Ashok Chavan : अशोक चव्हाण पुन्हा एकदा निवडणूक लढवण्याची शक्यता! आता प्रतिष्ठीत सहकार क्षेत्रात होणार एन्ट्री

Nanded News : सहकार कायद्याच्या नव्या नियमानंतर नांदेड जिल्हा मध्यवर्ती सहकारी बँकेतील विद्यमान संचालक मंडळातील तब्बल आठ बडे संचालक निवडणूक लढवण्यास अपात्र ठरण्याची शक्यता आहे. अशावेळी त्यांनी आपल्या नात्यागोत्यातील व्यक्तीची नावे मतदार यादीत आणून त्यांची वर्णी लावण्यासाठी प्रयत्न सुरू केल्याची चर्चा आहे. त्यातच भाजपचे खासदार आणि नांदेडचे नेते अशोक चव्हाण हे जिल्हा बँकेची निवडणूक लढवणार असल्याची माहिती मिळत आहे.

अर्धापूर तालुक्यातील येळेगाव सेवा सहकारी सोसायटीने आपला प्रतिनिधी म्हणून खासदार अशोक चव्हाण यांच्या नावावर शिक्कामोर्तब केल्याचे बोलले जाते. आतापर्यंत खासदार चव्हाण यांनी आपल्या विचारांचे संचालक बँकेवर असावे यासाठी प्रयत्न केले होते. पण स्वतः थेट जिल्हा बँकेच्या आखाड्यात उतरले नव्हते. पण आता सहकार कायद्याच्या नव्या नियमामुळे ते स्वतः थेट बँकेच्या आखाड्यात उतरण्याच्या तयारीत आहेत.

गेली अनेक वर्ष डबघाईला आलेली नांदेड जिल्हा बँक आता आर्थिक संकटातून बाहेर आली आहे. अशावेळी बँकेचा कारभार सुरळीत सुरू राहावा यासाठी जिल्ह्याचे नेतृत्व करणाऱ्या अशोक चव्हाण यांच्याकडेच जिल्हा बँकेची सुत्रंही हाती राहावी, असा सूर निघू लागला आहे. गेली अनेक वर्ष बँकेचे सभासद असलेले अशोक चव्हाण आता अध्यक्ष पदावरही विराजमान होण्याची शक्यता निर्माण झाली आहे.

आतापर्यंत अशोक चव्हाण यांनी कधी थेट बँकेच्या निवडणुकीत सहभाग घेतला नव्हता. परंतु आपल्या विचाराचे संचालक मंडळ असावे यासाठी ते कायम प्रयत्नशील राहिले. दिवंगत खासदार वसंतराव चव्हाण, विद्यमान अध्यक्ष भास्कर पाटील खतगावकर यांची बँकेच्या अध्यक्ष पदावर झालेली निवड ही त्यातूनच करण्यात आली होती.

सहकार विभागाने केलेल्या नव्या नियमाचा फटका भास्करराव पाटील खतगावकर, आमदार प्रताप पाटील चिखलीकर, मोहन पाटील टाकळीकर, दिनकर दहिफळे यांच्यासह तब्बल आठ संचालक पुन्हा निवडणूक लढवू शकणार नाहीत. अशावेळी त्यांच्याच घरातील काही नवे चेहरे जिल्हा बँकेच्या संचालक मंडळात दिसू शकतात.

जिल्हा बँकेच्या वैयक्तिक सभासद यादीत नाव असलेल्या अशोक चव्हाण यांच्यासारख्या अनुभवी नेत्याच्या हाती जिल्हा बँक असावी, असा एक मत प्रवाह आहे. त्यानूसार अर्धापूर तालुका सेवा सहकारी तसेच येळेगाव सोसायटीकडून त्यांच्या नावाचा ठराव घेण्यात आला आहे. त्यामुळे यंदाची जिल्हा बँकेची निवडणूक अधिक रंगतदार होण्याची शक्यता आहे.

FAQs :

1. नांदेड बँक निवडणुकीत काय बदल झाले आहेत?
नव्या सहकार कायद्यामुळे काही संचालक अपात्र ठरण्याची शक्यता आहे.

2. किती संचालक अपात्र ठरू शकतात?
सुमारे आठ संचालक अपात्र ठरू शकतात.

3. मतदार यादीबाबत काय चर्चा आहे?
नातलगांची नावे मतदार यादीत आणण्याचा प्रयत्न सुरू असल्याची चर्चा आहे.

4. अशोक चव्हाण यांची भूमिका काय आहे?
ते निवडणूक लढवण्याची शक्यता आहे.

5. या घडामोडीचा परिणाम काय होऊ शकतो?
निवडणुकीतील समीकरणे बदलून राजकीय संघर्ष वाढू शकतो.