Ravikant Tupkar: तुपकराचं ठरलं; संसदेत जाणारच; 'एक व्होट आणि एक नोट' तत्वावर बुलढाण्यातून लढणार

Buldana: शेतकऱ्यांचे नेते रविकांत तुपकर (Ravikant Tupkar) शेतकऱ्यांचे प्रश्न घेऊन बुलढाणा लोकसभा निवडणूक लढविण्यासाठी सज्ज झाले आहे. 'दिल्ली दरबारी शेतकऱ्यांचे प्रश्न मांडण्यासाठी मी बुलढाणा लोकसभा निवडणूक लढणार आणि जिंकणारसुद्धा,' असा विश्वास तुपकरांनी व्यक्त केला आहे. लोकवर्गणीतून ते निवडणूक लढणार आहेत.

'मी गेल्या 20 वर्षांपासून शेतकऱ्यांच्या प्रश्नावर संघर्ष करत आहे. त्यामुळे मी 100 टक्के संसदेत जाणार, ज्या प्रश्नासाठी मी लढतोय त्या प्रश्नाचं मूळ दिल्लीत असल्यानं सगळ्या शेतकऱ्यांचा आणि तरुणांचा माझ्यावर दबाव आहे की, तुम्ही लोकसभा निवडणूक लढून दिल्लीला जायला पाहिजे अन् सरकारला आमचे प्रश्न सोडवायला भाग पाडलं पाहिजे. म्हणून येणारी लोकसभा निवडणूक मी लोकसहभागाने आणि लोकवर्गणीतून लढणार आहे,' असे तुपकरांनी स्पष्ट केलं.

'मी फाटका माणूस आहे, माझ्याकडे पैसे नाहीत. मी भ्रष्टाचार करत नाही. माझ्याकडे नंबर दोनचे पैसे नाहीत, त्यामुळे 'एक व्होट आणि एक नोट' या तत्त्वावर मी निवडणूक लढणार आहे. बुलढाणा जिल्हा हा आत्महत्याग्रस्तांचा जिल्हा असल्याचे बोलले जाते. मला हा कलंक पुसायचा आहे. कापसाला आणि सोयाबीनला भाव मिळवून देणे हे माझं पहिलं काम असेल. नवीन शिक्षण प्रणाली आणणे आणि बेरोजगारी दूर करण्यासाठी सभागृहात मी हे विषय मांडणार,'असे तुपकर म्हणाले.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

स्वाभिमानी शेतकरी संघटनेकडून निवडणूक लढणार का? यावर तुपकर म्हणाले, 'प्रत्येक निवडणुकीत सहा जागा लढवण्याची घोषणा राजू शेट्टी नेहमीच करतात. यावेळी माझ्या भागातील शेतकऱ्यांचा निर्णय आहे की, लढायचं आणि तेही स्वतंत्र. माझं न्यायालय शेतकरी आहे,'