Beed Crime : शिवराज दिवटे मारहाण प्रकरणात मोठा ट्विस्ट, आधी समाधान मुंडेला मारहाण? 'त्या' व्हिडिओने खळबळ

Shivraj Divate Assault Case : परळीतील शिवराज दिवटे याला मारहाण प्रकरण गाजत आहे. 20 जण मिळून बेल्ट आणि काठ्यांनी शिवराजला मारत असल्याचा व्हिडिओ सोशल मीडियावर व्हायरल झाला होता. या व्हिडिओमध्ये समाधान मुंडे हा शिवराजला मारत असल्याचे दिसत आहे. मात्र, आता या मारहाण प्रकरणात मोठा ट्विस्ट आला आहे. समाधान मुंडे याला शिवराजच्या मित्रांनी मारहाण केल्याने त्याचा बदला घेण्यासाठी ही मारहाण झाल्याचा दावा करण्यात येतो आहे. समाधानला मारहाण होत असल्याचा व्हिडिओ देखील समोर आला आहे. त्यामुळे एकच खळबळ उडाली आहे.

शिवराजला मारहाण प्रकरणाला सोशल मीडियावर जातीयस्वरुप देण्याचा प्रयत्न काही जणांकडून केला जातो आहे. तर, बीड जिल्ह्याचे पोलिस अधिक्षक नवनीत काँवत यांनी या प्रकरणाला जातीयरंग देऊ नका असे आवाहन केले आहे. ते म्हणाले की, ज्या 20 जणांवर गुन्हा दाखल झाला आहे ते वेगवेगळ्या जातीचे आहे त्यामुळे याला जातीयरंग देणे योग्य नाही.

मिळालेल्या माहितीनुसार, समाधान मुंडे याला मारहाण झाल्याचा व्हिडिओ समोर आल्यानंतर या प्रकरणी गुन्हा दाखल करण्यात येणार असल्याची माहिती आहे. परळी पोलिस ठाण्यात रविवारी रात्री उशीरापर्यंत गुन्हा दाखल करण्याची प्रक्रिया सुरू होती. त्यामुळे या समाधान मुंडेला मारहाण करणाऱ्यांवर देखील कारवाई होणार आहे.

मराठा संघटना आक्रमक

शिवराज दिवटे याला मारहाण प्रकरणी मराठा संघटनांकडून आज बीड जिल्हा बंदची हाक देण्यात आली होती. मात्र, रविवारी रात्री उशीरा बंद स्थगित करण्यात आला. मात्र,परळीमध्ये आंदोलन करण्यावर मराठा संघटना ठाम होत्या. आरोपींवर मकोका अंतर्गत कारवाई करावी, अशी मागणी संघटनांकडून करण्यात येत आहे.

धनंजय मुंडेंनी घेतली शिवराजची भेट

माजी मंत्री, आमदार धनंजय मुंडे यांनी रविवारी शिवराज दिवटे याची रुग्णालयात जात भेट घेतली. या भेटीत त्यांनी शिवराजसह त्याच्या कुटंबीयांशी संवाद साधला तसेच आरोपींवर कठोर कारवाई करण्याचे आश्वासन दिले. रविवारीच मनोज जरांगे पाटील आणि आमदार सुरेश धस यांनी देखील शिवराजची भेट घेतली.