Walmik Karad : परळी 'हायअलर्ट'वर; कराडवरील मोक्का कारवाईनंतर समर्थकानं स्वत:ला पेटवून घेतलं

Parli News : मस्साजोगचे दिवगंत सरपंच संतोष देशमुख हत्याप्रकरणाच्या तपासाने वेग घेतला आहे. 2 कोटींच्या खंडणीप्रकरणात अटक केलेल्या आणि देशमुख हत्येप्रकरणातला आता वाल्मिक कराडचा (Walmik Karad) पाय आणखी खोलात गेला आहे. आता कराडवर 'मकोका' कायद्यांतंर्गत मोठी कारवाई करण्यात आली आहे.यानंतर परळीतलं राजकारण तापलं असून त्यांच्या समर्थकानं स्वत:ला पेटवून घेतलं आहे.

वाल्मिक कराड याचे समर्थक परळीत (Parli) भलतेच आक्रमक झाले आहेत. कराड याची आई गेल्या 12 तासांपासून रात्री उशिरापर्यंत परळी पोलिस ठाण्यासमोर ठिय्या दिलेला आहे. तर त्यांच्याबरोबर समर्थक देखील हटलेले नाही. याशिवाय वेगवेगळ्या ठिकाणी वाल्मिक कराड याच्या चार समर्थकांनी अंगावर ज्वलनशील पदार्थ ओतून घेत आत्मदहनाचा प्रयत्न केला

एका महिलेनं स्वत:च्या अंगावर ज्वलनशील पदार्थ ओतून घेत पेटवून घ्यायचा प्रयत्न केला.तिथं उपस्थित महिलांनी वेळीच प्रसंगावधानता दाखवल्यामुळे मोठा अनर्थ टळला. आता सायंकाळी पुन्हा एका समर्थकांनं परळीत आंदोलनस्थळी स्वत:ला पेटवून घेतल्याची माहिती समोर येत आहे.

तीन पुरुष आणि एका महिलेनं अंगावर ज्वलनशील पदार्थ ओतून घेतले. समर्थकांच्या या आक्रमकपणामुळे पोलिस प्रशासनाचा चांगलाच गोंधळ उडाला आहे. वाल्मिक कराड याच्या समर्थकांनी काही क्षणात संक्रांत सणानिमित्ताने गजबजलेली परळीची बाजारपेठ बंद केली.

याशिवाय वाल्मिक कराड याची आई गेल्या 12 तासांपासून परळी पोलिस ठाण्यासमोर ठाण मांडून आहेत. माझ्या पोरावर चुकीची कारवाई करण्यात आल्याची भूमिका घेत, कराड कुटुंब पोलिस ठाण्यासमोर हटायला तयार नाही. त्यामुळे पोलिस यंत्रणेवर ताण आला आहे.

तसेच समर्थकांनी परळीत एवढा राडा घातला की, टाॅवरवर, कमानींवर चढून आंदोलन केले. तसेच रस्त्यावर टायर जाळून फेकले. वाल्मिक कराड याला उद्या पुन्हा न्यायालयात हजर करण्यात येणार आहे. त्यामुळे पोलिसांनी परळीमध्ये बंदोबस्त वाढवला आहे.