jarange Patil) यांनी 29 सप्टेंबरपासून उपोषण करणार असल्याचं सांगितलं होतं. मात्र, आता मराठवाडा मुक्ती संग्राम दिन अर्थात 17 सप्टेंबरपासून आमरण उपोषण करणार असल्याचं जरांगे-पाटील यांनी आज ( 10 सप्टेंबर ) जाहीर केलं.

सगेसोयऱ्याची अंमलबजावणी, मराठा समाजाला ( Maratha Reservation ) ओबीसीतून आरक्षण, हैदराबाद आणि बॉम्बे गॅझेट या मागणींसह जरांगे-पाटील याआधीही उपोषणाला बसले होते. या आंदोलनाचं लोण राज्यात पसरले होते.

जरांगे-पाटलांच्या आंदोलनामुळे महायुती सरकारची कोंडी झाली होती. त्यासह लोकसभा निवडणुकीतही जरांगे-पाटलांच्या आंदोलनाच्या झळा महायुती सरकारला बसल्या होत्या. महायुतीच्या मातब्बर उमेदवारांना पराभवाचा सामना करावा लागला. त्यात पंकजा मुंडे, रावसाहेब दानवे यांच्यासारख्या बड्या नेत्यांचा समावेश आहे.

यातच जरांगे-पाटील यांनीही 288 मतदारसंघात उमेदवार उभे करायचे की पाडायचे, हे ठरविणार असल्याचं सांगितलं आहे. अद्याप विधानसभा निवडणूक जाहीर झाली नाही. त्यामुळे विधानसभा घोषित झाल्यावर निर्णय जाहीर करू, असं जरांगे-पाटलांनी म्हटलं आहे. मात्र, त्यापूर्वी जरांगे-पाटील यांनी पुन्हा 'उपोषणास्त्र' बाहेर काढल्यानं सरकारची कोंडी होण्याची शक्यता आहे.

कारण, एकीकडे जरांगे-पाटील ओबीसीतून मराठ्यांना आरक्षण देण्याची मागणी करत आहेत. तर, दुसरीकडे मराठ्यांना ओबीसीतून आरक्षण देण्यासाठी महायुतीत काही नेत्यांना विरोध आहे. त्यामुळे या मागणीवरून जरांगे-पाटील सरकारची कोंडी करू शकतात.

याचा फटका महायुती सरकार विधानसभा निवडणुकीत बसण्याची शक्यता आहे. पण, जरांगे-पाटलांच्या मागणीवर सरकार कोणती चाल खेळणार? कसा तोडगा काढणार? हे देखील पाहणे महत्त्वाचे ठरणार आहे.