Mp Hemant Patil News : कोणी आपल्या जीवावर उठेल असे काम करू नये, खासदार पाटलांचा सल्ला..

Hingoli : खासदार संजय जाधव यांना जीवे मारण्यासाठी ३ कोटी रुपयांची सुपारी दिल्याची तक्रार त्यांनी केली आहे. या गोष्टीचा निषेधच केला पाहिजे, यापुर्वी रिंधा प्रकरणात ते नांदेडच्या एसपीला भेटले होते, तेव्हा आमची चर्चा झाली होती. त्यामुळे जीवे मारण्यासाठी सुपारी देण्याचा प्रकार गंभीर असून आपण या संदर्भात मुख्यमंत्री एकनाथ शिंदे (Eknath Shinde) यांच्याशी बोलणार आहोत, असे हिंगोलीचे खासदार हेमंत पाटील यांनी `साम` टीव्हीशी बोलतांना सांगितले.

परंतु कोणी आपल्या जीवावर उठेल असे काम आपण करू नये, असा सल्ला देखील पाटील यांनी खासदार संजय जाधव (Sanjay Jadhav) यांना दिला आहे. दुसऱ्यांदा आपल्याला जीवे मारण्याची सुपारी देण्यात आल्याचा आरोप परभणीचे खासदार संजय जाधव यांनी केला. (Heamant Patil) एका गॅंगला आपल्याला जीवे मारण्याची ३ कोटी रुपयांची सुपारी देण्यात आल्याचे स्वत: खासदार संजय जाधव यांनी सांगितले.

तसेच या संदर्भा जिल्हाधिकारी, पोलिस अधिक्षक व थेट गृहमंत्र्यांकडे तक्रार केल्याचेही त्यांनी सांगितले. यापूर्वी नांदेड येथील रिंधा गॅंगकडून जीवे मारण्याची धमकी आल्याचा आरोप करत जाधव यांनी पोलिसांत तक्रार दिली होती. दोन दिवसापूर्वी एका फोनद्वारे आपल्याला जीवे मारण्याची सुपारी देण्यात आल्याची माहिती मिळाली होती. त्या फोनवरून खबऱ्याने त्यांना आपणास जीवे मारण्यासाठी ३ कोटी रुपयांची सुपारी देऊ केली असल्याचे जाधव यांनी म्हटले होते.

यामुळे एकच खळबळ उडालेली असतांना हिंगोलीचे खासदार हेमंत पाटील यांनी यावर भाष्य केले आहे. हा प्रकार योग्य नाही, याचा निषेध केलाच पाहिजे. परंतु काही माणसं आपल्या जीवावर उठतात, तेव्हा आपण जे काम करतो, ते काम करत असतांना कोणी तरी आपल्या जीवावर उठेल असे करू नये. आपण समाजाचे नेतृत्व करत असतांना सगळ्यांना सोबत घेऊन चाललो, तर मला नाही वाटत कोणी अशा थराला जाईल, अशा शब्दात हेमंत पाटील यांनी खासदार जाधव यांना सल्ला दिला.