Chhatrapati Sambhajinagar News : महापालिकेने अतिक्रमण काढले, बेघरांनी जिल्हाधिकारी कार्यालयासमोर चूल मांडली!

Marathwada News : पंतप्रधान आवास योजनेसाठी अतिक्रमण काढण्याची कारवाई केल्यानंतर हर्सुल येथील मुलनिवासीनगरातील बेघरांनी जिल्हाधिकारी कार्यालयापुढे निवारा मिळण्यासाठी आंदोलन सुरु केले. बेघरांनी रस्त्यावरच चूली मांडत स्वयंपाक केला आणि कारवाईचा निषेध केला. बेघरांनी आपलं सगळं बिऱ्हाडचं जिल्हाधिकारी कार्यालयासमोर मांडल्याने प्रशासनाची मोठी कोंडी झाली आहे.

हर्सुल येथील गट क्रमांक 216 व 217 येथील गायरान जमीनीवर बेघर लोक रहात होते. प्रधानमंत्री आवास योजनेची अंमलबजावणी करण्यासाठी महापालिकेच्या अतिक्रम हटाव पथकाने दोन दिवसांपूर्वी पाडापाडी करुन जागा रिकामी करुन घेतली. यामुळे येथील रहिवाशांनी पिपल्स पार्टी ऑफ इंडिया ( डेमोक्रॅटिक)च्या नेतृत्वात (Collector) जिल्हाधिकारी कार्यालयापुढे आंदोलन सुरु केले आहे.

यासंदर्भात निवासी उपजिल्हाधिकारी विनोद खिरोळकर यांना निवेदन देण्यात आले आहे. या बेघरांनी जिल्हाधिकारी कार्यालयापुढे संसार थाटला असून आम्ही बेघर आहोत, आमची राहण्याची सोय होईपर्यंत इथेच स्वयंपाक करुन खातो, असे म्हणत चुली पेटवून स्वयंपाकही केला. (Chhatrapati Sambahjinagar) इथेच हे आंदोलक मुक्कामही करत असल्याने त्यांच्या निवाऱ्याचा प्रश्न तातडीने मार्गी लावा, अशी मागणी केली जात आहे.

संविधानाच्या कलम 21 नुसार देशातील प्रत्येक नागरीकाला सन्मानाने जगण्याचा मुलभूत अधिकार आहे. या सन्मानाच्या जगण्याच्या मुलभूत अधिकारात निवारादेखील आहे. मुलनिवासीनगरातील आम्ही रहिवासी बेघर असल्याने 2010 पासून या गायरानात राहत आहोत, आम्हाला हक्काचे घर मिळावे म्हणून सरकार दरबारी सातत्याने प्रयत्न करत असताना घर मिळणे दूरच पण पुन्हा बेघर व्हावे लागले आहे.

आम्हाला हक्काचा निवारा देण्यात यावा, अशी मागणी आंदोलकांनी निवेदनाद्वारे केली आहे. आमचं घर पडल्यावर आम्ही कुठे जायचं? असा प्रश्न उपस्थित करत या नागरिकांनी संभाजीनागर जिल्हाधीकारी कार्यालयासमोर कालपासून कुटुंबासह ठिय्या दिला आहे. यावर प्रशासन काय निर्णय घेते याकडे सगळ्यांचे लक्ष लागले आहे.

२५ वर्षे पूर्ण करणारा ई-सकाळ आता का्ॅमस्कोअरमध्ये नंबर १. डिजिटल माध्यमांच्या क्षेत्रातली नवी झेप