NCP News : "हो, दोन्ही राष्ट्रवादी काँग्रेस एकत्र येण्याबाबत चर्चा सुरु" : अजितदादांच्या जवळच्या मंत्र्याने फोडली आतली बातमी

Pune News : आगामी स्थानिक स्वराज्य संस्थांच्या निवडणुकीच्या पार्श्वभूमीवर दोन्ही राष्ट्रवादी काँग्रेस एकत्र येण्याच्या चर्चांना पुन्हा एकदा सुरुवात झाली आहे. कोल्हापूरमध्ये दोन्ही राष्ट्रवादी एकत्र येऊन स्थानिक स्वराज्य संस्थांच्या निवडणुका लढणार असल्याचं बोललं जात आहे. या पार्श्वभूमीवर पुण्यामध्ये उपमुख्यमंत्री अजित पवार यांच्या उपस्थितीमध्ये स्थानिक नेत्यांच्या बैठका सुरू आहेत.

या बैठकींबाबत माहिती देताना कृषिमंत्री दत्तात्रय भरणे यांनी दोन्ही पक्ष एकत्र येण्याबाबत महत्त्वाची माहिती दिली आहे. दोन्ही पक्ष एकत्र येण्याबाबतच्या माहितीला दत्तात्रय भरणे यांनी दुजोरा दिला आणि या चर्चा सुरू असल्याचं सांगितले.

भरणे म्हणाले, स्थानिक स्वराज्य संस्थाच्या निवडणुकाबाबत राष्ट्रवादी काँग्रेसच्या कार्यकर्त्यांचे मत काय आहे, हे जाणून घेण्यासाठी उपमुख्यमंत्री अजित पवार हे बैठका घेत आहेत. आगामी निवडणुकांमध्ये पक्ष्याच्या जागा कशा वाढतील यासाठी प्रयत्न करण्यात येत असून त्याबाबत स्थानिक कार्यकर्त्यांनी सांगितलेल्या सूचना नेते ऐकून घेत आहेत.

स्थानिक पातळीवरच्या नेत्यांचं म्हणणं ऐकून त्या ठिकाणी योग्य असलेला युती आघाडी बाबतचा निर्णय करण्यात येणार आहे. मात्र अद्याप तरी युती आघाडी बाबत निर्णय झालेला नाही. काही ठिकाणी भाजपसोबत युती करावी तर काही ठिकाणी शिवसेनेबरोबर जावं अशी कार्यकर्ते भूमिका मांडत आहेत.

त्यासोबतच काही कार्यकर्त्यांचं दोन्ही राष्ट्रवादी काँग्रेसने या स्थानिक स्वराज्य संस्थांच्या निवडणुका एकत्रित लढाव्या असं मत व्यक्त केले आहे. त्यामुळे दोन्ही राष्ट्रवादी काँग्रेस पार्टी एकत्रित आणण्याबाबत चर्चा सुरू आहे. मात्र पक्षाचे अध्यक्ष अजित पवार, प्रदेशाध्यक्ष सुनील तटकरे आणि राष्ट्रीय नेते प्रफुल्ल पटेल हे घेणार आहेत असं दत्तात्रय भरणे म्हणाले.

भरणे पुढे म्हणाले, मुंडवा प्रकरणात आमचे नेते अजित पवार यांनी खुलासा केला आहे. दादांनी खुलासा केल्यानंतर माझ्यासारख्या कार्यकर्त्यांनी भाष्य करणे उचित नाही. तसेच नुकसानग्रस्त शेतकऱ्यांना देण्यात येणाऱ्या मदतीबाबत बोलताना भरणे म्हणाले, 20 हजार कोटी शेतकऱ्यांच्या खात्यात जमा झाले आहेत. अजूनही मदत होणार आहे.राज्याचे मुख्यमंत्र्यांनी ज्या आश्वासन दिलं होतं ते पूर्ण करत आहे. शेतकऱ्यांना त्यांची मदत पूर्ण मिळेल. केंद्राकडून भरीव मदत येणार असून सरकारने जाहीर केलेली संपूर्ण रक्कम अडचणीत आलेल्या शेतकऱ्यांना मिळेल असल्याचं भरणे यांनी सांगितलं.