Sanjay Gaikwad Upset : मारकुटा आमदार संजय गायकवाड एकनाथ शिंदेंवर नाराज? बॅनरवरून फोटोच केला गायब!

Sanjay Gaikwad News : बुलढाण्याचे आमदार संजय गायकवाड यांनी आमदार निवासातील कॅन्टीनमध्ये कॅन्टीनचालकाला मारहाण केली होती. त्यामुळे ते चर्चेत आले होते. त्यांच्या विरोधात गुन्हा देखील झाला होता. उपमुख्यमंत्री एकनाथ शिंदे यांनी त्यांना त्या प्रकरणावरून समज देखील दिली होती. मात्र, संजय गायकवाड आता पुन्हा वेगळ्याच कारणासाठी चर्चेत आले आहेत.

संजय गायकवाड यांची जिल्हा संघटकपदी निवड झाल्याने त्यांनी पक्षाचा संवाद मेळावा आयोजित केला होता. मात्र, या मेळाव्यासाठी लावलेल्या बॅनवर भगवी शाल घेतलेला संजय गायकवाड यांचा मोठा होता. तसेच या बॅनरवर त्यांच्या मुलाचा देखील फोटो होता. मात्र, शिवसेना पक्ष, चिन्ह आणि उपमुख्यमंत्री एकनाथ शिंदे यांचा फोटो गायब होता. बाळासाहेब ठाकरे यांचा देखील फोटो या बॅनरवर नव्हता. बॅनवर धर्मवीर आमदार म्हणून संजय गायकवाडांचा उल्लेख होता.

पक्ष आणि एकनाथ शिंदेंचा फोटो बॅनरवर नसल्याने संजय गायकवाड नाराज असल्याची चर्चा आहे. याविषयी त्यांना पत्रकारांनी एकनाथ शिंदे, पक्षाचा,बाळासाहेबांचा बॅनवर फोटो नसल्याचे विचारले असता ते म्हणाले, 'पक्षावर नाराजीचा प्रश्नच नाही. ते आमच्या काळजात आहेतच. सगळं भाषणपण त्याच्यावर होतं.'

गायकवाड म्हणाले की, जनसंवाद मेळाव्याचे आयोजन केले होते. या मेळाव्याचे उद्देश प्रत्येक जिल्ह्यात शिवसेना, किसानसेना, युवासेना हा पक्ष वाढवणे. लोकहिताच्या योजना लोकांपर्यंत पोहोचवणे, बुथ कमिट्या सक्रीय करणे, मतदार नोंदणी या सगळ्या गोष्टी करून घेणे प्रत्येक गावात शाखा उघडणे होता.