Khotkar V/S Danve News : सौर उर्जा प्रकल्प येण्याआधीच दानवे-खोतकर यांच्यात श्रेयवादाचा भडका!

Jalna Politics : जालन्याचे माजी खासदार तथा केंद्रीय राज्यमंत्री रावसाहेब दानवे आणि विद्यमान आमदार अर्जून खोतकर यांच्या सध्या श्रेयवादाचा भडका उडाला आहे. जालना महानगर पालिकेअंतर्गत राबविण्यात येणाऱ्या सौर ऊर्जा प्रकल्पाला मंजूरी कोणी आणली? यावरून जिल्ह्यातील या दोन बड्या नेत्यांमध्ये जुंपली आहे.

मी आणलेल्या योजनांचे श्रेय खोतकरांनी लाटू नये, अशा शब्दात रावसाहेब दानवे (Raosaheb Danve) यांनी त्यांना सुनावले. तर जे काम मी केले त्याचे श्रेय घेणारच, असे प्रत्युत्तर अर्जून खोतकर यांनी दिले आहे. रावसाहेब दानवे हे जालना जिल्ह्याचे सलग पाच टर्म खासदार होते. 2024 मध्ये त्यांचा पराभव झाला. तर अर्जून खोतकर 2019 मध्ये पराभूत झाले होते, आता ते निवडून आले आहेत.

त्यामुळे 2022 मध्ये मंजूर झालेल्या सौर ऊर्जा प्रकल्पाला तत्कालीन खासदार रावसाहेब दानवे यांनी मंजूरी आणली असेल? की माजी आमदार अर्जून खोतकरांनी यावर (Jalna) जालन्यात जोरदार चर्चा सुरू आहे. रावसाहेब दानवे यांनी काल टीका केल्यानंतर आज खोतकरांनी त्यांना उत्तर दिले. जालना शहरासाठीच्या पाणी पुरवठा आणि सौर ऊर्जा प्रकल्पाच्या श्रेयावरून दानवे-खोतकर यांच्यात राजकीय कलगितुरा रंगला आहे.

अर्जून खोतकर यांनी सौर ऊर्जा प्रकल्पाला आपण मंजूरी आणि निधी आणल्याचे सिद्ध झाले नाही, तर त्यांची आयुष्यभर गुलामी करू, अशा शब्दात दानवे यांना आव्हान दिले. मुलं आम्ही जन्माला घातली तर ती आमचीच म्हणणार ना, असा टोलाही त्यांनी लगावला. जे काम खासदार म्हणून रावसाहेब दानवे यांनी केले, त्याचे श्रेय त्यांनाच दिले गेले पाहिजे, ते आम्ही कधीही घेणार नाही.

पण जे काम मी केले, ते केल्याचे म्हणायला मोठे मन लागते, आम्ही तुमच्या सारखे कोत्या मनाचे नाही,असेही खोतकर म्हणाले. आपल्याला या वादात पडायचे नाही, जालनेकरांना दिलेली आश्वासन, चांगल्या पायाभूत सुविधा, पाणी, रस्ते, वीज देणे याला आपले प्राधान्य असणार आहे. कोणी जालन्याला कॅलिफोर्निया करू म्हणतो, तर कोणी लंडन, पण प्रत्यक्षात हे शक्य आहे का? असा टोला खोतकर यांनी माजी आमदार कैलास गोरंट्याल यांनाही लगावला.