Sanjay Shirsat News : सटकली की आपण कुणाच्या बापाचं ऐकत नाही! संजय शिरसाटांनी कोणाचा गेम केला..

Shivsena News : आधी आम्हाला पालकमंत्र्यांच्या गाडीला हात लावता येत नव्हता. मात्र आम्ही आता त्या गाडीत बसलो आहोत. माझा गेम करायला निघालेल्यांचा कसा गेम केला? जे समजंत नाही त्यालाच राजकारण म्हणतात. आम्ही जे केलंय ते ज्यांना समजायला हवं होतं त्यांना समजले आहे, अशा शब्दात सामाजिक न्याय मंत्री तथा छत्रपती संभाजीनगरचे पालकमंत्री संजय शिरसाट यांनी अब्दुल सत्तार यांना नाव न घेताल टोला लगावला.

मला सिक्सर मारायचा होता आणि मला वाटतं तो मी मारला आहे, असेही (Sanjay Shirsat) शिरसाट म्हणाले. जिल्ह्याच्या राजकारणात विद्यमान पालकमंत्री संजय शिरसाट आणि शिवसेनेचे माजी मंत्री अब्दुल सत्तार यांच्यातील संघर्ष दिवसेंदिवस वाढत आहे. एकनाथ शिंदे मुख्यमंत्री असताना सत्तार यांच्यामुळेच शिरसाट यांचे मंत्रीपद हुकले होते.

दुसऱ्यांदा शिरसाट यांच्या मार्गात सत्तार यांनी अडथळे आणण्याचा प्रयत्न केला, पण त्यांचा डाव त्यांच्यावरच उलटला. महायुती सरकारमध्ये (Abdul Sattar) अब्दुल सत्तार यांचे मंत्रीपद गेले आणि शिरसाट यांच्या गळ्यात पडले. एवढेच नाही तर जिल्ह्याचा पालकमंत्री होण्याचे त्यांचे स्वप्नही पूर्ण झाले. आता संजय शिरसाट प्रत्येक गोष्टीचा हिशेब चुकता करण्याच्या तयारीत आहेत.

आपली सटकली की आपण कुणाच्या बापाला ऐकत नाही, कसा गेम केला असे म्हणत त्यांनी पुन्हा एकदा अब्दुल सत्तार यांना डिवचले. एवढेच नाही तर भाजपचे नेते माजी केंद्रीय राज्यमंत्री रावसाहेब दानवे यांनी सिल्लोड खरचं पाकिस्तान झाले आहे, याचा पुनरुच्चार केला. यावर आपण लवकरच सिल्लोडला जाऊन तेथील परिस्थिती पाहणार आहोत.

रावसाहेब दानवे यांनी सर्व गोष्टी मुख्यमंत्र्यांच्या कानावर टाकायला हव्यात. त्यानंतर पाकिस्तानातून आलेले किंवा बांगलादेशी असतील तर त्यांना बाहेर काढणे सोपे जाईल, असा चिमटाही शिरसाट यांनी त्यांच्या विधानाचा दाखला देत काढला. छत्रपती संभाजीनगरच्या नागरिकांना मार्चच्या अखेरपर्यंत पाणी देण्याचं वचन पूर्ण करतो. संबंधित विभागाच्या अधिकाऱ्याना डेड लाईन दिली आहे, असेही शिरसाट म्हणाले.