Parbhani Political News : संतोष बांगर हे अपघाताने झालेले आमदार आहेत, केवळ काही महिन्यांसाठी त्यांची आमदारकी शिल्लक आहे. (Shivsena News) माझी शिफारस केल्याचे ते सांगत आहेत, त्यांनी कागदावर शिफारस हा शब्द लिहून दाखवावा, असे आव्हान परभणीचे आमदार डॉ. राहुल पाटील यांनी शिंदे गटाचे आमदार संतोष बांगर यांना दिले आहे.
शिवसेना (शिंदे गट) चे कळमनुरी विधानसभा मतदारसंघाचे आमदार संतोष बांगर (Santosh Bangar) यांनी नुकतेच शिवसेना (ठाकरे गट) चे खासदार संजय जाधव व आमदार राहुल पाटील (Rahul Patil) यांच्यावर टीका केली होती. परभणीच्या विकासाबाबत प्रश्न उपस्थित करताना त्यांनी राहुल पाटील यांच्या आमदारकीची शिफारस मीच केली असल्याचे सांगितले होते.
त्याला प्रत्युत्तर देताना राहुल पाटील यांनी सांगितले की, माझी शिफारस करण्याचा दावा करणाऱ्यानी कागदावर शिफारस हा शब्द लिहून दाखवावा. (Parbhani) माझी आमदारकीची दुसरी टर्म आहे. अपघाताने आमदार झालेल्यांची आमदारकी काही महिन्यांपुरती शिल्लक आहे. त्यामुळे त्यांनी जेवढे मिळाले आहे तेवढ्यात समाधान मानावे, असा टोलाही पाटील यांनी लगावला.
दरम्यान, आमदार संतोष बांगर यांनी खासदार जाधव व आमदार राहुल पाटील यांच्या विरोधात केलेल्या वक्तव्याचे राजकीय क्षेत्रात पडसाद उमटले आहेत. शिवसेनेचा बालेकिल्ला असणाऱ्या परभणी जिल्ह्यात शिवसेनेतून बाहेर पडून अन्य पक्षात नशीब आजमावणाऱ्या राजकीय नेत्यांच्या पदरी निराशाच पडली आहे.
पक्षांतर केलेल्या एकाही राजकीय नेत्यांचे पुनर्वसन झालेले नाही. हा इतिहास बघता जाधव व पाटील यांनी शिवसेनेतील बंडानंतर उद्धव ठाकरे यांच्याशी एकनिष्ठ राहण्याचा निर्णय घेतला. त्यामुळे आमदार संतोष बांगर यांनी शिवसेना (ठाकरे गट) च्या नेत्यांविरोधात केलेल्या वक्तव्यामुळे राजकीय वातावरण तापले आहे. बांगर यांनी केलेल्या टीकेला आमदार पाटील यांनी प्रत्युत्तर दिले असले तरी खासदार जाधव यांनी मात्र बांगरांच्या टीकेकडे दुर्लक्ष केल्याचे दिसत आहे.
आगामी लोकसभा आणि विधानसभा निवडणुका पाहता परभणी जिल्ह्यात बंडखोर विरुद्ध एकनिष्ठ असा सामना रंगण्याची शक्यता आहे. बांगर यांनी जाधव-पाटील यांच्यावर टीका केल्यानंतर सोशल मीडियावरदेखील प्रतिक्रिया उमटत आहेत. विधानसभेत विश्वासदर्शक ठरावाच्या वेळी उद्धव ठाकरेंसोबत असलेले बांगर विधानसभा अध्यक्षांच्या निवडीच्या वेळी अचानक सत्ताधारी शिंदे गटासोबत बसलेले दिसले.
यावर राज्यभरातून आश्चर्य व्यक्त करण्यात आले होते. तत्पूर्वी उद्धव ठाकरे यांच्याशी एकनिष्ठ राहिले म्हणून हिंगोलीकरांनी बांगर यांचा भव्य सत्कारही केला होता. या वेळी अश्रू ढाळत बांगर यांनी केलेले भाषण आजही चर्चेचा आणि टीकेचा विषय ठरत आहे. येणाऱ्या काळात शिंदे गट विरुद्ध ठाकरे यांच्यात संघर्ष भडकण्याची शक्यता नाकारता येत नाही.
Edited By : Jagdish Pansare
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.