BJP Politics News : भाजपचे आमदार नारायण कुचे हे नेहमी कुठल्या ना कुठल्या वादामुळे चर्चेत असतात. छत्रपती संभाजीनगर महानगरपालिका निवडणुकीत कुचेंच्या बहिणीचा पराभव झालेला असताना निवडणूक अधिकाऱ्याला हाताशी धरून त्यांनी बहिणीला निवडून आणलं, असा आरोप वंचित बहुजन आघाडीच्या उमेदवाराच्या समर्थकांनी केला. यावरून अजूनही तणावाचे वातावरण असताना कुचे यांची एक कथित ऑडिओ क्लिप व्हायरल झाली आहे. यामुळं एकच खळबळ उडाली आहे. पैसे वाटपाबाबत वंचितच्या कार्यकर्त्यासोबतचा संवाद या ऑडिओ क्लिपमध्ये आहे.
आमदार नारायण कुचे यांनी हा आॅडिओ आपला नाही, आपण असे बोललोच नाही, पराभूत झालेल्या वंचित आघाडीच्या लोकांनी मला बदनाम करण्यासाठी मोडतोड केलेली ही क्लीप आहे. यातील आवाज आपला नाही, असा दावा करत सगळे आरोप फेटाळले आहेत. आपण कधीही कोणाला पैसे वाटले नाही, असेही कुचे यांनी म्हटले आहे. तर दुसरीकडे वंचित आघाडीच्या ज्या कार्यकर्त्याशी नारायण कुचे यांचे मोबाईलवरील संभाषण झाल्याचा दावा केला जातोय, त्याच व्यक्तीने समोर येत ही ऑडिओ क्लीप खरी असल्याचा दावा केला आहे. आमदार नारायण कुचे हे माझ्या परिचयाचे असल्यामुळे मी त्यांना दिवसाढवळ्या पैसे वाटू नका, लोकांमध्ये चर्चा होत आहे, असे सांगितल्याचे म्हस्के नावाच्या या व्यक्तीने म्हटले आहे.
छत्रपती संभाजीनगर महानगरपालिकेच्या प्रभाग क्रमांक 24 मधून आमदार नारायण कुचे यांची बहीण गंगाबाई भिमराव भवरे या निवडून आल्या आहेत. बहिणीला निवडून आणण्यासाठी नारायण कुचे यांनी प्रभागामध्ये पैसे वाटल्याचा आरोप वंचित बहुजन आघाडीच्या उमेदवारांनी केला होता. या संदर्भात व्हायरल झालेल्या कथित ऑडिओ रेकॉर्डिंग मध्ये नारायण कुचे एका व्यक्तीशी बोलत आहेत. 'आमदाराचे पैसे आहे जनतेचे भलं होऊ द्या, माझ्या बॉडीगार्डला पैसे वाटताना अडवलं. आता मी पोलीस बंदोबस्तामध्ये पैसे वाटणार आहे' असा संवाद यात आहे.
आमदार – बोल बोल, बोल न
कार्यकर्ता – थोडासा अंधार पडू द्या न
आमदार – अंधारात कुठे पैसे वाटत असतात, गोरगरीब लोकांना नोटा दिसल्या पाहिजे
कार्यकर्ता – अहो कुठे साहेब एक मिनिट ऐकून घ्या सगळीकडे चर्चा सुरू आहे म्हणून म्हणू लागलो तुम्हाला, की थोडासा अंधार पडू द्या
आमदार – अंधारात खेळ नाही जमत, उजेडात होऊन जाऊ दे.
(कार्यकर्ता व आमदार दोघेही हसताना)
आमदार – तुम्ही आलीकुन अडवलं आमचं पलीकडून चालू आहे
कार्यकर्ता – नाही आडवल नाही तुम्हाला कोण, हे तर तुमचा गैरसमज आहे.
आमदार – दोन दिवस तुम्हाला मी काही म्हणणार नाही तुम्ही काय केलं मला माहित आहे.
कार्यकर्ता – शिव्या दिल्या नाही मी त्यांना बाजूला केलं पोरांना त्यांचा काही संबंध नाही ते बॉडीगार्ड आहेत त्यांना काही बोलू नका, त्याची त्याची ड्युटी आहे ती ड्युटी करू लागले मी त्यांना बाजूला केलं
आमदार – आता मी एक PI ची गाडी मागितली सात-आठ पोलीस, पोलीस बंदोबस्तात पैसे वाटीतो आता,
कार्यकर्ता – बिनधास्त वाटा कुचे साहेब पण मी काय म्हणतो थोडासा अंधार पडू द्या.
आमदार – गोरगरीब जनतेचे भलं होऊ द्या ना
कार्यकर्ता – अहो आमदार साहेब, आतापर्यंत तुम्ही भलच करत आलेले आहेत न,
आमदार – चालन वाटतो मी
कार्यकर्ता – तिथे आम्ही नाही मात्र थोडासा अंधार पडू द्या, दिवसाढवळ्या एवढे चालू झालं म्हटल्यावर आमदार म्हणून दिवसाढवळ्या एवढं करत असेल तर थोडंसं वाटतं
आमदार – ठीक आहे ठेव ठेव..
या संवादाची ऑडिओ क्लीप सोशल मिडियावर व्हायरल झाली आहे. त्यानंतर आमदार नारायण कुचे यांनी यावर स्पष्टीकरण देत चौकशीला समोर जायला तयार असल्याचे म्हटले आहे. तसेच आपण संबंधितांवर मानहानीचा दावा दाखल करणार असल्याचेही कुचे यांनी म्हटले आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.